Avwanre vwo imuẹro nẹ kọke kọke Jihova de guẹdjọ rẹ ihwo yen o che vwo ruẹ obo ri shephiyọ? E! Kirobo rẹ Ebraham nabọ vwo ẹruọ rọyen, Jihova yen “Oguẹdjọ rẹ akpọ na” ro me vwo aghwanre, rọ pha gbagba, rọ je vọn vẹ arodọnvwẹ. O yono Ọmọ rọyen ji phi ẹdjọeguo na eje phiyọ obọ. (Jọn 5:22) Ọsẹ na vẹ Ọmo na riẹn obo rehẹ ubiudu ri kohwo kohwo. (Mat. 9:4) Ọtiọyena, kọke kọke rẹ ayen de guẹdjọ yen ayen che vwo “ru obo ri shephiyọ”! E jẹ a vwẹroso Jihova nẹ ọyen yen riẹn obo ri me yovwin. Avwanre riẹnre nẹ e muwan re vwo guẹdjọ rẹ ihwoo—ẹkẹvuọvo ọyen ọvo yen se ru ọtiọyen! (Aiz. 55:8, 9) Ọtiọyena avwanre ke yanjẹ ẹdjọeguo eje vwo vwọ kẹ vẹ Ọmọ rọyen, rọ dia Ovie rọ nabọ vwẹrokere arodọnvwẹ vẹ orhiẹn ọsoso rẹ Osẹ rọyen gbagba.—Aiz. 11:3, 4. w24.05 7 ¶18-19

Ọyen obo re ghanre a vwọ dia ohwo rọ ta uyota nẹ otọ rẹ udu cha. A mrẹ ọnana vughe ọke rẹ Filip vwọ reyọ ugbeyan rọyen Nathaniẹl bru Jesu ra. Dede nẹ Jesu je mrẹ Nathaniẹl dẹvoo, ọ da ta: “Nighere, vwọrẹ uyota, ọnana ohwo rẹ Izrẹl rẹ ophiẹnvwe vuọvo hẹ oma rọye-en.” (Jọn 1:47) Jesu mrẹ uruemu ra vwọ ta uyota ro rhe Nathaniẹl nẹ a mrẹ vwo djee. Kerẹ avwanre, Nathaniẹl ọyen ohwo rọ gbaree. Ẹkẹvuọvo o vwo uruemu rẹ omeru vuọvo vwẹ omaa. Uruemu nana yen nẹrhẹ Jesu jiri Nathaniẹl. Erọnvwọn buebun re vwerhen Jihova oma re djunute vwẹ Une rẹ Ejiro 15 shekpahen oborẹ avwanre vẹ ihwo efa yerẹn wan. Une rẹ Ejiro 15:3 tare nẹ ọrhorha vwẹ utughẹ ri Jihova “vwẹ unu rọye vwo miovwẹ-ẹ, . . . o ruẹ emu umwemwu kẹ ugbeyan rọye-e.” Siẹrẹ a da vwẹ ẹrenvwe avwanre vwọ ta eta ri je fo kirobo re djunute vwẹ obenu na, ọ sa so omaẹwan kẹ ihwo efa.—Jems 1:26. w24.06 10 ¶7, 9; 11 ¶10

Wọ da nabọ muegbe vwọ kẹ iruo aghwoghwo na, ẹwẹn wẹn ko che totọ ọke wo de ghwoghwo kẹ ihwo efa. Jesu vwẹ ukẹcha kẹ idibo rọyen vwọ nabọ muegbe tavwen o ki ji ayen re ghwoghwo. (Luk 10:1-11) Kidie nẹ idibo na reyọ obo ri Jesu yono ayen vwo ruiruo, ayen da mrẹ omavwerhovwẹn gangan vwo nẹ oborẹ ayen se ru vwẹ iruo aghwoghwo na. Mavọ yen avwanre se vwo muegbe vwọ kẹ iruo rẹ aghwoghwo na? Ofori nẹ avwanre roro kpahen oborẹ avwanre sa vwọ reyọ eta romobọ vwo ghwoghwo uyota na vwẹ idjerhe ro fiotọ. O ji fo nẹ avwanre roro kpahen erọnvwọn evo rẹ ihwo rẹ ekogho na sa ta yẹrẹ ru vẹ oborẹ avwanre che ru siẹrẹ emu ọtiọyena da phia. Ọtiọyena avwanre de ghwoghwo ota kẹ ihwo, e jẹ avwanre davwẹngba rere ẹwẹn avwanre totọ, avwanre me hwẹ je ta ota kerẹ igbeyan. w24.04 16 ¶6-7