Mierkoles, Marso 27
Unaha niyo an pagpamiling han Ginhadian.—Mat. 6:33.
Masurub-on gud an mga disipulo han namatay hi Jesus. Diri la kay namatayan hira han ira hinigugma nga sangkay kondi inabat liwat nira nga nawara na an ira paglaom. (Luc. 24:17-21) Pero han nagpakita hi Jesus ha ira, naghatag hiya hin panahon nga buligan hira nga masabtan an iya papel ha pagtuman han mga tagna ha Biblia. Iya liwat hira gintagan hin importante nga buruhaton. (Luc. 24:26, 27, 45-48) Pagsaka ni Jesus ha langit, an kasubo han mga disipulo nasaliwnan na hin daku nga kalipay. Malipayon hira kay maaram hira nga an ira Agaron buhi ngan andam bumulig ha ira nga matuman an ira bag-o nga toka. An ira kalipay nagpagios ha ira nga padayon nga dayawon hi Jehova. (Luc. 24:52, 53; Buh. 5:42) Basi masubad an mga disipulo ni Jesus ginkikinahanglan hini nga unahon ta ha aton kinabuhi an Ginhadian han Dios. Nagkikinahanglan kita hin pagpailob basi padayon nga makag-alagad kan Jehova, pero nagsasaad hiya nga hura kita niya nga bibendisyonan kon bubuhaton naton ito.—Prob. 10:22. w23.01 30-31 ¶15-16
Pagbasa han Biblia ha Memoryal: (Mga hitabo durante han adlaw: Nisan 16) Marcos 16:2-8
Huwebes, Marso 28
Ha tapotapo ka mabalik.—Gen. 3:19.
Diri gud naton karuyag himoon an sayop nga ginbuhat nira Adan ngan Eva. Malilikyan naton ito kon padayon kita nga mag-aaram mahitungod kan Jehova, mag-aapresyar han iya mga kalidad, ngan mangangalimbasog nga masabtan an iya paagi han paghunahuna. Kon bubuhaton naton ito, sigurado nga mas hihigugmaon naton hi Jehova. Hunahunaa hi Abraham. Hinigugma gud niya hi Jehova. Bisan han nakurian hi Abraham nga masabtan an mga desisyon ni Jehova, waray hiya magrebelde. Lugod, nangalimbasog hiya nga mas makilala hi Jehova. Pananglitan, han nahibaroan ni Abraham an desisyon ni Jehova nga bungkagon an Sodoma ngan Gomorra, ha siyahan nahadlok hiya nga pupoohon han “Hukom han bug-os nga tuna” an magtadong upod han magraot. Para kan Abraham, baga hin imposible ito, salit mapainubsanon nga nagbangon hiya hin sunod-sunod nga mga pakiana kan Jehova. Mapailubon nga ginbaton hiya ni Jehova. Ha urhi, nasabtan ni Abraham nga gin-uusisa ni Jehova an kasingkasing han tagsa nga tawo ngan diri gud niya ginsisirotan an inosente upod han salaan.—Gen. 18:20-32. w22.08 28 ¶9-10
Biernes, Marso 29
An masasarigan nga tawo nagtitipig hin sekreto.—Prob. 11:13.
Han 455 B.C.E., katapos matukod utro ni Gobernador Nehemias an mga pader han Jerusalem, namiling hiya hin masasarigan nga kalalakin-an nga manginginano hin maopay han syudad. Usa han ginpili ni Nehemias amo an lider han Kuta nga hi Hananias. Ginhuhulagway han Biblia hi Hananias sugad nga ‘matataporan gud nga tawo nga mas may kahadlok ha tinuod nga Dios kay han damu nga iba pa nga mga tawo.’ (Neh. 7:2) An gugma kan Jehova ngan kahadlok nga mapasubo hiya nagpagios kan Hananias nga seryosohon an bisan ano nga toka nga iginhatag ha iya. Ito nga mga kalidad mabulig liwat ha aton nga magin masasarigan ha aton pag-alagad ha Dios. Hunahunaa an ehemplo ni Tiquico, nga tinaporan nga kaupod ni apostol Pablo. Hi Pablo sinarig kan Tiquico ngan iginhulagway hiya sugad nga “matinumanon nga ministro.” (Efe. 6:21, 22) Gintaporan hiya ni Pablo diri la basi magdara hin mga surat ha kabugtoan ha Efeso ngan Colosas kondi basi dasigon liwat ngan liawon hira. Hi Tiquico nagpapahinumdom ha aton han matinumanon ngan masasarigan nga kalalakin-an nga nag-aataman han aton espirituwal nga mga panginahanglan yana.—Col. 4:7-9. w22.09 9-10 ¶5-6