Nou tout bézwen konsèy pou nou pran bon désizyon. Byen souvan, nou pouvé trapé sa konsèy-ya lò nou k’alé wè ansyen-yan ouben krétyen ki gen èspéryans. Si sa frè ké sò-ya lontan pi gran pasé nou, nou pa divèt pansé ki yé konsèy pa itil pou nou jòdla. Jéova lé nou alé wè granmoun-yan pou nou anprann bagaj ké yé. Poukisa ? Kou yé la dipi pi lontan, yé gen tan gen plis èspéryans, sajès ké entélijans ki nou. Annan lépòk Labib-a, Jéova sèrvi plizyèr granmoun pou gidé ké ankourajé so sèrvitèr. Parèkzanp, annou palé di Moyiz, David ké apot Jan. Sa mouché-ya pa viv annan menm lépòk-a é yé pa fè menm bagaj-ya. Roun tibi tan anvan yé mouri, yé bay moun ki té pi jenn bèl ti konsèy. Yé chak di kouman sa enpòrtan di obéyi Bondjé. Donk, ki nou jenn ki nou granmoun, si nou ka rouwè sa konsèy-ya sa ké bon pou nou (Rom. 15:4 ; 2 Tim. 3:16). w24.11 8 § 1-2.

Annan lépòk Noé, Bondjé défann moun manjé disan (Gen. 9:3, 4). É i roudi sa menm bagaj-a annan Lalwa i bay Israyélit-ya. Sa-ya ki pa té ka obéyi té divèt « mouri » (Lév. 7:27). Nou savé ki Jézi anprann Jwif-ya rèspèkté Lalwa Bondjé té bay yé (Mat. 5:17-19). Donk, i pa té ké janmen doumandé sa Jwif-ya manjé so lachè ni bwè disan-an ki té ka koulé annan so venn. A roun èkzanp i té ka pran, kou i té fè l’ ké roun fanm Samari. I té di l’ : ‘Dlo mo ké bay[-a] ké […] bay lavi pou tout-tan’ (Jean 4:7, 14). Jézi pa té lé di ki pou i té pouvé gen lavi pou tout-tan, madanm-an té divèt bwè roun dilo èspésyal. Menm fason-an, i pa té ka di moun-yan ki té Kafarnaòm ki yé té divèt manjé so lachè épi bwè so disan vré pou yé té pouvé gen lavi pou tout-tan. w24.12 9 § 4-6.

Mari-ya divèt panga wè madanm-yan kou monn-an ka wè yé. Poukisa ? Pas sa roun moun ka mété annan so lidé a sa i ka fè apré. Apot Pòl avèrti krétyen wen-yan ki té ka rété Ròm. I di yé « pa lésé monn-an fòrmé » yé (Rom. 12:1, 2). Sa té ka fè roun ti moman asanblé Ròm té fèt lò Pòl ékri yé. Mé sa apot-a di ka fè nou konprann ki sèrten annan sa asanblé-a té ka réfléchi kou monn-an toujou. A pou sa Pòl di yé chanjé fason yé té ka réfléchi ké aji. Jòdla osi, mari-ya divèt kouté sa konsèy-a. Malérèzman, sèrten annan yé ka lésé monn-an détenn asou yé é yé ka malmennen yé madanm. w25.01 9 § 4.