Ta tlauel tikiknelia Jehová uan tijneki tikinpaleuis toikniuaj. ¿Tlake mitspaleuis para tijnekis más titlapaleuis ipan tlanechikoli? Uelis timoiljuis kenijkatsa tiyolpakis kema tikinpaleuis toikniuaj. Jesús kiampa kiijtok: “Más tiyolpakis kema titemakas se tlenijki uan amo kej kema tijselis” (Hech. 20:35). Ya nochipa moyakanki ika ni texto, yeka tlauel yolpakiyaya kema kinpaleuiyaya sekinok. Uan ipan Marcos 6:31-34 tikitaj kenijkatsa Jesús yolpakiyaya kema kinpaleuiyaya sekinok. Ipan nopa tonali kema Jesús uan iapóstoles tlauel siajtoyaj, yajkej sejkanok para mosiajkauasej. Pero miakej maseualmej tlayakankej uan achtoui asitoj que inijuantij, pampa kinekiyayaj kitlakakilisej tlen Jesús tlamachtiyaya. Ya ueltoskia kiniljuis amo kinmachtis pampa ya uan iuampoyouaj “amo kipiayayaj tonali yon para tlakuasej”. Nojkia ueltoskia san kinmachtis se o ome tlamachtili uan kiniljuijtoskia ma tlakuepilikaj ininchaj. Pero Jesús tlauel kinikneliyaya, yeka “pejki kinmachtia”, uan amo kimatki kenijkatsa nima tiotlakixki (Mar. 6:35). w24.11 16 párrs. 9, 10

Tetajmej, xikinpaleuikaj inmokoneuaj ma kamanaltikaj ininuaya sekinok tlen Biblia tlamachtia (Rom. 10:10). Kema se akajya kamanalti tlen Biblia eli sanse kej kema se akajya tlatsotsona. Kema peuas tlatsotsonas uelis kichiuas se uikatl tlen amo ouij. Pero tlaj más momachtijtias, más kuali kichijtias sekinok uikatl. Uan kiampa techpano kema tikixtomaj tlen tijneltokaj, se telpokatl uelis achtoui kiixtomas se tlamachtili tlen amo ouij uan uelis kitlatsintokis se akajya katli iuaya momachtia: “¿Tijmajtoya miakej ingenieros kiixkopinaj miak tlamantli tlen onka? Xikita tlen nesi ipan ni video”. Teipa, uelis kinextilis tlen kixelojtokej ipan video “¿Se akajya kichijchijki?” uan kitlatsintokis: “Tlaj maseualmej kipatiitaj tlen kichiua se ixtlamatketl maske san kiixkopina tlen ya onka, uajka ¿ajkia kinamikiskia tijueyichiuasej pampa kichijchijki nochi tlen onka?”. Tlaj kiampa kichiua, uelis katli iuaya timomachtia kinekis kimatis sekinok tlamantli. w24.12 19 párrs. 17, 18

Jehová kiualtitlanki Jesús ma techmakixti tlen tlajtlakoli uan mikilistli. Pero, ¿kenijkatsa kinmakixtiskia miakej maseualmej se tlakatl katli amo eli tlajtlakole? Apóstol Pablo kiijtok: “Sanse kej miakej mochijkej tlajtlakolejkej pampa se tlakatl [Adán] amo kineltokak Dios, nojkia miakej elisej xitlauakej pampa se tlakatl [Jesús] kena kineltokak Dios” (Rom. 5:19; 1 Tim. 2:6). Uajka tlaj se tlakatl katli amo kineltokak Dios kichijki ma tielikaj titlajtlakolejkej uan ma timikikaj, uajka nojkia se tlakatl katli amo kipixki tlajtlakoli uan kineltokak Dios ueliskia techmakixtis. ¿Jehová ueltoskia kinkauas iteipaixuiuaj Adán katli kuali tlaneltokaj ma itstokaj nochipa? Uelis tojuantij timoiljuiskiaj más kuali tlaj kiampa kichijtoskia, pero ma tikilnamikikaj Jehová nochipa kichiua tlen xitlauak. Uan tlaj Jehová kiampa kichijtoskia, kinextijtoskia amo kenijki kema Adán kiixpanok. w25.01 20, 21 párrs. 3, 4