Swensinye tukalondekwa awakutwavwa pano tukupingulapo pa vintu ivicindame. Wa eluda na wina Klistu wanji wasongo mu vya kwe Leza, wangatwavwa ukucita wo-o. Nga cakuti wano wakutwavwa awasongo ukutucila, tutazipizile twalola ngati vino wakutunena avya kaali nanti vyaleka ukuwomba. E Yehova akalonda twasambililako kwa songo. Amuno weni wikala imyaka imivule munsi swinya vino wamanya na mano yano wawa nayo, tutanga tulingane nawo. Mu mpindi zya mu Baibolo, e Yehova wawomvyanga wasongo awa cisinka kukuwomelezya nu kutungulula awantu wakwe. Pe wa-a wano wawomvizyepo palinji e Musa, e Devedi, nu mutumwa e Yohani. Wa-a awantu watalinjiko pa mpindi iyili yonga swinya vino wapisilemo vyapusine pusine. Pano walinji mupipi nu kufwa walanzileko amazwi yamwi ayakwavwa awacitici. Wonsinye walanzilepo pa wuzima wuno wukafumamo mukwivwila Yehova. Fwandi asa mulandu swe wasongo nanti swe watici, tungazanamo ivizima mukuwomvya vino walanzile.—Roma. 15:4; 2 Tim. 3:16. w24.11 8 ¶1-2

Mu mpindi zya kwe Noa, e Leza walesizye awantu ukulya uwazi. (Inta. 9:​3, 4) E Yehova wanyocezizyepo ukunena awina Israeli isundo ilili lyonganye, ilyakuti wensinye wino walya uwazi walinji nu “kukomwa.” (Lev. 7:27). E Yesu wakonkanga lyo-o isundo swinya avino wawomelezyanga awantu ukucita. (Mat. 5:​17-19) Fwandi tutange tuti walondanga awa Yuda ukulya umuwili nu kumwa uwazi wakwe uwa kusimicila. E Yesu wawomvizye icilanjililo ndi wulyanye vino walanzile nu mwanaci umwina Samariya ukuti: ‘Aminzi yano niza namupa . . . yalimupa uwumi wamuyayaya.’ (Yoha. 4:​7, 14) Pano e Yesu wanenile we-e umwanaci ukuti walinji nu kuwa nu wumi nga cakuti wamwa aminzi, atasulanga ukumwa aminzi ya kusimicila. Wonye avino calinji na kwe lyonye iwumba lya mu Kapenahumi. E Yesu atasulanga mu kuti awantu walinji nu kuwa nu wumi wamuyayaya nga cakuti walya umuwili wakwe nu kumwa uwazi wakwe uwakusimicila. w24.12 9 ¶4-6

Awanawitu wazipizile ukucenjela pakuti watalola awanaci ndi vino awa munsi wakawalola. Amulandu ci? Amuno wangacita ivintu ukulingana na vino wakawalola nanti vino wakakwelenganya pe woliwo. Umutumwa Paulo wasosile awina Klisu awapakwe mu Roma ukuti “Mutize muwakolania imiwele yakunzi iyamunsi moo.” (Roma. 12:​1, 2) Pano wawalembelanga yo-o e kalata lyo wa-a awina Klistu wamala imyaka imivule mwi wungwe. Lelo amazwi yano wawalembezile yakalanjizya ukuti wamwi wacilinji wakwelenganya nu kucita ivintu ngati awa munsi. Awuli umulandu wuno wawawomelezizye ukuti wapiluke mwe vino welenganyanga nu kucita. Ko-o ukusunda kukawomba na kumitwe ya ndupwa mwe ya-a amanda. Nomba ku cawulanda wamwi wakakwelenganya ngati awa mwe yo-o insi swinya wakacuzya awaci. w25.01 9 ¶4