Etu kitwatokala ngo kubhanga nguzu phala kukula mu nzumbi, maji we twatokala kusuluka mu kulanga o ukexilu yu. Mukonda dya kiki, twatokala kudilanga phala kitubanze kwila twakulwetu kya mu nzumbi, ni kwila kitwabhingi dingi kukolesa o ukamba wetu ni Jihova. (1 Ko. 10:12) Etu twatokala kusuluka mu “ku di tonginina” mudyetu phala kumona se twamusukula mu kukula mu nzumbi. Mu mukanda we ku akwa Kolose, Phawulu walondekesa dingi kwila twatokala kusuluka mu kukula. Sumbala akwa Kolese exile kya Jikidistá jakudile mu nzumbi, o poxolo Phawulu wa atangela phala kudilanga, phala ka anganale ku ixinganeku ya akwa mundu. (Kol. 2:​6-10) Epafala, wejidile kyambote o athu atokalele mu kilunga kyenyokyo, wexile musamba kyavulu, phala ene asuluke mu kukala Jikidistá jakulu mu nzumbi. (Kol. 4:12) Ihi itwadilongo? Phawulu ni Epafala, ejidile kwila phala kusuluka mu kukula mu nzumbi, kwabhingi kubhanga nguzu, kwabhingi we o kikwatekesu kya Nzambi. Ene a mesenene kwila o akwa Kolose asuluka mu kukula mu nzumbi, sumbala ni ibhidi yexile mudibhana-nayu. w24.04 6-7 §16-17

Kyoso ki tukala ni woma wa Jihova, tu muzola kyavulu ni kwila tubhanga yoso itutena phala kitubhange kima kimuluwalesa. Twala ni hanji yavulu phala kwijiya o kima kyawabha ni kima kya ibha, ni kutungula o kidi ni makutu phala Jihova na tuxikine. (Jisa. 2:​3-6; Jih. 5:14) Se o woma wetu ku athu ubeta dingi kota kwa Jihova ndenge, kiki kitena kutusandula mu kidi. Tumone o phangu ya 12 kya alondi ayile mulonda o ixi ya kanene Jihova kubhana ku akwa Izalayele. O woma wa alondi wa betele dingi kota o henda yá kwa Jihova ndenge. Ene ambe ku akwa Izalayele: “Ki tu tena kubanda mu kúlwa ni kifuxi kyókyo ene a tu tundu mu nguzu.” (Dya. 13:​27-31) Bhu pholo ya athu o akwa Kanana exile dingi ni nguzu o akwa Izalayele ndenge, kiki nange kidi. Maji mukuzwela kwila o akwa Izalayele keji tena kutolola o jinguma jâ o muthu wexile muzwela kiki kexile mubanza kwa Jihova.

O kwila tutena kuxikina ni kidi kyoso kuma, mu kufundisa o athu, Jihova ithangana yoso ubhanga o kima kyatokala? Kyene, tutena! Kala kyaxikinine Mbalahamu, Jihova mwene o mufundixi wayuka, wabeta-kota mu unjimu ni henda, mu ngongo yoso. Mwene walongo kyambote Mon’e, yu wamubhana o kikalakalu kya kufundisa o athu oso. (Nzw. 5:22) Jihova ni Jezú, ejiya kyambote o mixima ya athu. (Mat. 9: 4) Kyenyiki, ene anda fundisa jinga muthu ni muthu ni “kuyuka”! Tu sulukyenu jinga mu kudyelela kwa Jihova ni mu ukexilu we wakubhanga o ima. Twejiya kwila etu kitwala ni kutena kwa kufundisa, maji mwene wala naku! (Iza. 55:​8, 9) Mu kiki, etu twehela o kufundisa kwoso bhu maku ma Jihova ni ma Mon’e Jezú, o Sobha ukayela o kuyuka ni henda ya Tat’e. —Isa. 11:​3, 4. w24.05 7 §18-19