YUVU YA ALEKE
E Bibila Aweyi Kilenda Kunsadisila?—Ndambu 1: Toma Zaya e Bibila Kiaku
“Yavanga programa za yantika tanga e Bibila, kansi vava yamona vo nkanda wanene, ediadi diangioyesa.”—Briana, una ye mvu 15.
Nga ongeye mpe i wau omonanga? E longi diadi dilenda kusadisa.
Ekuma mfwete tangila e Bibila?
Nga wolo okalanga wau wa tanga e Bibila? Avo i wau, zaya wo vo kuna ngeye mosi ko. Kadi e Bibila kina ye ulolo wa makaya mena ye sono yakete-kete ye ke una ye mafoto ko. Ke kilendi tezaneswa ko ye programa za TV yovo video za internete.
Ozevo, yindula diambu edi: Avo omwene nkela yankulu, nga kukala ye luzolo ko lwa zaya kana nkia lekwa ina muna kati?
E Bibila kina nze nkela yazala ye lusalu lwantalu. Muna ye ulolo wa tusalu twa ngangu tulenda kusadisa mu:
Baka nzengo zambote
Kala ye ngwizani ambote ye mase maku
Solola akundi ambote
Zizidila e ntokani
O nkanda wau wankulu aweyi ulenda kadila wamfunu mu lumbu yeto? Kadi “Sono yawonso yavumunuinua kwa Nzambi.” (2 Timoteo 3:16) Ediadi disongele vo malongi mena muna Bibila kwa Muntu osundidi e ngangu mu nza yawonso matuka.
Bibila kina nze nkela yazala ye ulolo wa tusalu twantalu
Aweyi ndenda tangila e Bibila?
Mpila yantete: Tanga e Bibila kiawonso. Ediadi dikusadisa mu zaya e nsangu zina muna Bibila. Vena ye mpila zayingi olenda wo vangila. Tala mpila zole zilenda kusadisa:
Olenda tanga e nkanda 66 mia Bibila, tuka muna nkand’a Tuku yamuna nkand’a Lusengomono.
Olenda tanga e Bibila mun’owu wa tusansu, i sia vo, una mambu mavangamena.
Lusadisu: E Nkudika A7 muna Nsekola ya Nz’ampa iyikanga mu ndandani e mambu mamfunu mavangama mu zingu kia Yesu vava kakala ova ntoto.
Mpila yazole: Tanga tusansu tuna ngwizani ye mambu onuananga mau. Muna bonga e nona:
Ngo zolele kala ye akundi akieleka? Tanga lusansu lwa Yonatane yo Davidi. (1 Samuele, kapu kia 18-20) I bosi, vava zaya e fu kakala yau Davidi ina yafila Yonatane mu kala nkundi andi.
Nga zolele kala yo nkuma muna sunda ntonta? Tanga lusansu lwa Yosefe luyikanga una kasundila e ntonta. (Tuku, kapu kia 39) I bosi, vava zaya kana nani wavana Yosefe nkuma mu sunda e ntonta.
Nga zolele zaya una e sambu kilenda kusadisila? Tanga lusansu lwa Nekemiya. (Nekemiya, kapu kia 1-2) Vava zaya e ziku kia nkum’a sambu ya Nekemiya.
Lusadisu: Avo se tanga e Bibila, ofwete kala va fulu kiavuvama kilenda kusadisa mu toma bakula mambu otanganga.
Mpila yatatu: Sola lusansu yovo kapu muna nkand’a nkunga, tanga yo badika una olenda sadila mana mena mo muna zingu kiaku. Vava omana tanga, ukiyuvula:
Ekuma kasonekesena lusansu lwalu mu Bibila?
Nkia fu ya Yave ndongokele muna lusansu lwalu yovo e mpila kevangilanga mambu?
Aweyi ndenda sadila mambu mama muna zingu kiame?
Lusadisu: Sikidisa e kani otangilanga Bibila. Soneka e lumbu ozolele yantika e programa aku ya tanga Bibila.