Moneki tikitasej tlaj tlen timoiljuiaj mouika ika tlen Biblia kiijtoua. Ma timoiljuikaj ipan se telpokatl katli amo motemachia tlaj Jehová nelnelia kiiknelia. ¿Kinamiki moiljuijtos san ipan nopa tlamantli? Amo, moneki kipouas Biblia pampa nopa kipaleuis ma kimati tlake moiljuia Jehová. Kema tijpouaj Biblia, kejuak tijkauaj Jehová ma techkamanaljui. Pero tlaj tijnekij tijkakisej tlen techiljuis, moneki tijchiuasej se tlamantli. Moneki tijtemosej textos tlen techpaleuis ma tijsenkauakaj tlen techtekipachoua uan nojkia moneki tijtekiuisej tlen Jehová itlanechikol kichijchijtok para ika ma timomachtikaj (Prov. 2:3-6). Nojkia moneki tikiljuisej Jehová ma techyakana kema timomachtisej uan kiampa tijpantisej tlen tijnekij tijmatisej. Uan ma tikitakaj tlake textos uan tlamachtili uelis techpaleuis ipan nopa kuesoli tlen tijpiaj. w24.10 25 párrs. 4, 5

Jehová amo kema kiteochiuas tlen kichiuaj maseualmej katli moueyimatij uan san kinekij pankisasej (1 Cor. 10:24, 33; 13:4). Jesús iuampoyouaj nojkia kiampa kinpanok pampa kichijkej kampeka ma kintekimakakaj para pankisasej. Santiago uan Juan, katli eliyayaj apóstoles, kiiljuijkej Jesús ma kintekimaka ipan iTlanauatijkayo. Pero Jesús amo kuali kiitak tlen kitlajtlanijkej, yeka kiniljuik nopa 12 apóstoles: “Katli kineki kipias tlanauatili, moneki kintekipanos sekinok uan katli kineki tlayakanas, moneki elis inintlatekipanojka sekinok” (Mar. 10:35-37, 43, 44). Toikniuaj katli kichiuaj kampeka tlatekipanosej ika nochi ininyolo, tlauel kinpaleuisej toikniuaj ipan tlanechikoli (1 Tes. 2:8). w24.11 15, 16 párrs. 7, 8

Tlaj titeikneliaj, kema tijnekisej tijtlapejpenisej tlen tijchiuasej, techpaleuis ma timoiljuikaj “tlen kinpaleuis sekinok” uan nojkia kuali ma tijtlapejpenikaj kej timoyejyekchiuasej (1 Cor. 10:23, 24, 32; 1 Tim. 2:9, 10). Kiampa tlen tijtlapejpenisej kinextis tikinikneliaj uan tikintlepanitaj sekinok. Tlaj tijtlapejpenis se tlamantli tlen tlauel ipati, xikita tlake moneki tijchiuas para kuali ma kisa. Jesús techmachtik tlaj tijnekij tijchiuasej se tlamantli achtoui ma tikitakaj “tlaj kiaxilis” tlen tijtekiuisej (Luc. 14:28). Yeka, ximoiljui keski tonali tijtekiuis, keski tomij monekis uan tlake moneki tijchiuas para kuali ma kisa tlen tijtlapejpenik. Kemantika monekis tikamanaltis ininuaya mochampoyouaj para kiitasej kenijkatsa uelis mitspaleuisej ika tlen tijtlapejpenik. ¿Kenke moneki kiampa tijchiuas? Pampa nopa mitspaleuis tikitas tlaj monekis tijpatlas se keski tlamantli o tijtlapejpenis seyok tlamantli tlen más kuali. Nojkia tlaj kuali tikintlakakilia, kinekisej mitspaleuisej para kuali ma kisa tlen tijneki tijchiuas. w25.01 18, 19 párrs. 14, 15