An totoo nga pagsabot resulta han paghibaro han mga kalidad ni Jehova, han iya katuyoan, ngan han iya mga naruruyagan o ginkakangalasan. Pakianhi an imo kalugaringon, ‘Basado ha akon pagkakilala kan Jehova, ano nga desisyon an puydi ko himoon nga magpapalipay ha iya?’ (Efe. 5:17) Danay, basi mapalipay hi Jehova kinahanglan naton maghimo hin desisyon nga makakapasubo ha aton kapamilya o kasangkayan. Pananglitan, bangin ipirit han mga kag-anak nga may maopay nga intensyon para ha ira adulto nga anak nga babaye nga mag-asawa hin riko—o ha usa nga makakabayad hin daku nga bugay—bisan kon diri maopay an espirituwalidad han lalaki. Oo, karuyag nira nga magin komportable an kinabuhi han ira anak, pero hin-o an mabulig ha iya nga mag-uswag ha espirituwal? Ano an panhunahuna ni Jehova mahitungod hito? Makikita naton an baton ha Mateo 6:33. Gindadasig hito nga teksto an mga Kristiano nga ‘unahon an pagpamiling han Ginhadian.’ Bisan kon ginpapasidunggan naton an aton mga kag-anak ngan ginrirespeto an mga tawo ha aton komunidad, an pinakaimportante ha aton amo an lipayon hi Jehova. w25.01 17 ¶9-10

Kinahanglan naton an bulig ni Jehova basi padayon nga makagsangyaw nga madasigon bisan kon may mga pagkontra yana. (Pah. 12:17) Kay ano nga makakasiguro ka nga bubuligan ka ni Jehova? Mababasa naton ha Juan kapitulo 17 an pag-ampo ni Jesus. Naghangyo hiya kan Jehova nga bantayan an mga apostol, ngan ginbaton ito ni Jehova. An libro han Mga Buhat nagsusumat ko paonan-o ginbuligan ni Jesus an mga apostol nga makagsangyaw nga madasigon bisan pa kon may mga pagtimaraot. Ha pag-ampo ni Jesus, naghangyo liwat hiya kan Jehova nga bantayan adton matoo ha iginsasangyaw han mga apostol. Upod ka na hito. Padayon nga ginbaton ni Jehova an pag-ampo ni Jesus; bubuligan ka liwat Niya pariho han mga apostol. (Juan 17:​11, 15, 20) Bisan kon mas nagtitikakuri an pagsangyaw han maopay nga sumat nga may kadasig samtang nagtitikahirani an kataposan, makakarawat naton an tanan nga bulig nga aton kinahanglan.​—Luc. 21:​12-15. w25.03 18 ¶13-14

An katawohan han Dios ‘makakasinggit hin malipayon’ kay an ira kasingkasing puno gud hin apresasyon. An makaparig-on nga mga kamatuoran ngan nakakaliaw nga mga saad han Pulong han Dios ngan an aton marig-on nga paglaom nga basado ha halad-lukat han Kristo naghahatag ha aton hin “maopay nga kahimtang han kasingkasing.” An pakiistorya mahitungod hini nga mga butang maghahatag ha aton hin tinuod nga kalipay! (Sal. 34:8; 133:​1-3) An gugma ngan pagkaurosa han katawohan ni Jehova amo an duha nga nangunguna nga kalidad han espirituwal nga paraiso. Ini nga “bugkos han pagkaurosa” naghahatag ha aton hin ideya kon ano an magigin kinabuhi ha bag-o nga kalibotan, diin an mga surugoon ni Jehova magigin mas mahigugmaon ngan nagkakaurosa kay han ira ginbubuhat yana. (Col. 3:14) An bisan hin-o nga naruruyag magin malipayon gud ngan kontento kinahanglan makasulod ha aton espirituwal nga paraiso. Anoman an hunahunaon han kalibotan ha mga surugoon ni Jehova, may-ada hira dungganon nga ngaran, o reputasyon, kaupod han ngatanan nga nagsisingba ha iya.​—Isa. 65:15. w24.04 21 ¶7-8