Mawu a Yesu onena za kuwonongewa kwa chalo cha Yuda, enze esala patontho kuti akwanilishiwe. Koma Akhilisitu amene awo sembe ekatishila ntchito nthawe yenze nayo kuti akonzekele vinthu vakusogolo pokulisha minkhalidwe iweme, monga chikhulupililo komasoti kupilila. (Ahe. 10:25; 12:1, 2) Sewo nase tasala patontho kukumana na chisauso chikulu ngako kupambana chechikumana nacho Akhilisitu Achihebeli. (Mat. 24:21; Chiv. 16:14, 16) Onani malangizo ŵechipeleka Yehova kuli Akhilisitu amene awo amene angatiyavye nase masiku ŵano. Ntumwi Paulo elimbikisa Akhilisitu ayake kuti akophunzila Mawu a Mulungu mwakhama ngako. (Ahe. 5:14–6:1) Pokatishila ntchito Malemba Achihebeli, Paulo eyavya akwasu na akalongosi kuziŵa kuti njila yolambilila ya Chikhilisitu niyapalulu ngako kupambana njila yolambilila ya Ayuda. Paulo elimbikisa Akhilisitu ayake kuti aŵaziŵe luweme Malemba kuti akokwanisha kuziŵa viphunziso vawenye novipewa. Nsanja yophunzila 09.2024 pedji 8-9 ndim. 2-3; pedji 10 ndim. 6

Ophunzila a Yesu enzefunika kutang’ishiwa. Ndaŵa yanji? Ayakine enze esiya mang’anda, mabanja komasoti mabizinesi ŵawo kuti akoyenda na Yesu nthawe zonse. (Mat. 19:27) Ove enzechitiliwa vinthu viliye chilungamo na ŵanthu ayakine chifukwa chakuti enze ophunzila a Yesu. (Yoh. 9:22) Ove enze okonzeka kuchinja moyo wawo komasoti kutamanishiwa chifukwa chakuti enzekhulupilila kuti Yesu enze Mesiya wolonjezewa. (Mat. 16:16) Koma Yesu pechipaiwa na adani ŵake, ove ekhumudwa ngako chifukwa enzeziŵalini kuti n’chinji chikuti chiŵachitikile. Yesu enzeziŵa kuti ophunzila ŵake ali na vifukwa viweme vokhalila okhumudwa yove pechipaiwa. Komasoti yove enzewonalini kukhumudwa kwawo monga umboni wakuti ni ŵanthu aliye chikhulupililo. Tetyo, pa nsiku yechingoti waushiwa yove eyamba ntchito yotang’isha azishamwali ŵake amene awo. Mwachisanzo, yove ewonekela kuli Maliya waku Magadala penzelila pafupi na manda ŵake. (Yoh. 20:11, 16) Yove ewonekelasoti kuli ophunzila ŵake aŵili amene enzeluta ku munzi wa Emau. Ndipo pasogolo pake, ewonekela kuli ntumwi Petulo. Nsanja yophunzila 10.2024 pedji 13 ndim. 5-6

Makolo yavyani ŵana ŵanu kuziŵa mwangafotokozele kuli ayawo vinthu vakukhulupilila kuti kuli Nyamalenga. Vingankhalesoti voyavya kuŵelengela pamozi na mwana wanu nkhani zapa jw.org pagawo yakuti “Zimene Achinyamata Amadzifunsa—Kodi Zinthu Zinachita Kulengedwa?” Pavuli pake, mwana wanu angasankhe nkhani zakuwona kuti zingayavye ayake kumvwisha kuti kuli Nyamalenga. Kambilannani na mwana wanu kuziŵa vangachite pofotokozela ayake nkhani zamene izi kusikulu. Mukumbusheni kuti akopewa kukangana na ayake kusikulu pokambilana nawo. Mukumbushenisoti kuti akofotokoza mwachidule komasoti mwanjila yosavuta kumvwa kuli ayake amene awonesha chidwi na nkhani zamene izo. Mwachisanzo, muyake wakusikulu angamukonshe kuti: “Newo nukhulupilila vinthu vanukwanisha kuwona, ndipo Mulungu nikaliyemuwonapo.” Nkhilisitu wachilumbwana angayankhe kuti: “Tiyelekezele kuti uli kusanga ndipo wafwana chisime chamanzi. Kansi n’chinji chaungaganize? Keno kunkhalapo kwachisime kupeleka umboni wamphamvu wakuti pali muyakine wanzelu wamene echipanga, tyani kunkhalapo kwa vinthu vonse vam’chilengedwe!” Nsanja yophunzila 12.2024 pedji 18 ndim. 16