That Heavy Rain for Noah Yi Time​—Who Be Listen for God and Who No Be Listen?

Plenty people for Noah yi time be di do bad. Genesis 6:5

Adam and Eve be get pikin them, and people be kam plenty for this earth. As time be di pass, some angel them too be join Satan for strong-head.

They be kam for this earth, then change get body for people them so that they fit married woman them. The woman them be born some kind pikin them weh they be over big, be get power and be wicked.

People weh they be di do bad thing them be kam fulop for this world. Bible talk say: ‘Bad be plenty for this earth and thing them weh people be di think and di do-am be bad all time.’

Noah be listen for God and ih build the ark. Genesis 6:13, 14, 18, 19, 22

Noah be be na good Man. Jehovah be tell Noah say Ih go destroy wicked people with some heavy rain.

God be tell Noah too for build some big canoe weh they di call-am say ark, then make ih take yi family and all kind animal them enter for inside.

Noah be warn people about that heavy rain weh e go kam, but they no be listen. Some one them be di laugh Noah and other one them be hate yi.

As Noah finish build the ark, ih be bring the animal them inside.