Gazadara ko koukaro ou. Tu tante asi ove kuna kupapara yirugana yipo o pakere mbili epata lyoge, makura tava kutambura kuvali. Ove ngo konakona mauzera nagenye nokudivilisa asi yirugana musinke oyo, elikwamo lyoyirugana oyo ntani siruwo esi ngo genda yipo ngo ka sike, nayimwe hena. Momaukaro nagenye, yirugana oyo ya liza nonompango domoBibeli. Nampo kuvhura o hafere yirugana yokuhova morwa yiyo ono hara ndi nampo ayo kufuta nawa. Nye koyili yininke yimwe hena eyi wa hepa kugazadara ko komeho zokutura po etokoro. Pasihonena, yirugana oyo kuvhura ngayi kuninkise ngo dire kuza komapongo ndi? Yirugana oyo kuvhura ngayi kuninkise o dire kugwana siruwo sokuvatera vemepata lyoge va lizuvhe epopero noruhafo ntani va hedere pepi naJehova ndi? Mapuro ogo ngaga kuvatera o dive asi kukarera Jehova ntani epata lyoge, yiyo “yomulyo po unene” kupitakana kukondjera yimaliwa. Makura eyi ngayi kuninkisa o ture po etokoro eli nga tungika Jehova. w25.01 17 ¶11-13

Nampili vantu va ku rugane momudona, diworoka asi Jehova ga ku hara ntani ove muntu gomulyo unene kwendi. Nsene ove gumwe ogu wa ‘dompa mutjima,’ diworoka asi Jehova ga mwene yoyiwa momutjima goge yiyo ga ku kokera kwendi. (Joh. 6:44) Age ga liwapaikira nkenye apa kukuvatera morwa ove mulyo unene kwendi. Pokukonakona sihonena saJesus, ose kuvhura tu lirongere ko omu Jehova a lizuvhu. Apa Jesus ga kere pevhu, age kwa fililire nkenda vantu ava ngava tara asi kwato mulyo. (Mat. 9:9-12) Apa mukadi ogu ga kere nouvera wounene ga kere nehuguvaro asi na veruka nsene na kwata kosikoverero saJesus, age kwa mu hengagwidire nokumupandadeka kepuro eli ga kere nalyo. (Mar. 5:25-34) Jesus kuhonena nawa-nawa nkareso zoGuhwe. (Joh. 14:9) Diva asi Jehova ga ku hara, age hena kuhafera nkareso nepuro ntani neharo lyoge kwendi. w24.10 7 ¶4-5

Ndafita kwa ligwanekerere nomaudigu aga ga mu ninkisire a lire. Sinzi sovantu kwa mu nyengere kukwatera mo vakaume vendi vamwe ntani novanekoro ava va mu koresere. (1 Sam. 19:10, 11; 2 Sam. 15:10-14, 30) Age kwa uyungire asi: “Ame na roroka kokupikauka; sinene masiku, ame kuworeka uro wange nomahodi; musato gwange kuwora komahodi, mahodi kupupa apa ani rara.” (Epis. 6:6) Nampili ngomu Ndafita ga ligwanekerere nomaudigu, age gayi pulire nawa-nawa asi Jehova ga mu hara. Ano eyi ya mu ninkisire a tjange asi: “HOMPA ana zuvhu ezwi lyomalirankali gange.” (Epis. 6:8) Nonkango demetjangwa lyetu lyaneina kulikida nawa-nawa asi Jehova ga tu hara unene ntani ga kara nosinka omu atu lizuvhu. Ndafita gayi divire nawa-nawa asi Jehova ga mwene maudigu gendi ntani ga divire omu maudigu ogo ga mu koresere. w24.12 22 ¶11-12