Hiiva pooti waneetthucereehu ifayita urinaaya ukhala atthu ookhuluvelya niitthu yaakhumelenle ukati Yesu wancuwenlyaawe ikwaha yoopacera Natanaeli. Ukati Filipe wancuwelihilyaawe Yesu mpatthannyaawe Natanaeli, yahokhumelela itthu yomaana. Waahookhalaru wiira Yesu khancuwela saana Natanaeli, uyo aheera: “Ula khanle nsarayeeli eekhweeli, nlattu wo uyo khuuvo wootha.” (Joau 1:47) Yesu ahomoona Natanaeli ukhala ntthu ootepa ukhuluvelya. Khampa hiiva, Natanaeli ciicammo aari ntthu oopahuwa. Masi uyo khootha, uhiya commo, uyo aari okhuluvelya wocitthu cotheene. Yesu ahookhala ootteeliya nlattu wo iyo itthwiiyo ni ahonttottopela Natanaeli. Malakihero amphwanyannya nhina Isaalimu 15 annikavihera untteliha nrima Yehova, anaavaranaca nimananna ninaawacereehu atthu akhwaawe. Isaalimu 15:3 ineera wiira aletto a Yehova “Khammootherya nkhunanawe ninlimi nawe, khanompanka nkhunanawe hataa itthu yootakhala ni khanwoonihiihaca ihaaya asipatthannyaawe.” Hiiva namootheryeeka ntthu, pooti wiiriha atthu uriipiya nrima ni Yehova uhitthuna wiira nikhale alettwaawe.—Tiya. 1:26. w24.06 ipaag. 10 iparaag. 7, 9; ipaag. 11 iparaag. 10

Nyuuva mweetthenkacaka saana nhinarwa wuulalyeerani, khunhala wuurikelani uwuulumana atthwaayo. Yesu, ahaatthenkaca attharyaawe hinaaruma wuulalyeerani. (Luka 10:1-11) Ayo, yaheettela citthu cotheene Yesu caawiitthucihilyaawe. Phimaana, ayo yahotteeliya venci nlattu wo citthu cotheene caakhitinryaaya upanka. Ninhala wiitthenkaca cani? Hiiva nihaana wuupuwela isiyani ninrweehu wuuluma ni nimananna owuuluma wiira nuulume khampa cinoolumaceehu khula nihuku. Ciicammo, ikhanle itthu yofayita wuupuwela citthu piili awula tthaaru comananna cinaakhulaaya atthu oncoko unkhaleehu ni ukhalana mmuru itthu inhaleehu waakhula wo khula itthu. Vano, waphiyaka ukati woomuulumana ntthu, khaninhala woova, ninaahala uthyaa ni ukhala ntthu oopatthanannya. w24.04 ipaag. 16 iparaag. 6-7

Itthu yofayita cinene inniiriha ulalyeera ihapari comaana ukhalaka wiira ninanfenta Yehova ni ncina nawe. Ulalyeera ikhanle inanna yonttitthimiha Nluku ninonfenteehu. Hi ninaakupali ninrimeehu wotheene itthu inhimyaaya malayikha ookhuluvelya wiirimu, aneera co: “Thi weeva Yehova Nlukwiihu, unoophwanela uttitthimihiya, uhisimiya ni ukhalana ikuru.” Hi ninanhisima ni ninanttitthimiha Yehova ukati ninaahimeryeehu atthu wiira uyo phumpile citthu cotheene ni ciicammo phinivahile ukumi nirineehu. Hi ninanvaha Yehova itthu inkhitiriihu nivarelaka nteko ukatiihu,—ikuru cihu ni citthu cirineehu wiira nikavihere ntekwaawe. (Mat. 6:33; Luka 13:24; Akol. 3:23) Nimoolumacero vakaani, hi unaanicivela umuuluma Nluku ninonfenteehu. Hiiva ciicammo unaanicivela waahimerya atthu akhwaawe ncina na Yehova ni makhalelwaawe. w24.05 ipaag. 17 iparaag. 11