Keno mwewo muli pachibwenzi, kansi n’chinji chingakuyavyeni kuziŵa keno mufunika kulungulana olo yayi? Mukoyamba mwaziŵana luweme muyake na muyake. N’vosakaikisha kuti mweziŵa vinthu viyakine vokhuza muyanu mukaliyenkhala naye pachibwenzi. Koma lomba pamuli pachibwenzi, mwewo muli na mwayi woziŵa “munthu wofisika wamuntima.” Vamene ivi vutanthauza kuziŵa vinyinji vokhuza moyo wake wauzimu, minkhalidwe yake, komasoti maganizo ŵake. M’kupita kwa nthawe, mwewo muzafwane mayankho amakonsho monga ni aŵa: ‘Kansi munthu wamene uyu angankhale muweme kuti nilungulane naye?’ (Miy. 31:26, 27, 30; Aife. 5:33; 1 Tim. 5:8) ‘Kansi ningakwanishe kumusamalila nomuwonesha chikondi chakufunikila ndipo naye angakwanishe kunisamalila noniwonesha chikondi chanufunikila? Kansi newo ningakwanishe kupilila mosavuta vinthu vasachita luweme?’ (Alo. 3:23) Panthawe yamuziŵa vinyinji vokhuza muyanu, mukokumbukila kuti chinthu chofunika ngako nikukondalini tyala vinthu volingana, koma kuziŵa keno mungakwanishe kudjailana olo kuti mukonda vinthu vosiyana. Nsanja yophunzila 05.2024 pedji 27 ndim. 5

Mfumu Davite ichita chimo ikulu ngako. Koma mneneli Natani pechimuzuzula, Davite elapa molichefya. Kufumila pa mawu ŵechilemba yove pa Salimo 51, sewo tukwanisha kuwona kuti yove elapa mofumila pansi pantima. Davite elimvwila chisoni, osati pofuna tyala kupusisha Natani kuti aganize monga walapa, olo pofuna kupewa chilango. (Sal. 51:3, 4, 17, mawu apalulu) Mfumu Hezekiya, ichimwila Yehova. (2 Mbiri 32:25) Koma molingana na Davite, Hezekiya elapa molichefya. (2 Mbiri 32:26) Monga vokonkhapo vake, kansi Yehova emuwona tyani Hezekiya? Yove enzemuwona kuti ni mfumu yokhulupilika yamene ‘yenzechita viweme pamenso pa Yehova.’ (2 Maf. 18:3) Kansi tuphunzila chinji? Tikachita chimo tufunika kulapa ndipo tikochita vonse vatingakwanishe popewa kuwelejasoti. Lomba kansi tingachite tyani keno talondela malangizo kuli akulu amumpingo pankhani zatuwona kuti nizosafunika ngako? Tikopewa kuganiza kuti Yehova otikondalini, kapena kuti akulu otizonda. Nawo mafumu aweme ŵa Aisilaeli enzepasiwa malangizo komasoti chizuzulo. (Ahe. 12:6) Tikapasiwa malangizo tufunikila (1) kuŵalondela molichefya, (2) kuchinja, komasoti (3) kupitilija kutumikila Yehova na ntima wosayaŵanika. Tikalapa machimo ŵasu, Yehova otikhululukila.—2 Ako. 7:9, 11. Nsanja yophunzila 07.2024 pedji 21 ndim. 8; pedji 22 ndim. 9, 11

Munthu akachita chimo ochosewa mumpingo keno ofunalini Kukonkheja malangizo ŵakupeleka akulu kuti alape. Tetyo, vunkhala monga olisankhila yeka kuti achosewe mumpingo. Yove oweja vinthu vechikomola yeka. Ndaŵa yanji tinganene tetyo? Chifukwa chakuti yove okana kukonkheja malangizo ŵakumupasa akulu pomuyavya kuti alape. (2 Maf. 17:12-15) Vochita vake vuwonesha kuti yove ofunalini kumvwila malamulo a Yehova. (Deut. 30:19, 20) Akulu opeleka chilengezo ku mpingo kuti niwa Mbonilini soti za Yehova. Cholinga cha chilengezo chamene icho n’kumuchitishalini nsoni. Mmalo mwake, nikuyavya mpingo kuti ukonkheje malangizo a m’Malemba amene onena kuti “muleke kukatijana” na munthu wamene uyo “olo kulya naye munthu wamene uyo yayi.” (1 Ako. 5:9-11) Malangizo amene aŵa opelekewa pa vifukwa viweme. Ntumwi Paulo elemba kuti: “Isiti itontho yufufumisha ntanda wonse wa unga wokanya-kanya.” (1 Ako. 5:6) Keno munthu wamene ofunalini kulapa ochosewalini mumpingo, ayakine angayambe kuganiza kuti kumvwila malamulo a Yehova n’kosafunika.—Miy. 13:20; 1 Ako. 15:33. Nsanja yophunzila 08.2024 pedji 27 ndim. 3-4