Jesuspa discipulonkunaqa pisi kallpan kasharqanku. Paykunamanta wakinqa wasinkuta familiankuta negocionkuta saqesparaqmi Jesusta qatikusharqanku (Mat. 19:27). Wakinqa Jesusta qatikusqankuraykun marginasqa cheqnisqa kasharqanku (Juan 9:22). Ichaqa, ¿imaraykun chaykunata aguantaspa Jesusta qatikunkuman karqan? Paykunaqa allintan yacharqanku Jesusqa prometesqa Mesías kasqanta (Mat. 16:16). Jesusta wañuchipuqtinkun ichaqa yanqapas imatapas ruwankuman jina kasharqanku, chaymi kallpachanata necesitasharqanku. Jesusqa allintan yacharqan imaynas wañupusqanrayku discipulonkunaqa llakisqa kasharqanku chayta. Chaymantapas paykunaqa manan pisi iñiyniyoq kasqankuraykuchu chhaynaqa kasharqanku. Chaytapas allintan Jesusqa yacharqan. Chaymi payqa kausarichisqa kasqan p’unchaypacha amigonkunata kallpachayta qallarirqan. Ñaupaqtaqa María Magdalenamanmi rijurirqan. Payqa sepultura punkupin waqasharqan (Juan 20:​11, 16). Chaymantataq Emaús llaqtaman riq iskay discipulonkunaman rijurirqan, apóstol Pedromanpas rijurirqanmi. w24.10 13 párrs. 5, 6

Tayta-mamakuna, wawaykichista yanapaychis Diospi creesqankuta mana manchakuspa willanankupaq. Chaypaqqa yaqapaschá kuska estudiawaqchis “¿Creación o evolución?” nisqa yachachikuyta. Chayqa jw.org paginapin kashan “Los jóvenes preguntan” nisqapi. Chaymanta tapuy chaypi yachasqanmanta mayqensi aswan allin kanman Diosqa cheqaqpuni kasqanta jujkunaman willananpaq chayta. Chaymantapas willay imaynas mana piwanpas discutinachu chayta. Ichaqa mayqen compañeronpas uyarikuyta munan chayqa, rimallanmanmi paywanqa. Yaqapaschá wakinqa ninqaku: “Noqaqa imachus rikusqallaypin creeni, manataq Diosta rikunichu chayqa imaynapin paypi creeyman”, nispa. Payqa yaqapaschá ninman: “Monte ukhupis kashanki, chaypis tarinki juj munay unu pozota, ¿niwaqchu: kikillanchá chayqa rikurirqan nispa? Manan ¿riki? Chay unu pozollapas ruwasqataq karqan chayqa, ¿manachu lliu ima rikusqanchispas jujpa ruwasqan kanman karqan?”, nispa. w24.12 18 párr. 16

Lliupas munasunmanmi imata ruwananchispaqpas pillapas yuyaychariwananchista ¿riki? Chaypiqa umalliqkuna juj Dios sonqo runakuna iman yanapawasunman. Paykuna noqanchismanta aswan kuraq runakunaña kankuman chaypas, ima yuyaychasqankupas allinninchispaqmi. Chaymi siminkutaqa mana jinataqa qhawarparinanchischu. Jehová Diosqa kuraq runakunamanta yachananchistan munan. Paykunaqa unayñataq kausashanku chayqa, imaymanapaqmi allin experienciayoq kanku. Allin yachayniyoq allin yuyayniyoq iman kanku. Ñaupa tiempokunapiqa Jehová Diosqa kuraq runakunawanmi llaqtanta pusarichiq. Paykunamanta wakinmi kashan Moisés, David, apóstol Juan ima. Paykunaqa jujniray tiempokunapin kausarqanku, jujniraytaqmi vidankupas karqan. Ichaqa vidanku tukukunan patapiña kashasqanta reparakuspan sapankanku qhepa wiñay runakunata allinta yuyaycharqanku. Paykunaqa Diosta kasukunankupaqmi tiemponkupi wayna runakunata yuyaycharqanku. Paykunaq rimasqanku simikunaqa Bibliapin kashan. Diosmi encargakurqan chaykuna qelqasqa kananpaq. Chay simikunaqa yanapawasunmanmi waynatapas kuraqtapas (Rom. 15:4; 2 Tim. 3:16). w24.11 8 párrs. 1, 2