Efii de wan dinali wan pisiten kaba, da kande ye meke moiti fu doo den maiki fu man toon wan owluman. I de kabakaba fu du a wooko di den owluman e du? Sowtu wooko den owluman e du? Den e teke fesi aini a peleikiwooko, den e go luku den baala anga sisa fu sabi fa ai go anga den, den e wooko taanga fu gi a kemeente leli. Den e gi den baala anga sisa taanga-sikin anga den sani di den e taki anga den sani di den e du tu. Neen meke a nai foondoo u te Beibel e kai den owluman ‘mannengee di sabi du son sani’ (Efe. 4:8). Sai sa du fu toon wan owluman? A ná den sani di wan sama sabi du e meke a toon wan owluman. Tei mu du wan goontapu wooko, efii sabi du den sani di a basi wani i du, yo fende a wooko. Ma sani de taa fasi tei mu toon wan owluman. A ná sabi i mu sabi peleiki efuso sabi gi leli namo daa kaba, ma i mu doo den maiki di kai a 1 Timotiyesi 3:1-7 anga Titesi 1:5-9. w24.11 20 ¶1-3

A omen sani den owluman, a kelen-owluman, a beikantoo anga den baala di e tii a wooko e soi u, fu u sa dini Yehofa moo bun. Son leisi u nai fusutan fu saide den baala e taigi u fu du son sani. Son leisi ai taanga gi u fu si den wini di wo fende te u du san den baala taki, bika kande a den fowtu di den baala e meke wawan we poti pakisei. We biibi taki a Yehofa e tii a olikanisâsi fi en, a sabi fa sani de na ala se. Efu u holi a sani ya a pakisei, wo go e aliki den baala sondee fu kuutukuutu (Heb. 13:17). Te we aliki san den baala e taki, da we yeepi a kemeente fu libi na a wan (Efe. 4:2, 3). U sabi taki den baala di e teke fesi a sondu sama, neen meke te we aliki den Yehofa o belesi u (1 Sam. 15:22). U sabi tu taki efu wan sani mu kengi, Yehofa o kengi en te a yuu fi en doo. w25.03 23-24 ¶13-14

Aini wan simpan ten we libi nownow. Ibii dei we si fa den polofeititoli fu Beibel e kon tuu. We si fa a kownu fu zuid anga a kownu fu noord e sitee anga denseefi, bika ala den tu man wani tii a hii goontapu (Dan. 11:40). We si fa a bun nyunsu fu Gadu Kownukondee e peleiki na a hii goontapu tu. Boiti dati, we si fa omen sama e kon dini Yehofa (Yes. 60:22; Mat. 24:14). We fende leli na a yuu di wi abi den fanowdu tu (Mat. 24:45-47). Yehofa e yeepi u fu fusutan kiin sowtu pelensipali sani o pasa dyonson (Odo 4:18). U sa biibi taki na a ten fu a gaan banowtu, ala wo sabi san wi abi fanowdu fu man holidoo. Wo sabi saw mu du tu fu libi na a wan aini a taanga ten de. Ma u mu holi a pakisei taki wan sani de ete di wa sabi fu a ten di e kon. w24.05 8 ¶1-2