Zamislin so rodeja tuće buti te šaj te izdržine te porodica. Arakhljan duj thana kaj šaj te khuve ki buti. Sigurno razmislineja ando odova savi tani odija buti, kola smene ćerela pe hem kobor vreme ka valjani tuće te rese đi uduri. O solduj opcije nane protiv e biblijake načelija. Šaj jekh andi opcija poviše sviđini pe tuće sebepi i buti ili sose tani i plata pobari. Ama, isi pana diso sostar valjani te razmisline angleder te odlučine. Na primer, da li odija buti valjani te ćerel pe ked tano sastanak? Da li sebepi odija buti na ka ovel tut vreme te brinine tut ando te porodicake emocionalna hem duhovna potrebe? Asavke pućiba ka pomožinen tut o „najvažna buća“ te ćhive ko prvo than, a odola tane i služba e Jehovase hem te porodicake potrebe, a na o materijalna buća. Palo odova, šaj te ane odluka koja o Jehova ka blagoslovini (w25.01 17 ¶11-13).

Čak iako avera maltretirinđe tut, ov sigurno so o Jehova mangela tut hem but cenini tut. Ako hijan obeshrabrimo, ma bistri so o Jehova dikhlja odova soj tano šukar ko to vilo hem so privucinđa tut koro peste (Jov. 6:44). Ov tano uvek odothe te pomožini tut, odolese so mangela tut. Amen šaj but te sikljova savo tano o Jehova ađahar so ka razmotrina e Isuseso primer. Đi hine ki phuv, o Isus brininđa pe ando okola kola mislinđe so na vredinena hem mothovđa lenđe saosećanje (Mat. 9:9-12). Ked i romni koja nadinđa pe so ka saćol ando po nabormipe pipinđa olese šeja, o Isus utešinđa la hem pohvalinđa la asi olaki vera (Mar. 5:25-34). Đanaja so o Isus savršeno oponašinđa pe Dade (Jov. 14:9). Odolese, šaj te ove sigurno so o Jehova hem tut cenini hem dikhela te šukar osobine, sar soj tane ti vera hem to mangipe premalo leste (w24.10 7 ¶4-5).

O David hine le nekobor phare situacije sebepi kola runđa. Hine but manuša kola mrzinđe le. Čak disave andi olesi porodica hem olese amala na hine lese verna hem manglje te povredinen le (1. Sam. 19:10, 11; 2. Sam. 15:10-14, 30). Jekh puti ked hine lese but pharo, ov pisinđa: „Odobor maje pharo so više nane man snaga. Po celo rat samo rovava, me asvencar sapanćerava mi postelja“ (Ps. 6:6). Iako o David hine le but pharipa, ov hine sigurno so o Jehova mangela le. Ov pisinđa: „O Jehova ka šunel man sar rovava“ (Ps. 6:8). O lafija ando avdisutno citati mothovena amenđe kobor o Jehova brinini pe amendar. O David phenđa so osetinđa pe samći o Jehova ćedela olese asva ko meh ja so pisini len ki jekh knjiga. Ov hine sigurno so o Jehova dikhela hem na bistrela olesi dukh. O David hine uverimo na samo so o Jehova đanela olese pharipa, već hem sar on utičinena upro leste (w24.12 22 ¶11-12).