Ko chuma mwechi ni chani? Ni basa yolalikira va Ufumu wa Mulungu yomwe ichapulumusa wanthu. (2 Akor. 4:1) Ko mbiya za dothi ni chani? Mwezi zinkuyimira atumiki wa Yahova omwe achalalikira ntontholo wabwino kwa anango. Munthawe ya ntumi Paulo, wanthu wa bizi ambaphatisa basa mbiya za dothi pa kutakula na kusunga vinthu vodekana maninge ninge vinyu, chakudya na kobiri. Molingana na vimwevi, Yahova watipasa ntontholo wapadzulu maninge yemwe ni ntontholo wabwino. Na thandizo ya Yahova tingakhale na mphanvu zokwana kuti tipitirize kulalikira ntontholo wabwino molimba ntima. Nthawe zinango tingakhale na mantha yogopa wanthu panango mantha yakuti wanthu alambe ntontholo wathu. Ko tingakwanise tani kulimbana na bvuto mweyi? Onani pemphero ya atumi pomwe iwo adalamuliwa kuti aleke kulalikira. M’malo mwakuti abvume kuti mantha yawagonjese, iwo adakumbira Yahova kuti awathandize kupitiriza kuyankhula molimba ntima ndipo Yahova adadawira mwakankulumize pemphero mweyi. (Mac. 4:18, 29, 31) Peno mantha yogopa wanthu yankukuchitisani kukhala na mantha mu umboni, mukumbireni Yahova kuti chikondi chomwe munacho kwa wanthu chikhale chikulu kuposha mantha yogopa wanthu. w24.04 tsa. 16 ndi. 8-9

Chikondi chathu kwa Yahova chitilimbikisa kuti timbafune kuchenesa dzina yake. Vimwevi vinkutanthauza kuti tinkufunika kuuza wanthu kuti vomwe Satana adanena pakulewa Yahova nibodza. (Gen. 3:1-5; Yobu 2:4; Yoh. 8:44) Tikambalalikira, tinkufuna kuuza wanthu wose omwe ni okonzeka kutibvera, momwe Yahova aliri. Tinkufuna kuti wanthu wose adziwe kuti khalidwe ikulu ya Yahova ni chikondi. Nakuti momwe iye achatongera ni mwachilungamo ndipo manjemanjepa adzamalise mabvuto nkubweresa ntendere nkuchitisa wanthu ose kukhala okondwa. (Sal. 37:10, 11, 29; 1 Yoh. 4:8) Tikambayankhula va chonadi cholewa va Yahova, tikhala kuti tinkuchenesa dzina yake. Tikhala pomwe okondwa ndawa yodziwa kuti tinkuchita vomwe tichadekana kuchita ninge Mboni za Yahova. w24.05 tsa. 18 ndi. 12

Abale, imwepo muonesa kuti ndimwe “wotambira bwino alendo” mukambachitira vinthu vabwino wanthu anango kuphatanidzapo wale omwe alirini m’gulu ya azishamwali wanu omwe mubverana nawo maninge. (1 Pet. 4:9) Bukhu inango ya mareferensiya idanena va munthu wochereza mwanjira iyi: “Nsuwo wa nyumba yake na ntima wake uchadekana kukhala wofungula.” Ndipomwapa, dzibvunzeni kuti: ‘Ko inepano nidziwika kuti ndine munthu wokoma ntima kwa wanthu omwe abwera kudzazungira mpingo wathu?’ (Aheb. 13:2, 16) Munthu wochereza aonesa kukoma ntima ndipo agawana na alendo vinthu vomwe iye angakwanise. Kuphatanidzapo wale omwe ni osauka omwe angamubwezerelini chinthu chirichose, abale omwe akumbiriwa kudzakamba nkhani mumpingo mwawo komasoti onyang’anira madera.—Gen. 18:2-8; Miy. 3:27; Mac. 16:15; Aro. 12:13. w24.11 tsa. 21 ndi. 6