Ke ‘maʼu te maʼuli heʼe gata,’ ʼe tonu ke tui kia Sesu. (Soa. 3:​16-18, 36; 17:3) Neʼe mole tali e te kau Sutea te manatu ʼae ke natou tui kia Sesu. Neʼe natou fehuʼi fenei age ki ai: “Kotea he milakulo ʼe ke fakahoko anai, ke matou sisio ki ai pea mo tui atu kia koe?” (Soa. 6:30) Neʼe natou ui ʼi te temi ʼo Moisese, neʼe maʼu e ʼanatou kui te mane, ʼae neʼe hage ko he pane. (Nee. 9:15; Pes. 78:​24, 25) Neʼe ha lelei mai ai, ko te meʼa tafito ʼae neʼe natou loto ki ai ke maʼu hanatou meʼa kai. Neʼe palalau age ia Sesu ki “te pane moʼoni mai te lagi,” ʼae ʼe feala ai ke natou maʼu te maʼuli heʼe gata, kae mole ko te mane. Kae neʼe mole natou kole age pe kotea te fakaʼuhiga ʼo ʼana palalau. (Soa. 6:32) Neʼe tokaga tafito pe natou ki te ʼu meʼa ʼae neʼe ʼaoga kia natou ʼi te faʼahi fakasino. Koia, neʼe natou meʼa noaʼi te ʼu moʼoni ʼae neʼe faiga e Sesu ke ina akoʼi age. w24.12 5-6 ¶10-​11

ʼI te fale ako, ʼe feala ke ako ai e takolua fanau he tahi age meʼa feia ʼi te natula. Ohage la, ʼe lahi te ʼu fuʼu ʼakau ʼe maʼu ʼi loto he ʼu koga ʼe tonu ke faʼifaʼitakiʼi. ʼI he sinoʼi ʼakau ʼe homo leva he ʼu vaʼa, pea ʼi te ʼu vaʼa ʼaia, ʼe toe homo ake ai he ʼu kiʼi vaʼa liliki, kae ko tonatou agaaga ʼe tatau. Pea ʼe fakahigoaʼi ko te fractale. Kae, ko ai ʼae neʼe ina fakatuʼu te ʼu lao ʼae ʼe tupu ai te ʼu meʼa matalelei mo fakaofoofo ʼaia? Ka fakakaukau takolua fanau ki te fehuʼi ʼaia, ʼe ʼasili malohi anai tana tui ʼae neʼe fakatupu e te ʼAtua te ʼu meʼa fuli ʼaia. ʼE feala ke kolua fai age te fehuʼi ʼaeni ʼi he ʼaho: “Kapau neʼe fakatupu tatou e te ʼAtua, mole matatonu koa ke ina toe foaki mai he ʼu tokoni ʼo ʼuhiga mo te aga ʼae ʼe tonu ke fai ke tou fiafia ai?” Koia, kolua fakaha lelei age ki ai, ʼe maʼu te ʼu tokoni maʼuhiga ʼaia ʼi te Tohi-Tapu. w24.12 16 ¶8

Neʼe takitaki e te ʼAtua ia te apositolo ko Paulo ʼi tana faitohi ki te kau Kolonito. ʼI tana tohi ʼaia, neʼe ina fakatotonu ai ke toʼo ʼi te kokelekasio ia te tagata agahala ʼae ʼe mole fakahemala. (1 Ko. 5:13) Kotea te aga neʼe tonu ke fai e te kau Kolonito ʼo ʼuhiga mo te tagata ʼaia? Neʼe ui age e Paulo ‘ke tuku tanatou fakatahi mo ia.’ Kotea tona fakaʼuhiga ? Neʼe ina fakamahino age ‘ke ʼaua naʼa natou kakai mo te taʼi tagata ʼaia.’ (1 Ko. 5:11) Ka tou kakai mo he tahi feia, ʼe feala ke hoko atu pe te fakatahi mo ia. Koia, neʼe fia ui e Paulo neʼe tonu ki te kau Kolonito ke ʼaua tanatou fakatahi fakafiafia mo te tagata ʼaia. ʼE ko honatou faʼahiga puipui ʼaia mai tana aga ʼae ʼe kovi. (1 Ko. 5:​5-7) Pea tahi, kapau neʼe mole natou felogoi tuʼumaʼu mo ia, ʼe tokoni anai ki ai ke mahino neʼe kua fakamamaʼo mai te ʼu lekula ʼa Sehova. Koia, ʼe feala anai ke ufiufi pea mo fakahemala. w24.08 15 ¶4-5