An usa nga importante nga rason nga protektaran an aton simboliko nga kasingkasing tungod kay gin-uusisa ito ni Jehova. Nagpapasabot ini nga nakikita niya an diri nakikita han iba ngan nakilala hiya kon hin-o gud kita. Hihigugmaon kita niya kon pupun-on ta an aton hunahuna han iya kinaadman nga naghahatag hin kinabuhi. (Juan 4:14) Salit diri kita madadaot han maraot nga moralidad ngan kabuwaan ni Satanas ngan han iya kalibotan. (1 Juan 5:​18, 19) Kon nagigin mas duok kita kan Jehova, naghihilarom an aton gugma ngan respeto ha iya. Tungod kay diri ta karuyag nga masakitan an aton Amay, mangangalas kita bisan ha paghunahuna pa la nga magbuhat hin sala. Hi Marta, usa nga sister ha Croatia nga ginsulay nga magbuhat hin imoralidad, nagsiring: “Nakurian ako paghunahuna hin tama ngan pagpugong han hingyap nga ma-enjoy an temporaryo nga kalipay tungod han pagbuhat hin sala. Pero an kahadlok kan Jehova nagprotektar ha akon.” Paonan-o? Hi Marta nagsiring nga iya ginpamalandong an mga resulta han pagbuhat hin imoralidad. Mahihimo ta liwat ito. w23.06 20-21 ¶3-4

Maaram hi Jesus nga an katuyoan ni Jehova amo an pagbaraan han Iya ngaran, basi ipakita nga buwa an mga ginsiring mahitungod ha iya. Salit gintutdoan han aton Agaron an iya mga sumurunod nga mag-ampo: “Amay namon ha langit, baraanon unta an imo ngaran.” (Mat. 6:9) Nasabtan ni Jesus nga ini an pinakadaku nga isyu nga gin-aatubang han ngatanan nga linarang. Waray intelihente nga linarang ha uniberso an nakakahimo hin mas labaw ha pagbaraan han ngaran ni Jehova kay han ginhihimo ni Jesus. Pero han gin-aresto hi Jesus, ano nga sala an gin-akusar ha iya han iya mga kaaway? Pagpasipara! Sigurado nga inabat ni Jesus nga an pag-abuso o pagpakaraot ha baraan nga ngaran han iya Amay amo an pinakamaraot nga sala. Nabaraka gud hiya nga aakusaran hiya ngan idideklara nga salaan hini nga krimen. Bangin ito an nangunguna nga rason kon kay ano nga ‘duro gud an kasakit’ ni Jesus ha mga oras nga hirani na hiya arestuhon.​—Luc. 22:​41-44. w24.02 11 ¶11

Ha aton rumba han kinabuhi, kinahanglan naton mas higugmaon hi Jehova ngan hi Jesus kay ha aton mga kapamilya. (Mat. 10:37) Pero diri ini nagpapasabot nga puydi na naton igbalewaray an aton mga obligasyon ha pamilya, nga baga hin nakakaulang ini ha aton pagpalipay ha Dios ngan ha Kristo. Ha kabaliktaran, para karawaton han Dios ngan han Kristo, kinahanglan naton tumanon an aton papel ha pamilya. (1 Tim. 5:​4, 8) Kon bubuhaton ta ito, magigin mas malipayon kita. Ha pagkatinuod, maaram hi Jehova nga magigin malipayon an pamilya kon an bana ngan asawa may gugma ngan respeto ha usa kag usa, kon hinigugma ngan gintututdoan han mga kag-anak an ira mga anak, ngan kon ginsusugot han mga anak an ira mga kag-anak. (Efe. 5:33; 6:​1, 4) Anoman an imo papel ha pamilya, sarig ha kinaadman nga makikita ha Biblia imbes nga basta la sumarig ha emosyon, kultura, o ha ginsisiring han mga eksperto kunohay. Gamita hin maopay an aton basado ha Biblia nga mga publikasyon. May praktikal ini nga mga suhestyon kon paonan-o iaaplikar an mga prinsipyo ha Biblia. w23.08 28 ¶6-7