Xinganeka mu kifika kiki. Eye wamusota salu phala kukwatekesa o mwiji we. Kumoneka salu jiyadi. Eye utonginina se o salu yalungu ni ihi, se phala kukalakala kwebhi ni ithangana ikuxi iwanda bhita ku salu yiyi. Mukidi o Bibidya ki ifidisa o salu jiji jamoneka. Nange eye wanda sola o salu i wa wabhela dingi, mba o salu mwanda kufuta kitadi kyavulu. Maji watokala kuxinganeka mu ima yengi ande dya kusola. Mukifika, o kwila o salu yiyi yanda ngifidisa kuya mu yonge? O kwila o kithangana ki wanda bhita ku salu yanda kwatekesa o mwiji we kusanguluka kumwenyu ni kuzukama dingi kwa Jihova? O kudibhanga o ibhwidisu yiyi yanda ku kukwatekesa kuta ku pholo “o ima ya beta dingi kota,” kala o ubhezelu we ni kulanga o ibhindamu ya mwiji we. O kukala ni kitadi kyavulu ndenge. Kyenyiki sola ni unjimu, Jihova wanda kubesowala. w25.01 17 §11-13

Ne mwene se akwenu akutalatala kyayibha, ejiyakyu kwila Jihova wamono ima yambote ku muxima wê, mukonda dya kiki wakusolo phala kumubheza. (Nzw. 6:44) Mukiki se wala ni kikote ku muxima, ejiyakyu kwila Jihova wakuzolo kyavulu ni kwila wanda kukwatekesa jinga. Jezú wakayela kyambote o idifwa ya Tat’ê Jihova. (Nzw. 14:9) Phala kwijiya se Jihova watuzolo mba kana twabhingi kudilonga o phangu ya Jezú. Kyoso kyexile mu ixi mwene wakwatela henda ku athu exile mwaxongwena. (Mat. 9:​9-12) Sayi kizuwa, kwamoneka muhatu wexile ni uhaxi wabhonzo, o muhatu wakwata mu izwatu ya Jezú. Mwene wabhangele kiki mukonda wejidile kwila ne mwene wakwatele ngo mu izwatu ya Jezú weji disanza. Jezú wamuximana mu ima yoso yabhange mwene. (Mál. 5:​25-34) Kyenyiki Jihova wejiya kwila eye wala ni kixikanu kwa mwene, mukonda dya kiki mwene wakuzolo kyavulu. w24.10 7 §4-5

Kumwenyu we woso Davidi wadibhanene ni ibhidi yamubhangesa kudila. Athu avulu amuzembele, kate mwene o makamba mê ni amoxi ku jindandu je amulungulukila. (1 Sam. 19:​10, 11; 2 Sam. 15:​10-14, 30) Sayi kizuwa mwene wambe: “Nga bhwila kyá mukonda dya kukema kwami! Usuku ni usuku hama yami ngi i betesa; ila mwene kyololo ni masoxi!” (Jisá. 6:6) Sumbala ni ibhidi ya dibhanene nayu Davidi, mwene wadyelele kwila Jihova wa muzolele kyavulu. Mwene wasoneka: “Jihova wa ng’ivu kyá dízwi dyami dya kudila.” (Jisá. 6:8) O izwelu yiyi mu velusu ya lelu ilondekesa kwila Jihova watuzolo kyavulu. Davidi wambe kwila kyedile kala Jihova wexile mu bhongolola o masoxi me ni kwabhaka mu mbinda mba kusoneka divulu dyalungu ni masoxi me. Davidi wadyelele kwila Jihova wexile mu mona o hadi ye yoso. Davidi wejidile kwila Jihova wexile mu mona kyebhi mwene kyexile mudivwa mukonda dya ibhidi yexile mudibhana nayu. w24.12 22 §11-12