Sɛ ye po mmenia di wɔnye a, ɛkɔhora konya gyidie kyɛ Yehowa kuro wɔ dwirɛ na wɔnwo hia ye. Sɛ wɔ “kra aboto” a, kae kyɛ Yehowa nwuni nningyein pá biemɔ wɔ wɔnwo, na ɛhene yeɛ ɔmaa ɔhwene wɔ wale yenwo ɔ. (Yoh. 6:44) Wɔnwo hia ye paa, yeti mmerɛ biala ɔpena kyɛ ɔboka wɔ. Sɛ yɛnea bɔ Yesu yɛle mmerɛ bɔ né ɔwɔ aseɛ so ne a, ɔmaa yenwu adwene bɔ Yehowa le ye wɔ yɛnwo ɔ. Ohyirele kyɛ bɛbɔ né mmenia mva bɛ nyɛ hwee ne, yede okuro bɛ dwirɛ na ɔdwene bɛnwo. (Mat. 9:​9-12) Maame bie bɔ né anwonyerɛ bɔ ɔyɛ suro bie abɔ ye ne, ɔɔfale yesa hane Yesu ataadeɛ, ofikyɛ ne ole gyidie kyɛ sɛ ɔyɛ sɔ a yenwo kɔtɔ ye. Mmerɛ bɔ ɔyɛle sɔ ne, Yesu hane ye ahone tole ye kunu, na ɔkamvole ye kyɛ wanya sɔ gyidie ne ɔ. (Mak. 5:​25-34) Yesu suesua ye Baba subaen pɛpɛɛpɛ. (Yoh. 14:9) Yeti ɛkɔhora konya gyidie kyɛ wɔnwo hia Yehowa, na subaen pá bɔ ele ye ne koso, ɔse ye mukoraati. Ebie yeɛ ole gyidie ne ɔdɔ bɔ ele ma ye ne. w24. 10 7 ¶4-5

Né odikyɛ Dawide mia yenye gyina ɔhaw pee noa wɔ ye asetena nu, na ɛhene maa ɔtele moen. Né mmeni pee nguro ye dwirɛ, na bɛbɔ ne odé bɛ di ne koso, belili ye hwamɔ. (1 Sam. 19:​10, 11; 2 Sam. 15:​10-14, 30) Odwuli mmerɛ bie po ne, ɔhane kyɛ: “Ɛpenenɛ amaa mayɛ hodwoo; kɔngɔen biala, ɛmoen ma me bɛen doa fotii, na me suɛ ma me mba doa.” (Edw. 6:6) Ɔhaw ahoroɛ bɔ ɔtole Dawide ne mukoraati si ne, ne ole gyidie kyɛ Yehowa kuro ye dwirɛ. Ɔhworɔle kyɛ: “AWURADE ate me suɛ ne.” (Edw. 6:8) Ɛberɛ dwirɛ ne maa yenwu kyɛ, Yehowa kuro yɛ dwirɛ paa, na ɔdwene yɛnwo. Dawide hane kyɛ, ɔtekyɛ bɔ Yehowa fa towaa sɔ yenye moen, anaa ɔtworɔ yenwo dwirɛ wɔ nwomaa bie nu ne. Ɛhe maa Dawide nwuni ye paa kyɛ, Yehowa ye anwuro Baba bɔ okuro ye dwirɛ ne, ɔkae ɔhaw bɔ ɔfale nu ne mukoraati, na osa se kyɛbɔ sɔ haw ne ahã ye asetena ɔ. w24. 12 22 ¶11-12

Odikyɛ yɛyere yɛnwo yɛbayɛ Kristoniɛ bɔ wanyi wɔ sunzum nu ɔ. Nakoso yɛyɛ sɔ a, ne yɛyielle, na mmom odikyɛ yɛnea yé na yande yanza. Yeti, ɔnzɛkyɛ yenya adwene kyɛ nekaa bɔ yanya ngɔsoɛ yadwu nala te pá. (1 Kor. 10:12) Odikyɛ yɛkɔso ‘yɛneanea y’ahone nu yɛnea’ kyɛ yenya ngɔsoɛ wɔ asafo nanu, anaakyɛ yɛte yesa. Krataa bɔ somafoɛ Pɔɔlo hworɔ ɔɔmane Kolosefoɛ nemɔ anu ne, osa hãne bɔ yeti yeɛ yenwo hia kyɛ, ebie kɔso nyi wɔ sunzum nu ɔ. Ɔwɔ nu kyɛ né sɔ Kristofoɛ nemɔ anyi wɔ sunzum nu de, nakoso Pɔɔlo bɔle bɛ kɔkɔ kyɛ bɛnea yé, na bannya adwene bɔ ewiase ne le ye ne bie. (Kol. 2:​6-10) Bɛbɔ né bɛwɔ sɔ asafo nanu ne, ne Epafra se bɛ paa, yeti ɔhɔle so bɔle mbaeɛ mane bɛ, kyɛbɔ ɔkɔyɛ a, ‘bekogyina pindinn ɔ.’ (Kol. 4:12) Nzu yeɛ yesua yefi nu ɔ? Né Pɔɔlo ne Epafra mukoraati se kyɛ, sɛ ebie kɔhɔso konyi wɔ sunzum nu a, sana sona ne bɔbɔ yere yenwo, na Nyameɛ koso boka ye. Né bɛpena kyɛ Kolosefoɛ nemɔ kɔso nyi wɔ sunzum nu, ɔmva yenwo ne ɔhaw biala bɔ né bɛfa nu ɔ. w24. 04 6-7 ¶16-17