Kansi sewo tingasimikijile kuti Yehova nthawe zonse ochita vinthu mwachilungamo akafuna kupeleka chiweluzo kuli munthu aliyense? Eye! Molingana na mwechifotokozela Abulahamu, Yehova ni “Woweluza wa chalo chonse.” Yove ni wangwilo, wachifundo chikulu, komasoti wanzelu. Mulungu waphunzisa mwana wake komasoti wamupasa udindo wakuti azapeleke chiweluzo kuli ŵanthu. (Yoh. 5:22) Yehova pamozi na Mwana wake Yesu okwanisha kuziŵa vili muntima mwa munthu aliyense. (Mat. 9:4) Tetyo pa nthawe yakuti azapeleke chiweluzo kuli munthu aliyense, ove “azachite vinthu mwachilungamo”! Tiyeni tikokhulupilila kuti Yehova otiziŵa luweme ngako. Sewo tuziŵa kuti nise osayenelela kupeleka chiweluzo kuli ŵanthu—koma yove ni woyenelela! (Yes. 55:8, 9) N’chifukwa chake tusiya nkhani yonse yoweluza ŵanthu m’manja mwa Yehova pamozi na Mwana wake kuti azapeleke chiweluzo kuli ŵanthu onse, komasoti sewo tuziŵa kuti Mfumu yasu Yesu izaweluze mwachilungamo komasoti mwachifundo pokonkheja minkhalidwe iweme ya Atata ŵake.—Yes. 11:3, 4. Nsanja yophunzila 05.2024 pedji 7 ndim. 18-19

‘Kulaŵila vinthu vachendi m’mitima yasu’ n’chinthu chofunika ngako. Kuchita vamene ivi ni kofunika ngako tikawona vechilaŵila Yesu pechikumana na Natanayeli shamwali wa Filipo. Olo kuti Yesu enze akaliyekumanapo na Natanayeli, yove enena kuti: “Onani Muisilaeli wachendi, wamene muli yove muliye chinyengo.” (Yoh. 1:47) Yesu enzeziŵa kuti Natanayeli enzewonesha nkhalidwe ya chilungamo mwanjila yapadela. Olo kuti Natanayeli enze munthu aliye ungwilo monga ni sewo, yove enzeve chinyengo, ndipo m’malo mwake enzechita vinthu vonse mwachilungamo. Yesu, echita naye chidwi ngako ndipo emutembeja chifukwa cha vamene ivi. Mfundo zinyinji zamene zilembewa mu chapitala 15 cha buku ya Masalimo, zunena vatufunikila kuchita kuti tikondweleshe Yehova. Salimo 15:3 yunena mawu amene owonesha kuti munthu wamene ni mulwendo mu tenti ya Yehova “onenalini tonjo na lilimi yake ochitilalini muyake chiipa chilichonse, ndipo onyozalini ayake.” Keno sewo tutonja ŵanthu ayakine vingachitishe kuti ove akhumudwe ngako.—Yako. 1:26. Nsanja yophunzila 06.2024 pedji 10 ndim. 7, 9; pedji 11 ndim. 10

Keno mukonzekela luweme mukaliyeluta muutumiki, vikokuvutanilini ngako kuti muyambe kulaŵila na ŵanthu. Yesu ekonzekelesha ophunzila ŵake akaliyeŵatumija kuti akalalikile. (Luk. 10:1-11) Ove ekatishila ntchito vinthu vonse vechiŵaphunzisa Yesu. Chifukwa cha vamene ivi, esangalala ngako na vechikwanisha kuchita. Kansi tingakonzekele tyani ulaliki? Tufunika kukonzekela vatikuti tikalaŵile noganizila mwatingavifotokozele m’mawu ŵasu-ŵasu. Komasoti n’kofunika ngako kukonzekela nkhani ziŵili olo zitatu zakukonda kushusha ŵanthu am’gawo yasu nowona mwatingayankhile pa nkhani iliyonse. Pavuli pake, tikayamba kulaŵila na ŵanthu tikonkhala omasuka, kusekelela, komasoti kuchita vinthu vingachitishe kuti ŵanthu akomasuka nese. Nsanja yophunzila 04.2024 pedji 16 ndim. 6-7