Omu siku za Nowa, Mungu alibuzize abantu kulya eshagama. (Mwa. 9:3, 4) Kandi buzinda Yehova alibwirire Abaizraeli oku barhakwanene kulya eshagama. Buli yeshi wakalire eshagama “alikwanene kuyirhwa.” (Law. 7:27, amahugulo m’eshishi) Yesu alishigikire eyola Sheriya. (Mt. 5:17-19) Bobola birhakagalikene oku Yesu abwire abola Bayahudi kamama oku balye omubiri nyamubiri gwage changwa kunywa eshagama nyashagama yage. Yesu aliri aderha omu njira y’omufano kuguma n’okwajiraga embere waho amango abwira omukazi w’Omusamariya ntya: “Amenji namuha . . . mamulerhera akalamo k’esiku n’amango.” (Yoh. 4:7, 14) Yesu arhaliderhere ok’oyola mukazi w’Omusamariya akapatire akalamo k’esiku n’amango bulala anywere oku menji m’olwinji konyine. Intyo kon’okola, Yesu arhaderhaga okw’abantu kamama be Kapernaumu aganiraga nabo bakapatire akalamo k’esiku n’amango nka balyaga omubiri nyamubiri gwage changwa kunywa eshagama nyashagama yage. w24.12 buk. 9 chi. 4-6

Abalume b’Abakristu bakwanene kuchilanga yi barhagwarha amawazo mabi oku bilolere abakazi. Bulagurhe? Bulala mpanvu nguma eli okw’ebijiro by’omuntu binarhengana n’eby’ali awaza. Entumwa Paulo alihere Abakristu bashigwa omukonge b’omu Roma oku “barhachiyemeraga babumbwa n’ebintu bya linola gulu.” (Ro. 12:1, 2) Amango Paulo abayandikira, abantu ba mw’echola chibaga bali bamamala myaka minene eyi bali Bakristu. Kweri ebinwa bya Paulo byaliyerekene oku baguma mw’echola chibaga balichili bashumikwa n’emigenzo n’amawazo ma linola gulu. Echola che charhumaga ababwira oku bakwanene kuhindamula amawazo n’olugenzi lwabo. Na zene elyola hano lichili ly’akamaro oku balume b’Abakristu. Ech’okugayisa, baguma mubo bashumikirwe n’amawazo m’egulu na chiro banakolera bakabo kubi. w25.01 buk. 9 chi. 4

Zene, abashamuka bagwerhe binene by’okukola. Banakola akasi k’okuhubiri. (2 Ti. 4:5) Banayerekana omufano gwinja omu kuhubiri n’obushiru, banapanga akasi k’amahubiri omu eneo y’echibaga n’okurhukoomeza kuhubiri n’okuyigiriza bwinja. Banakola nka bazuzi banacha emanja omu njira y’obubabale na buzira kabolo. Amango Omukristu amakola echaha chikomere, abashamuka banajira okwabo koshi yi bamurhabala ashube agalule obwira bwage bukomere haguma na Yehova. Mw’akola kasanzi kan’ako, banajira okwabo koshi y’echibaga chiyorha chichere. (1 Ko. 5:12, 13; Gal. 6:1) N’echindi ch’akamaro, baba bamenyikene oku baba bangeri. (1 Pe. 5:1-3) Banageza amajambo mayumangire oku Biblia marheganyizwe bwinja, banachihangana kumenya buli muntu bwinja, n’okukola akasi k’obulagizi. Bashamuka baguma banakola omu kasi k’okuyumbaka, na k’okukwiziza Echumbi ly’Obwami, okurheganya embuganano zikulu, omu Komite y’Obunvikane n’Ebitaro, banakola omu Bigusho by’Okurhangula Abalwala, n’omu mandi makasi. Abashamuka banakola bwenene eju yerhu! w24.10 buk. 20 chi. 9