Tungasambililako uwuzima wuno wawa mukuwa nu mwezo wa cisinka kwe vino vyacitisile. Pano e Filipi walesile e ciwuza wakwe e Natanaeli kwe Yesu pakuti walolane, kwalinji cimwi icakuzungusya cino cacitisile. Nanti acakuti wo-o awuno walinji amuku wakutalicila kwe Yesu ukulolana ne Natanaeli, watilivye wamulola walanzile ukuti: “Umu Israeli wakusimichila wee, mwakwe weliwe muli ukusimichila kutupu.” (Yoha. 1:47) E Yesu waweni ukuti e Natanaeli awino wacizilepo. Atalinji amupwililike ndi vino sweswenye, lelo walinji ni cisinka mwe vyonsinye. Conye acino e Yesu waweni mwe Natanaeli swinya acino calenzile amusalifye. Amalumbo 15 palanda sana pe vino tuzipizile ukucita na vino tutazipizile ukucita kwe wanji pa kuti twasecelesya Yehova. Ku cakulolelako, Amalumbo 15:3 yakalanda ukuti wino wawa mwitenti lya kwe Yehova “asiwipizya wanji. Asiwifya kuwawuye swinya asizonzya ivyawawuye.” Fwandi ukulanda iviwipe pe wanji kwawipa nkaninye, amuno kungawacisa.—Jemu. 1:26. w24.06 10 ¶7, 9; 11 ¶10

Nga cakuti mwayipekanya pano mutani muye mu mulimo, ciliwamipepucila ukulanzyanya icete na wantu. Ne Yesu nye pano atani atume awasambi wakwe mu mulimo, wawavwizye ukuyipekanya. (Luk. 10:​1-11) Pano wawomvizye vino wawasambilizizye, wanyosile wakusecelela, pa mulandu wa kuti wacisile ivizima ivivule. Avyani vino tuzipizile ukucita pano tukuyipekanya ukuya mu mulimo? Tuzipizile ukwelenganya pe vino tunganena awantu icisinka ca mu Baibolo mu mazwi yitu asa kuswatila. Swinya tungelenganya na pe vimwi vino awantu wano wawa mu cifulo cino tukawombelamo wakacita nga twaya mu kuwawizizya, nu kulola vyo tungawasuka. Cinji aca kuti pano tukulanzyanya nawo tuzipizile ukutekanya, ukumwentula nu kuwa na wuciwuza kwe woliwo. w24.04 16 ¶6-7

Icicindamisye cino cikalenga twawizya ilyasi lizima, apa mulandu wa kuti twakunda e Yehova ni zina lyakwe. Tukalola umulimo wakuwizya ukuti anzila ya kumulumbanizizyamo. Tukazumilizyako ku mazwi yakuti e Yehova Leza awino uwukankala, umucinzi na maka avyakwe. Tukalanjizya ukuti uwukankala nu mucinzi avyakwe ukupitila mukunenako wanji cino calenga tusinincizye ukuti “awino welewula ivintu vyonsi” nu kuti twawa nu wumi pa mulandu na weliwe. Swinya tukalanjizya ukuti amaka ayakwe, ukupitila mukuwomvya impindi, amaka yitu na vino twakwata kukutunjilila umulimo wakwe. (Mat. 6:33; Luk. 13:24; Kolo. 3:23) Mukufupizya vye tungalanda ukuti, twatemwa ukulanda pe Yehova amuno twamukunda. Swinya tukakwivwa icete ukunenako wanji pi zina lyakwe na muno likasula. w24.05 17 ¶11