¡Mana gonganapaj wichancho cawaycanchi! Lapanchimi ricaycanchi Bibliacho caycaj profeciacuna imano cumplicuycashganta. ‘Norte caj rey’ y ‘sur caj reypis’ imaycacunata rurar luchaycan pï cay munduta controlananpaj (Dan. 11:40). Jina unaypitapis masraj canan wichan Diospa Gobiernunpita may chaychopis yachachicuycanchi y achca runacuna Diospa sirvejnincunaman ticrapäcuycan (Is. 60:22; Mat. 24:14). Y tiempulancho imayca yachachicuycunata chasquiycanchi Jehovata aduranapaj (Mat. 24:45-47). Jehovaga jinala yanapaycämanchi shumaj tantianapaj ichiclacho imacunata pasananpaj (Prov. 4:18). Chaymi seguro caycanchi jatun nacay galaycuptin, musyashunmi imacunata ruranapaj hermanunchicunawan juc yarpayla Jehovata sirvir caycänapaj. Ichanga lapantaga manami musyanchichu chay wichancho imacunata pasananpaj. w24.05 8 parr. 1, 2

Salmuta escribej o guelgaj runaga washa rimajcunapaj parlamun. Paycunashi waquincunapa guepancho adrede lutancunata parlacachan. Jina Salmo 15:3 textupis parlamun Diospa wasincho caycaj runacunaga runa masinta mana aliman chayananta ashinchu, vecinuncunata imatapis mana alita ninchu (Sal. 15:1). ¿Imata rurartaj öraga pipa washantapis parlar galaycushwan y laquichishwanpis? Öraga cuentata mana gocur pipa washantapis parlar galaycushwanchi. Imaraj canman cay wilacuycuna chasquiptinchi: 1) wilacamun juc hermana precursor regular manana cashganta, 2) wilacamun Betelpita juc matrimonio yargushganta o 3) wilacamun maygan hermanupis siervo ministerial o anciano manana cashganta. Chay hora waquincunawan parlar galaycushwanchuraj ‘¿imanir-raj chayta wilacäramush?’ nir o ¿yarpashwanchuraj ima juchacunatapis rurashganta? Rasun cajchoga manami musyanchichu imacunapa hermanulanchicuna pasaycashganta. Ama gongashunchu, Jehovapa wasincho caycajcunaga manami pipa washantapis parlanchu ni munanchu mana alicunaman chayananta. w24.06 11 parr. 11-13

Manaraj imatapis rurar yarpachacunanchirämi Jehová ima munashganta. Bibliata leishgayqui hora, cayno tapucunquiman: “Chaycho caycaptë, ¿imataraj ruräman?”. Cayman yarpariy, chunca mana ali ricapacojcunash Dios aunishgan marcata ricashganpita wilacuyninta wiyaycanqui, ¿runacunata manchacur creinquimanchu nishgancunaman? ¿O Jehovata alapa cuyar pay munashgalanta ruranquiman? Maychicaj israelitacuna shumaj tantiapäcurganchu Josuewan Caleb rasunpa cajta parlashganta. Chayno rurashganpita Dios prometishgan marcaman manami yaycupäcurganchu (Núm. 14:10, 22, 23). w24.07 10 parr. 7