Mapakgsina David lhuwa tuku nitlan titaxtulh nema makgatasalh. Lhuwa latamanin ni xʼakxilhputunkgo, asta tiku xalak xfamilia chu xʼamigos lu nitlan tuku tlawanikgolh (1 Sam. 19:​10, 11; 2 Sam. 15:​10-14, 30). David tsokgwililh: «Lu ktlakgwanit xlakata lu kjalhpanima; putuminika katsisni klimastaja kilakgaxtajat kimputama; kintatasa klimastaja putuminika kimputama» (Sal. 6:6). Maski David lhuwa tuku tuwa titaxtulh, liwana xkatsi pi Jehová xpaxki. Xla wa: «Jehová nakgaxmata kintalipuwan» (Sal. 6:8). Texto xala uku limasiya la xlilhuwa kinkapaxkiyan Jehová chu pi lilakgaputsa tuku makgkatsiyaw. David wa pi xtachuna la Jehová xmakilh kilakgaxtajatkan kʼakgtum odre o xtsokgwililh kmaktum libro. David xkatsi pi Jehová xʼakxilhma putum tuku xlipatinama chu xlakapastaka, chu pi Jehová ni kajwatiya x’akxilha xtaʼakglhuwit, wata xʼakgatekgsa la xmakgkatsi. w24.12 22:​11, 12

Lu kiliskujatkan tliwakga nakgalhiyaw kintakanajlakan. Wa xlakata ni kiʼakstukan kakinkalipawankan (1 Cor. 10:12). Ankgalhin kuenta katlawaw komo chuntiya tatliwakglhma kintakanajlakan. Ktatsokgni nema Pablo kamalakgachanilh colosenses kamalakapastakapa pi lu xlakaskinka chuntiya xmatliwakglhkgolh xtakanajlakan. Maski tliwakga xwankgonit xtakanajlakan, kawanilh pi kuenta xtlawakgolh ni xkaʼakgskgawilh xtapuwan kakilhtamaku (Col. 2:​6-10). Chu Epafras, tiku liwana xkalakgapasa, ankgalhin xtlawa oración “xlakata tliwakga takanajla xkgalhikgolh” (Col. 4:12). Pablo chu Epafras liwana xkatsikgo pi xlakata chuntiya tliwakga nakgalhiyaw kintakanajlakan, talakaskin lu naliskujaw, chu maklakaskinaw xtamakgtay Jehová. Xlakaskinkgo pi colosenses chuntiya tliwakga xkgalhikgolh xtakanajlakan maski xtitaxtumakgo tuku tuwa. w24.04 6:​16, 17

Pekuanikan Jehová kilhchanima pi lu napaxkiyaw, chu uma tapaxkit nakinkamakgtayayan ni namakgalipuwanaw. Akinin lakgapasputunaw tuku xatlan chu tuku ni xatlan, tuku xaxlikana chu tuku kaj taʼakgsanin xlakata Jehová tlan nakinkaʼakxilhan (Prov. 2:​3-6; Heb. 5:14). Komo tlakg natsukuyaw kapekuaniyaw latamanin nixawa tlakg napaxkiyaw Jehová, max natsukuyaw kanajlayaw tuku ni xaxlikana nema talalakatawaka tuku kinkamasiyaninitan Jehová. Kakalilakpuwaw 12 skgalananin tiku ankgolh akxilhkgo tiyat nema Jehová xkamalaknuninit israelitas. Kgalhakaw skgalananin tlakg kapekuanikgolh cananeos chu limasiyakgolh pi ni tlakg xpaxkikgo Jehová. Wa xlakata wankgolh: «Nila katikatalatlawaw umakgolh latamanin, xlakata tlakg lakgtliwakgan nixawa akinin» (Núm. 13:​27-31). Xlikana pi max cananeos tlakg lakgtliwakgan xwankgonit. Pero akxni wankgolh pi nila xʼamakgo kamakgatlajakgo, xpatsankgamakgo Jehová. w24.07 9:​5, 6