Je David tsee kjoa jaʼatojin xi ba tsakʼé kon kʼoa kiskiʼndá. Nkjín chjota xi jtike koan, tijéni xínkjín kao miyole kitjenngike kʼoa koanmele kisikʼien (1 Sam. 19:​10, 11; 2 Sam. 15:​10-14, 30). Je David i kitso: “Jekichobena nga tikjiʼndá; je ndáxkoan ñaki síkaʼnyi nachanna nga kjiʼndá nga njio” (Sal. 6:6). Ningalani tse kjoa jaʼatojin David ñaki tsakʼéjngo kon nga tsjoake je Jeobá. Itso xi kiski: “Je Jeobá kjuinrʼoé nga tikjiʼndá” (Sal. 6:8). Jmeni xi tso texto jebi bʼéjngoo tokoán nga tsjoakená Jeobá kʼoa nga mandosinle josʼe tokoán. Je David kʼoakitso nga je Jeobá yaa bʼéya jngo xjoa̱ je ndáxkoaan kʼoa jngoo libro bʼétʼa. Ñaki tsakʼéjngo kon nga kuenta kisʼin Jeobá je kjoa xi jaʼatojin kʼoa nga koanjinle jokisʼe kon kʼianga kjoañʼai tíjnajin. w24.12 22 párr. 11, 12

Machjén nga tosi tonda kʼoénelee yaoná nga nda kuiyoaa ngixko̱n Niná kʼoa nga si̱miyoaa (1 Cor. 10:12). Nʼio chjíle nga kjitʼa si̱kjaʼaitsjenjiaan tsa kʼoatinʼia. Kʼianga kiskile Pablo je chjotale Cristo xi Colosas tsʼe kʼoakitsole nga tsín koa̱n tokʼoejngo kon, nga nʼio chjíle nga tosi tonda kʼoenele yaole nga nda koatio ngixko̱n Niná. Kʼoakitsole nga katasíkuinda yaole ánni nga tsínkui kʼoanachanile je kjoachjine xi tjín sonʼnde (Col. 2:​6-10). Je Epafras tsakʼétsʼoantjai nga tosi tonda simiyo Niná (Col. 4:12). Je Pablo kao Epafras bení nga je Jeobá koasenkaoná nga nda kuiyoaa ngixko̱n kʼoa nga kʼoati tjínnele nga kʼoénelee yaoná. Je Pablo kao Epafras kui xi koanmele nga tosi tonda kʼoakisʼin je chjotale Cristo xi Colosas tsʼe ningalani tse kjoa jaʼatojin. w24.04 6 párr. 16, 17

Nga nokjonchá Jeobá kui xi tsonile nga tsjoachaa kʼoa nga tsínkʼia kui kʼoasʼiaan jmeni xi tsín sasénle. Kʼianga nda kuiyoaa ngixko̱n, machjén nga kataʼyaa jméni xi ndatjín kʼoa jméni xi chʼaotjín. Kʼoati machjén nga jchaa jméni xi ñaki kʼoatjín kʼoa jméni xi to énndiso (Prov. 2:​3-6; Heb. 5:14). Tsa je chjota ngisa kuijkónlee tikʼoajinni je Niná, chanjin tsín tikoa̱nkjainniná nga koa̱nle kʼoasjentjainá Jeobá. Si̱kjaʼaitsjenjinla jokoan je xi 12 chjota xi kikotsenché ya ʼnde jñani kʼoakitsole Jeobá nga tsjoále chjota israelita. Je chjota xi te mani alikui tsakakó nga tsjoake Jeobá, tosaa je kitsokjonle chjota cananeo. I kitso: “Alikui koa̱n kjuinrʼoe chjota jebi nga̱ ngisaa taja tikʼoajinni ñá” (Núm. 13:​27-31). Kjoaixi nga tse nganʼio kisʼele chjota cananeo, tonga nga kʼoakitso chjota israelita nga tsín sikinjele chjota jebi yaa tsakakóni nga tsín je Jeobá kisinʼiotʼa. w24.07 9 párr. 5, 6