Kuyoowa Jehova caamba kumuyanda alimwi akutacita cintu cili coonse cikonzya kumunyemya. Tuliyandide kwiiya kwiindana kuliko kujatikizya ciluzi acitaluzi, kasimpe alimwi abubeji, kutegwa tutambulike kuli Jehova. (Tus. 2:​3-6; Heb. 5:14) Kuti katubayoowa kapati bantu kwiinda mbotuyoowa Leza, tulakonzya kukasiya kasimpe. Amuyeeye kujatikizya cikozyanyo cabasikutwela bali 12, ibakaunka kuyootwela nyika eeyo Jehova njaakasyomezyede bana Israyeli. Basikutwela bali 10 bakabayoowa kapati bana Kanana kwiinda mbobakali kumuyanda Jehova. Bakaambila bana Israyelinyina kuti: “Tatukonzyi kuyoobalwana bantu aaba pe, nkaambo balaanguzu kwiinda ndiswe.” (My. 13:​27-31) Kuzilanga munzila yabuntu zintu, bana Kanana bakalaanguzu. Nkaambo aaka kakali kamasimpe. Pele kufwumbwa ooyo iwakali kwaamba kuti bana Israyeli bakali kuyoozundwa kuli basinkondonyina, kunyina naakali kuyeeya kujatikizya Jehova. w24.07 9 ¶5-6

Sena tulakonzya kuba masimpe kuti ciindi Jehova nabeteka bantu, lyoonse ucita ciluzi? Inzya! Mbubwenya Abrahamu mbwaakamvwisya, Jehova ulilondokede, nkasensa kabusongo, ngusiluse alimwi “Mubetesi wanyika yoonse.” Wakamuyiisya Mwanaakwe alimwi wakamupa mukuli wakubeteka bantu boonse. (Joh. 5:22) Jehova alimwi a Jesu balizyi izili mumoyo wamuntu uuli woonse. (Mt. 9:4) Aboobo, ciindi nobabeteka muntu uuli woonse, lyoonse bacita “ciluzi”! Aabe makanze eesu aakusyoma Jehova alimwi azintu zyoonse nzyasala kucita. Tulizyi kuti Jehova alikke nguukonzya kubeteka bantu! (Is. 55:​8, 9) Nkakaambo kaako tusiila Jehova alimwi a Mwanaakwe kuti babeteke. Alimwi tulizyi kuti Mwami wesu Jesu, uyoobaiya bausyi cakulondoka kwiinda mukutondezya bululami alimwi aluse.—Is. 11:​3, 4. w24.05 7 ¶18-19

Cilayandika kapati kuba muntu ‘waamba zyamasimpe mumoyo wakwe.’ Eeci tulacibona kuli cakacitika ciindi Filipo naakatamba mulongwe wakwe Natanayeli kuti babonane a Jesu. Nokuba kuti eeci cakali ciindi cakusaanguna kubonana a Natanayeli, Jesu wakaamba kuti: “Amubone, muna Israyeli ncobeni uunyina lweeno.” (Joh. 1:47) Natanayeli ngowakali kwiinda. Nokuba kuti Natanayeli tanaakalondokede mbubwenya mbuli ndiswe, kunyina naakali sikuupaupa ameso, muciindi caboobo, wakali kusyomeka muzintu zyoonse. Eeci cakamukkomanisya kapati Jesu alimwi wakamulumbaizya Natanayeli akaambo kabube bwakwe oobu. Bunji bwazintu zikonzya kumukkomanisya Jehova zyaambidwe ku Intembauzyo caandaano 15 zijatikizya mbotubeendelezya bamwi. Intembauzyo 15:3 yaamba kuti mweenzu mutente lya Jehova “kunyina nabejelezya muntu amulaka wakwe, kunyina nacitila mweenzinyina cintu cibi, alimwi kunyina nasampaula beenzinyina.” Kuti katubejelezya bamwi, cilakonzya kubacisa kapati.—Jak. 1:26. w24.06 10 ¶7, 9; 11 ¶10