Oghwọrọ ri Jerusalẹm ri Jesu mraro rọyen phiyotọ na, rhe siẹkẹrẹ. Ofori nẹ Inenikristi reyọ ọke ro chekọ na vwo muegbe rẹ oma rayen womarẹ ayen vwo ru esegbuyota vẹ akoechiro rayen ganphiyọ. (Hib. 10:25; 12:1, 2) Kẹrẹkpẹ, kẹ avwanre che hirharoku ukpokpogho rọ rho vrẹ ọ rẹ Inenikristi ri Hibru hirharoku. (Mat. 24:21; Ẹvwọ 16:14, 16) Fuẹrẹn uchebro evo ri Jihova vwọ kẹ Inenikristi vwẹ ọke yena ri ji se fierere kẹ avwanre. Ọyinkọn Pọl jiriro kẹ Inenikristi na nẹ ayen yono Ota rẹ Ọghẹnẹ kokodo. (Hib. 5:14–6:1) Pọl reyọ ẹkpo evo vwẹ Ẹbẹre ra Vwẹ Hibru si Vwẹ Isiesi Ọfuanfon Na, vwo djefiotọ kẹ iniọvo na oboresorọ ẹga rẹ Inenikristi vwo yovwin vrẹ ẹga ri Ju. Pọl jiriro kẹ iniọvo na nẹ ayen yono ji vwo ẹruọ rẹ Ota rẹ Ọghẹnẹ kpobarophiyọ rere ayen se vwo vughe iyono echọchọ, i vwo jẹ ayen esuon ghwrẹ. w24.09 8-9 ¶2-3; 10 ¶6

Idibo ri Jesu guọnọ uduefiogbere. Diesorọ? Evo yanjẹ iwevwin, erua, kugbe iruo rẹ ayen ruẹ vwo ayen se vwo nene Jesu ọkieje. (Mat. 19:27) E ji shenyẹ evo rayen kidie nẹ ayen idibo ri Jesu. (Jọn 9:22) Ayen vwo owenvwe ayen vwo ru ewene na eje je rioja kidie ayen vwo imuẹro nẹ Jesu yen Mesaya na. (Mat. 16:16) Ẹkẹvuọvo, ọke re vwo hwe Jesu nu, ẹroerhe rayen ejobi de shefia, ọnana da so ọkuọrọn vwọ kẹ ayen. Aphro herọọ nẹ, Jesu riẹnre nẹ ọ dia jẹ esegbuyota evwo yen nẹrhẹ idibo rọyen muomaphiyọọ, ẹkẹvuọvo fikirẹ ughwu rọyen. Vwẹ ẹdẹ vuọvo ra rhọnvwerọ nushi na, o de phiuduphiyọ idibo rọyen awọ. Kerẹ udje, ọ vwomaphia vwọ kẹ Meri Magdalini ọke rọ vwọ viẹ vwẹ asan re shiro phiyọ. (Jọn 20:11, 16) Ọ je vwomaphia vwọ kẹ idibo ivẹ ri kpo Emaọs. Ọ je vwomaphia vwọ kẹ Pita. w24.10 13 ¶5-6

Emiọvwọn, cha ọmọ wẹn uko vwọ chochọn rẹ esegbuyota rọyen kpahen Ọmemama na. O yovwin siẹrẹ wẹ vẹ ọyen da fuẹrẹn iyovwinreta re ta ota kpahen emama kugbe arhọ mamarhe vwẹ jw.org. Ọtiọyena, wẹ vẹ ọyen gba ta ota kpahen ẹkpo re nabọ ghwotọ ro niri nẹ e sa nẹrhẹ ihwo efa vwo ẹruọ uyota na nẹ Ọmemama herọ. Jiro kẹ nẹ ọ reyọ aghwanre vẹ ona vwọ ta eta ọ da dianẹ ohwo ọvo vwo owenvwe rọ vwọ ta ota kpahen uyovwinrota na. Kerẹ udje, ọmọ isikuru sa tanẹ: “Obo re me mrẹ ọvo yen mi vwo imuẹro kpahan, me je mrẹ Ọghẹnẹ dẹvoo.” Eghene rọ dia Onenikristi sa vuẹ nẹ: “De vwẹ ẹwẹn roro nẹ wọ yan vwevunrẹ egbo ro sheri kẹ asan rẹ ihwo dia, wọ da mrẹ orhare ra tọnre, ra vwẹ ikoro vwo ru. Die yen cha djẹ ro owẹ ẹwẹn? Ọ da dianẹ orhare tiọyena kẹ wẹ imuẹro dẹn nẹ o vwo ohwo rọ tọnrọ, kẹ akpọ vẹ odjuvwu kugbe erọnvwọn rehẹ ayen vwo!” w24.12 18 ¶16