Laelda mo ma nyinge Mark onongo winyo calo omege ma gitye ki mot me tic i dul pa Jehovah gutere marac. Kadi bed kit meno, en omedde ki bedo ma gwokke dok otute pe me mako akemo i cwinye. En olego teretere, kun penyo Jehovah ni omine cwiny maleng ki teko me kanyo. En bene otimo kwed i bukkewa i kom pwony ma twero konye. Pwony ango ma wanongo? Ka iwinyo ni omego nyo lamego mo oteri marac, bed ma komi opye mot dok itute me juko tam mo marac ma gwok nyo itye kwede. Twero bedo ni pe ingeyo jami ducu mutimme ma oweko ngat meno oloko nyo otimo gin ma kit meno. Pi man, leg bot Jehovah, dok ipennye ni okonyi me neno gin mutimme-ni kit ma ngat meno neno kwede. Ter ni omego nyo lamego-ni onongo pe ki cwiny me timo gin marac i komi dok itute me timme kica. (Car. 19:11) Wi opo ni Jehovah ngeyo gin ma tye ka timme dok en bimini kero ma imito me kanyone.—Latit. 5:8. w22.11 21 ¶5

Yer lurem ma gimaro Jehovah. Lurem ma iyerogi gibigudo dongoni macalo Lakricitayo. (Car. 13:20) John, ma kombeddi tiyo macalo laelda owaco ni: “I kare ma onongo pud atidi, onongo amako lirem mabeco ki jo ma watye ka tito kwena kacel kwedgi. Lurem magi onongo komgi mit, dok gukonya me nongo mit pa ticwa me pwony. . . . Aniang bene ni tyen lok mumiyo onongo ape ki lurem mapol aye ni pien ayenyo lurem i kin yalwakka keken.” Ngo ma omyero itim ka ce iniang ni bedo macok ki ngat mo ma i kacokke twero balo watti ki Jehovah woko? Lakwena Paulo ongeyo ni jo mogo ma i kacokke me cencwari me acel onongo pe gitamo nyo gikwo calo Lukricitayo, pi meno en ociko Temceo ni ogwokke kwedgi. (2 Tem. 2:​20-22) Watwa ki Jehovah pire tek adada. Watiyo matek adada me nyikke cok ki Jehovah, dong pe myero wamak lurem ki jo ma bibalo wat meno woko. w22.08 5-6 ¶13-15

Wan pe watye calo jo ma gin gidag tira pa Lubanga. Me ka meno, wapwonnye me maro kit ma Jehovah tamo kwede kacel ki cikke ducu. Watwero jingo mar meno ka waporo adwogi ma bino pi kwero winyo Lubanga ki adwogi ma bino ka wabedo luwiny. Kong inen pekki ma dano gikelo i komgi pi kwero winyo ryeko ma a ki bot Lubanga. I nge meno, tam kong kit ma kwoni oyubbe odoko ber kwede pien ibedo lawiny bot Lubanga. (Jab. 32:​8, 10) Jehovah oweko ryeko twero nonge bot dano ducu, ento en pe diyo ngat mo keken me jolone. Me ka meno, en tito ka maleng adwogi marac ma jo ma gikwero winyo lok me ryeko ma a ki bote ginongo. (Car. 1:​29-32) Jo ma giyero pe me winyo Jehovah “gibikoko angee pi gin marac ma gutimo.” I nge kare mo kwogi-ni bikelo botgi peko, ayelayela, ki i agikkine to. Ki tungcel, jo ma giwinyo lok me ryeko ma a ki bot Jehovah dok giketo i tic i kwogi gitye ki cikke man: “Ngat ma biwinyo lokka bibedo ma ocung matek; en bibedo ma pe lworo gin marac, labongo par mo.”—Car. 1:33. w22.10 21 ¶11-13