Ibutang ta nga nangita kag trabaho aron masuportahan ang imong pamilya. Naay duha ka trabaho nga imong gipilian. Imong gisusi ang mga detalye, sama sa klase sa trabaho, eskedyul, gilay-on, ug uban pa. Ang duha ka trabaho parehong dili supak sa Bibliya. Tingali mas gusto nimo ang usa kay ganahan ka sa klase sa trabaho o mas dakog suweldo. Pero naa pay laing mga butang nga angay nimong konsiderahon sa dili pa ka magdesisyon. Pananglitan, asa sa duha ang makatabang nimo nga dili maglisod sa pagtambong sa mga tigom? Asa sa duha ang makahatag nimog mas dakong panahon sa pag-atiman sa emosyonal ug espirituwal nga panginahanglan sa imong pamilya? Kini nga mga pangutana makatabang aron mauna nimo “ang mas importanteng mga butang”—ang imong pagsimba ug ang panginahanglan sa imong pamilya—imbes ang mas dakong suweldo. Makatabang pod ni aron makahimo kag desisyon nga panalanginan ni Jehova. w25.01 17 ¶11-13

Bisag ang uban dili maayog pagtratar nimo, makaseguro ka nga gimahal ka ni Jehova ug iya kang gipabilhan. Kon mibati kang walay pulos, hinumdomi nga naay nakitang maayo si Jehova sa imong kasingkasing, ug siya mismo ang nagkabig nimo. (Juan 6:44) Andam gyod siyang motabang nimo kay gimahal ka niya pag-ayo. Makakat-on ta bahin sa pagbati ni Jehova pinaagi sa pagkonsiderar sa ehemplo ni Jesus. Panahon sa iyang ministeryo sa yuta, gihatagan ni Jesus ug pagtagad ang mga tawo nga gipakaubos sa uban, ug nagpakita siyag kaluoy kanila. (Mat. 9:​9-12) Pananglitan, dihang ang babaye nga naglaom nga maulian sa iyang grabeng sakit mihikap sa besti ni Jesus, gihupay niya ang babaye ug gikomendahan tungod sa iyang pagtuo. (Mar. 5:​25-34) Hingpit gyod nga gisundog ni Jesus ang personalidad sa iyang Amahan. (Juan 14:9) Busa makasalig ka nga gipabilhan ka ni Jehova ug nakita niya ang imong maayong mga hiyas, apil na ang imong pagtuo ug gugma kaniya. w24.10 7 ¶4-5

Sa tibuok kinabuhi ni David, daghan siyag nasinatian nga lisod nga mga situwasyon nga nakapahilak niya. Daghan ang nagdumot niya ug giluiban pa gani siya sa pipila niya ka higala ug membro sa pamilya. (1 Sam. 19:​10, 11; 2 Sam. 15:​10-14, 30) Dihay higayon nga siya misulat: “Naluya ko tungod sa akong pagpanghupaw; sa tibuok gabii gihumod nako sa mga luha ang akong higdaanan; nabahaan ang akong kama tungod sa akong paghilak.” (Sal. 6:6) Bisan pa sa mga kalisdanan nga naatubang ni David, kombinsido siya nga gimahal siya ni Jehova. Siya misulat: “Si Jehova magpatalinghog sa tingog sa akong paghilak.” (Sal. 6:8) Ang atong teksto niining adlawa nagpakita kon unsa ka mapinanggaon si Jehova. Gibati ni David nga samag gitigom ni Jehova ang iyang mga luha diha sa usa ka sudlanan o girekord ni sa usa ka basahon. Segurado si David nga nakita ni Jehova ang iyang kasakit ug nga Iya ning gihinumdoman. Kombinsido si David nga ang iyang mahigugmaong langitnong Amahan nahibalo dili lang sa iyang naagian, kondili sa iya pong gibati tungod niana. w24.12 22 ¶11-12