¡Bayal bin yak ta kʼoel ta pasel ta ora ini! Ta jujun kʼajkʼal yakotik ta yilel te yak ta kʼoel ta pasel te bin ya yal te albilkʼopetik. Jich bitʼil te ya skontrain sbaik «te ajwalil ta norte» sok «te ajwalil ta sur» yuʼun ya skʼan ya swentainik te balumilal (Dan. 11:40). Jaʼnix jich yak ta cholel te lek yachʼil kʼop ta swolol Balumilal sok bayal millón ta tul ants winiketik ya skʼan ya yichʼik ta mukʼ te Jehová (Is. 60:22; Mat. 24:14). Sok «ta yorail» yakotik ta yichʼel te weʼelil ta swenta te schʼuunel koʼtantik (Mat. 24:45-47). Te Jehová yak skoltaybelotik yuʼun ya xkʼot ta koʼtantik ta lek te bin nopolix ya xkʼot ta pasel (Prov. 4:18; Dan. 2:28). Ya xjuʼ ya schʼuun koʼtantik te kʼoemix ta koʼtantik te bin ya jpastik te kʼalal ya xjajch te tulan wokolil, yuʼun jich jun koʼtan ya kakʼ jbatik sok junuknax ayotik ta yorail te tulan wokolil. Pero ya skʼan ya xkʼot ta koʼtantik te ma spisiluk ya jnaʼtik te bin ya xkʼot ta pasel ta pajel chaʼbej. w24.05 8 párr. 1, 2

Te salmista jaʼ la yalbey skʼoplal te leel ta kʼop. ¿Bin-a te leel ta kʼope? Jaʼ te ay bin ya yichʼ alel te maba smeleliluk ta stojol jtul ants winik yuʼun ma lekuk skʼoplal ya xkʼot. Te Salmo 15:3 ya sjultes ta koʼtantik te machʼa ya x-ayin ta nailpakʼ yuʼun Jehová, jaʼ te machʼa «mayuc bin chopol ya spasbe te spat-xuhc, soc te ma ba ya sbohlobtesbe scʼoblal». ¿Bin-utʼil ya xjuʼ ya jbolobtesbeytik skʼoplal te kamigotaktik? (Sal. 15:1). Maniwan jichuk ya skʼan koʼtantik, pero ayniwan bin ya xjuʼ ya kaltik te bin ma lek ta stojol te yantike. Jnop kaʼiytik ta swenta ini: 1) jtul hermana ya yijkitay te abatinel ta tiempo completo, 2) jtul hermano sok yinam ya xlokʼik ta Betel, 3) ya yichʼ alel ta jun anuncio te jtul hermano ma jaʼukix anciano o siervo ministerial. ¿Yabal xjuʼ ya jojkʼoytik te bin yuʼun jich kʼot ta pasel sok ya kalbeytik te yantik te bin ya jnoptik ta swenta-abi? Maniwan jnaʼtik ta lek te bin yuʼun jich kʼot ta pasel. Juluk ta koʼtantik te machʼa ya x-ayin ta nailpakʼ yuʼun Jehová jaʼ te machʼa «mayuc bin chopol ya spasbe te spat-xuhc, soc te ma ba ya sbohlobtesbe scʼoblal». w24.06 11, 12 párr. 11-13

Te bin ya xjuʼ ya skoltayotik yuʼun ya jxiʼtik te Jehová, jaʼ te manchuk ya xchʼay ta koʼtantik te bin ya smulan kʼalal ay bin ya jtatik ta nopel spasel. Kʼalal ya akʼopon jun relato ta Biblia, jojkʼoybey aba: «Te tey ayukon-ae, ¿binwan la jpas te jichuke?». Nopa awaʼiy te yakat ta yaʼiyel te bin la yalik te lajuntul jtsajtaywanejetik te kʼalal sujtik ta stsajtayel te kʼinal te jalbil ya yichʼike. ¿Yabal achʼuun te bin ya yalike o yabal stsalat te xiwele? O ¿jaʼbal ya axiʼ-xan te Jehová sok ya apas te bin ya smulane? Te israeletik ma la snaʼik yilel te jaʼ yakik ta yalel te bin smelelil te Josué sok te Caleb. ¿Bin kʼot ta stojolik? Jaʼ te maba juʼ ochik ta kʼinal te albil skʼoplal ya yichʼike (Núm. 14:10, 22, 23). w24.07 10 párr. 7