Enu visemi, kafwenu mwanenu apwenga wakulizanga kulumbunwina vakwavo ovyo vyamulingisa afwelele ngwenyi kwatwama Tengi. Chinahase kupwa chamwaza kuhitulukila hamwe vihande vize vyatwama ha jw.org hachihanda chakwamba ngwavo “Young People Ask—Creation or Evolution?” Kufumaho, shimutwilenu namwanenu chishina chize munamono ngwenu chinahase kumukafwa kukunyula vakwavo vevwishise muchano hali Tengi. Mukolezezenu ahanjikenga mukavatu, kaha nawa mujila yakwivwakana, kachi nge kuli vatu vamwe vaze vanakusaka kwivwilila kuchihande kana. Chakutalilaho, mukwavo muka-shikola nahase kuhanjika ngwenyi: “Ami ngwafwelela kaha vyuma vize ngweji kumonanga, kaha kanda lyehi ngumonengaho Kalunga.” Muka-Kulishitu wakanyike nahase kukumbulula mutu kana ngwenyi: “Achishinganyeke nge uli nakutambuka mumusenge wakwakusuku navatu, kaha hinauwana lishima lize lili nakuzata. Vyuma muka naushinganyeka? Kachi nge kupwako chalishima kana nachikuhana unjiho wakusolola hatoma nge, kwapwile mutu alifulile, kahanyi kumana navyuma vyatwama hano hamavu kwatwama mutu avitengele.” w24.12 18 ¶16

Tuvosena twasakiwa kututwaminyina hakusakula kulinga vyuma vyavilemu mukuyoya. Kaha vatu vanahase kututwaminyina shina vakulwane muchikungulwilo navaka-Kulishitu veka vakuhya kushipilitu. Kachi nge vatu kana vanakolo chikuma kutuhambakana etu, kaha katwatela kukana hahaze vene vyuma navatulweza nakushinganyeka ngwetu vyaseka lyehiko. Yehova asaka tulinangule kuli vakulwane, mwomwo vanapunga nalwola lwaluvulu lwakulinangula vyuma, nakupwa nakunangakana namangana. Kushikulu, Yehova azachishile vakulwane vakushishika mangana akolezeze nakutwaminyina vatu jenyi. Chakutalilaho, achishinganyekenu hali Mose, naNdavichi nakaposetolo Yowano. Ava malunga vayoyele halwola lwakulihandununa, kaha nawa chiyoyelo chavo chapwile chakulihandununa chikuma. Omwo vapandamine kwakamwihi nakufwa, vahanjikilenga mazu amwenemwene akuhuhumuna vakweze. Mutu himutu hali ava malunga, ashindakanyine hakulema chakwononoka Kalunga. Shikaho numba tupwa tuvanyike chipwe tuvakulwane, tunahase kunganyala hakukekesa mazu kana awa akuhuhumuna.—Loma 15:4; Chimo. 2, 3:16. w24.11 8 ¶1-2

Mumakumbi aNowa Kalunga akanyishile vatu kulya manyinga. (Kupu. 9:3, 4) Lushimbi lwambile ngwalwo, mutu uze mwalya manyinga “vamujihe.” (Levi 7:27, kwinyikila chamwishi) Yesu akundwijile lushimbi kana. (Mateu 5:17-19) Shikaho, kachi chapwile chakuhenga Yesu kukolezeza liyongomena lyavaYuleya valyenga nyama chipwe vanwenga manyinga mumishisa yenyi. Yesu apwile nakuhanjika mujila yachifwanyisa, ngana muze alingile hakavanga omwo ahanjikile napwevo wakaSamaliya nakwamba ngwenyi: ‘Meya aze ngweji kuhananga ami nawalumuka kupwa kaselwoke kameya akuyoya chahaya myaka yosena.’ (Yowa. 4:7, 14) Yesu kapwile nakuhanjika ngwenyi pwevo wakaSamaliya nahase kuyoya haya myaka yosena, kachi nge mwanwa meya aveneko. Chochimwe nawa, omu apwile nakuhanjika kuli vatu vaze vapwile kuKapelenau kapwile nakulumbununa ngwenyi vanahase kupwa nakuyoya chahaya myaka kachi nge navalya nyama yenyi nakunwa manyinga enyiko. w24.12 9 ¶4-6