Bazere, murheganye abana benyu bamenye gurhe bakafasiriya obwemere bwabo oku bilolere Omulemi. Wakabona oku bili by’akamaro woyo n’abana bawe mulole emyazi oku jw.org ederhere oku bilolere obulemi n’empindamuko. Naho omwana wawe akachishoga mafasiriyo malebe akakolesa omu kufasiriya abandi bamenye oku haba Omulemi. Muganire kw’amola mafasiriyo haguma n’omwana wawe. Omuhebe omurhima akolese amafasiriyo mayorohere manayunvikene amango hali omuntu wayemerere baganire oku bilolere mwazi gulebe. Omufano, owabo mwanafunzi akaderha ntya: “Imba nchizerere ebinambona byonyine, nta mango nabwene ku Mungu.” Omwana oli Mukristu akamushubiza ntya: “Ba nka wawaza oli walambagira omu muzirhu guli hale n’ah’abantu balamire, wanabugana echisima chiyumbakirwe n’amabale. Gurhe wakawaza? Hakwanene kuba eyi hali muntu mulebe wayumbakaga echola chisima. Kweri ntyo kon’oko oku bilolere egulu n’ebintu byoshi bilamire biliko, hakwanene kuba omuntu wabilemaga!” w24.12 buk. 18 chi. 16

Rhweshi rhukenere obwerekezi yi rhurhola esimikiro z’akamaro omu kalamo. Rhwakapata obola bwerekezi kugerera abashamuka omu chibaga changwa abandi Bakristu bakulire ekiroho. Akaba bakala bashajire rhurhakaderha okw’amahano mabo namo mashajire. Yehova alonzeze oku rhuyige kugerera abakala bakulire. Bagerere mu binene kurhulusha, bamenyere binene, banagwerhe obwengehe. Omu mango e Biblia yaliri yayandikwa, Yehova alikoleseze abalume bemena bashajire omu kuheba omurhima n’okuyerekeza abantu bage. Rhuganire oku mufano gwa Musa, Daudi, n’entumwa Yohana. Balilamire omu mango n’omu hali zirhali kuguma. Amango baliri hofi kufa, bahereza abachili misole amahano m’obwengehe. Buli muguma mw’abola balume aliyerekene akamaro k’okukenga Mungu. Rhube misole changwa rhukala rhushajire, rhwakayunguka kugerera amola mahano mabo.​—Ro. 15:4; 2 Ti. 3:16. w24.11 buk. 8 chi. 1-2

Omu siku za Nowa, Mungu alibuzize abantu kulya eshagama. (Mwa. 9:3, 4) Kandi buzinda Yehova alibwirire Abaizraeli oku barhakwanene kulya eshagama. Buli yeshi wakalire eshagama “alikwanene kuyirhwa.” (Law. 7:27, amahugulo m’eshishi) Yesu alishigikire eyola Sheriya. (Mt. 5:17-19) Bobola birhakagalikene oku Yesu abwire abola Bayahudi kamama oku balye omubiri nyamubiri gwage changwa kunywa eshagama nyashagama yage. Yesu aliri aderha omu njira y’omufano kuguma n’okwajiraga embere waho amango abwira omukazi w’Omusamariya ntya: “Amenji namuha . . . mamulerhera akalamo k’esiku n’amango.” (Yoh. 4:7, 14) Yesu arhaliderhere ok’oyola mukazi w’Omusamariya akapatire akalamo k’esiku n’amango bulala anywere oku menji m’olwinji konyine. Intyo kon’okola, Yesu arhaderhaga okw’abantu kamama be Kapernaumu aganiraga nabo bakapatire akalamo k’esiku n’amango nka balyaga omubiri nyamubiri gwage changwa kunywa eshagama nyashagama yage. w24.12 buk. 9 chi. 4-6