Kunyonyoonwa kwabweende bwazintu bwachiJuda mbwakaambide Jesu bwakali bwaba aafwiifwi. MaKkristu bakeelede kubelesya chiindi chisyeede kuti babelekele kuba aabuntu buli mbuli lusyomo akulisimya. (Heb. 10:25; 12:​1, 2) Andiswe twaba aafwiifwi kuti tuswaane mapenzi aayinda ngibakaswaana maKkristu bachiHebberu. (Mt. 24:21; Chi. 16:​14, 16) Atulange-lange aamwi malayilile Jehova ngaakapa maKkristu aabo aakonzya kutugwasya andiswe mazubaano. Pawulu wakasungwaazya bakombinyina kuti banike muJwi lyaLeza. (Heb. 5:14–6:1) Kabelesya Magwalo aachiHebberu, Pawulu wakapandulwida bakombinyina mbubwakasumpukide bukombi bwachiKkristu kwiinda kutobelezya Mulawu. Alubo Pawulu wakasungwaazya maKkristu kuti bakazibe akukamvwisisisya kabotu kasimpe kamuMagwalo kuchitila kuti bakonzye kuziba njiisyo zyakubeja akuzitantamuka. w24.09 8-9 ¶2-3; 10 ¶6

Basikwiiya baJesu bakali kuyandikana kusungwaazigwa. Nkamboonzi? Bamwi bakali basiya myuunzi yabo, bamumpuli amabbizinesi aabo kuti batobele Jesu. (Mt. 19:27) Bamwi teebakali kujatwa kabotu pe akaambo kakuti bakali baba basikwiiya bakwe. (Joh. 9:22) Bakalipeda kuchincha maponeno aabo akuti bapenzegwe akaambo kakuti bakali kusyoma kuti Jesu nguwe wakali Mesiya wakasyomezedwe. (Mt. 16:16) Pesi chiindi Jesu naakajayigwa, bakali bamana manguzu nkaambo bakali babonaanga nzibakali kulangilila teezyakali kuzoozuzikizigwa pe. Jesu wakazimvwisisisya kuti nkamboonzi basikwiiya bakwe nibakawusa chiindi naakafwa. Alubo wakalikazi kaambo kakapede kuti basikwiiya bakwe bawuse kutali kuti bakawusa akaambo kakuti bakali aalusyomo luche. Nkinkaako, mubuzuba mbuboobo naakabusigwa, wakasaanguna kusungwaazya beenzinyina. Muchikozyano, Jesu wakalibonia kuli Mariya Magadalena naakali kulila kukabanda kakwe. (Joh. 20:​11, 16) Alubo wakalibonia kuli basikwiiya babili bakali kuya ku-Emawusi baambwa mumafuka aabili aakusaanguna. Alubo wakazoolibonia kumwaapostoli Petro. w24.10 13 ¶5-6

Gwasya mwanaako kuti apandulule kuti nkamboonzi nasyoma kuti kuli Mulengi. Mulakonzya kulanga-langa zyiiyo zili aajw.org zili atala akulengwa kwazintu akulisandukila kwazintu. Kuzwa waawo, ulakonzya kulekela mwanaako kuti asale nkani njakonzya kupandulwida beenzinyina kuti kuli Mulengi. Musungwaazye kuti apandulule nkani eeyo mumajwi mawuba kuti umwi muntu kayanda kuziba zyiingi atala ankani eeyo. Muchikozyano, umwi sichikolonyina ulakonzya kwaamba kuti, “Ime ndisyoma zintu nzindibona, pesi Leza nsinamubona pe.” MuKkristu wachiniini ulakonzya kusandula kuti, “Atuteedi uyobweenda musokwe kule abantu, mpawo wabona chikala, niinzi nzukonzya kuyeeyela? Kuti wayeeyela kuti chikala eechi chakapangwa aamuntu, ubonaanga tazikwe mutwe na kwaamba kuti zintu ziliwo zyakapangwa aawumwi muntu?” w24.12 18 ¶16