LyaMande, September 28
Mufumisenu owo muka-kuhuka muli enu.—Koli. 1, 5:13.
Nge mutu kapihililile nakwalumukako, kaha veji kumufumisanga muchikungulwilo mwomwo mutu kana nakane kupihilila nakwalumuka, chamokomoko nakumukafwa mapapa kakavulu kuli vakulwane. (Vamya. 2, 17:12-15) Vilinga vyenyi vinasolola hatoma nge, nalisakwila kuhona kukavangiza jishimbi jaYehova. (Lushi. 30:19, 20) Veji kuvilikanga kuchikungulwilo mangana valweze chikungulwilo ngwavo mutu kana keshi cheka Chinjiho chaYehovako. Kavalinga chuma kana mangana vevwise sonyi uze nalingi shiliko. Oloze veji kuvilikanga mangana chikungulwilo chikavangize lushimbi lwamuMbimbiliya luze lwatukanyisa ‘kulikata nenyi’ ‘chipwe vene kulya nenyi.’ (Koli. 1, 5:9-11) Kuli vyuma vyamwaza vize vyalingisa Yehova atuhane lushimbi kana. Kaposetolo Paulu asonekele ngwenyi: “Chimbalwila chachindende cheji kufutunwisanga muunga wosena.” (Koli. 1, 5:6) Mutu uze mwahona kupihilila nakwalumuka nahase kuzeyesa vakwavo vaze vali nakuzata nangolo vayoye kweseka najishimbi jaYehova jakwoloka.—Vishi. 13:20; Koli. 1, 15:33. w24.08 27 ¶3-4
LyaChivali, September 29
Ngunajikiza muvyuma vyosena kuhichila muli ou eji kunguhananga ngolo.—Fwili. 4:13.
Twatachikiza vene ngwetu katweshi kuhana ngolo vakwetuko. Oloze tunahase kuzachisa ngolo jetu mangana tuvakafwe. Chakutalilaho, tunahase kukafwako ndumbwetu wakashinakaji chipwe uze aviza hakuya nakumulanjilako vyuma kuvitanda chipwe kumuzachilako milimo yahakanda chipwe kulisuula kuya nakuwahisa haZuvo yaWangana. Anukenu ngwenu mazu tweji kuhanjikanga akwechi ngolo. Kutala muli nakwanukako mutu umwe uze anganyalile mwomwo yakumusangejeka tahi? Kutala munatachikizako mutu umwe uze anakusakiwa kumuvendejeka tahi? Kala mweshomwo vili vyuma, fwilenu kuwanako jila yakuya nakuhanjikilamo namutu kana. Munahase kutambukila mutu kana, chipwe kumutumina shinga, chipwe pamo kumutumina kati, chipwe kumusonekela mukanda, chipwe kumutumina mujimbu hashinga. Kamwatela kulizakamina hali ovyo mwatela kuhanjikako. Mazu amandende akufuma kumuchima aze namuzachisa anahase kupwa himazu aze ndumbwenu mwasakiwa mangana atwaleho lika kupwa wakushishika chipwe kupwa wakulihehwa muukalu ali nakuhitamo.—Vishi. 12:25; Efwe. 4:29. w24.09 28 ¶8-10
LyaChitatu, September 30
Kachi nge mutu ali nakusaka kupwa kalama, kaha ali nakufwila mulimo wamwenemwene.—Chimo. 1, 3:1.
Nge mwapwa muvaka-kuzachila, kaha tunafwelela ngwetu munakuzata nangolo mangana mupwenga namihako yize yasakiwa mangana mutengamo kupwa vakulwane muchikungulwilo. Kutala muli nakufwila kuzata ‘mulimo kanou wamwenemwene’ tahi? Uno vakulwane muchikungulwilo veji kuzatanga milimo muka? Veji kutwaminyinanga mulimo wakwambulula, nakuya nakufunga, nakunangula nakukolezeza vikungulwilo kuhichila mumazu namuvilinga. Echi chikiko chalingisa Mbimbiliya yivuluke ava vakulwane vasamalikita kupwa ‘malunga vaze vapwa wana.’ (Efwe. 4:8) Vyuma muka navimikafwa mutengamo kupwa vakulwane muchikungulwilo? Kutamo kupwa vakulwane muchikungulwilo chalihandununa nakutamo kuzata milimo yakukaye. Kakavulu, kuzata milimo yakukaye kuvanga utesemo uhashi umwe uze mwasaka mutu uze ali nakusaka kumingisa milimo. Oloze kutamo kupwa mukulwane muchikungulwilo, mwatela kupwa vaka-kwambulula mujimbu wamwaza nakupwa nauhashi wakunangula. Hakusaka mutengamo kupwa vakulwane muchikungulwilo, mwatela kutesamo vyuma vize vavuluka hali WaChimoteu 1, 3:1-7 naWaChituse 1:5-9. w24.11 20 ¶1-3