Imadyina kon ano daw la an aton nagin kinabuhi kon diri kita nag-aalagad kan Jehova. An pagbuhat hito makakabulig ha aton nga magpabilin nga matinumanon ha iya ngan pariho ha salmista makakasiring kita: “Ha akon, maopay an pagpahirani ha Dios para ha akon.” (Sal. 73:28) Malalamposan naton an bisan ano nga problema nga mahimo naton atubangon hinin kataposan nga mga adlaw kay ‘uripon kita han buhi ngan tinuod nga Dios.’ (1 Tes. 1:9) An aton Dios tinuod nga Persona nga nagios para hadton nagsisingba ha iya. Ginpamatud-an niya nga kaupod hiya han iya mga surugoon ha naglabay, ngan kaupod liwat naton hiya yana. Hirani na naton atubangon an pinakadaku nga kasakitan nga mahitatabo ha tuna. Pero diri kita mag-uusahan ha pag-atubang hito. Hinaot kita ngatanan “magin maisugon gud . . . ngan makasiring: ‘Hi Jehova an akon parabulig; diri ako mahahadlok.’”—Heb. 13:​5, 6. w24.06 25 ¶17-18

An Biblia nagsusumat nga may sobra 40 nga kalalakin-an nga nagmando sugad nga mga hadi han Israel. An mag-opay nga hadi may ginbuhat nga magraot. Pansina an ehemplo han maopay nga hadi nga hi David. Hi Jehova nagsiring: “[An] akon surugoon nga hi David . . . nagsunod ha akon ha iya bug-os nga kasingkasing, nga nagbubuhat la han husto ha akon pagkita.” (1 Hadi 14:8) Pero ito nga tawo nagbuhat hin seksuwal nga imoralidad ha usa nga inasaw-an nga babaye ngan nagplano basi mamatay an iya bana ha girra. (2 Sam. 11:​4, 14, 15) Ha luyo nga bahin, damu nga diri matinumanon nga hadi an may ginbuhat nga mag-opay. Pansina an ehemplo ni Rehoboam. Ha pagkita ni Jehova, “ginbuhat niya an maraot.” (2 Cron. 12:14) Pero ginsunod ni Rehoboam an sugo han Dios nga pabay-an nga bumulag an napulo nga tribo tikang ha iya ginhadian. Iya liwat ginparig-on an damu nga syudad ha iya ginhadian basi maproteksyonan an katawohan han Dios ha ira mga kaaway. (1 Hadi 12:​21-24; 2 Cron. 11:​5-12) Paonan-o hi Jehova nakasiring nga matinumanon an usa nga hadi? Klaro nga Iya ginkonsiderar an kahimtang han iya kasingkasing, han iya pagbasol, ngan han iya pagsunod ha tinuod nga pagsingba. w24.07 20 ¶1-3

Ano naman kon an nakahimo hin seryoso nga sala bawtismado nga minor-de-edad—adton waray pa mag-18? An lawas han mga tigurang mag-aasayn hin duha nga tigurang nga makikiistorya ha minor-de-edad ngan ha iya Kristiano nga mga kag-anak. Uusisahon han mga tigurang kon ano na an ginhimo han mga kag-anak basi mabuligan an ira anak nga magbasol. Kon an minor-de-edad may maopay nga disposisyon ngan ginbubuligan hiya han iya mga kag-anak, an duha nga tigurang mahimo magdesisyon nga diri na kinahanglan hin komite. Kay kon huhunahunaon, responsabilidad han mga kag-anak nga tadungon hin mahigugmaon an ira mga anak. (Deut. 6:​6, 7; Prob. 6:20; 22:6; Efe. 6:​2-4) Katapos hito, ha panapanahon kukumustahon han mga tigurang an mga kag-anak basi masiguro nga nabubuligan an minor-de-edad. Pero ano naman kon an bawtismado nga minor-de-edad diri nagbabasol ngan nagpapadayon ha iya sayop nga buhat? Kon sugad hito, usa nga komite han mga tigurang an makikiistorya ha iya upod an iya Kristiano nga mga kag-anak. w24.08 24 ¶18