Okuti Onombongo Mbueta Vala Ovivi?

Ekumbululo lyo Mbimbiliya

Au. Ombimbiliya kayatile okukala nonombongo otyivi, tupu kayatile onombongo mbueta vala ovivi. Ovanthu vehole okuti “onombongo omwii wovipuka aviho ovivi.” Mahi Ombimbiliya hatyoko yapopia ngotyo. Ina yati: “Okuhumba onombongo omwii wovipuka aviho ovivi.”a— 1 Timotiu 6:10.

Oityi Ombimbiliya yapopia tyayemba konombongo?

Ombimbiliya yapopia okuti onombongo mbupondola okutukuatesako. Ine tulinga ovanthu vonondunge, vakwata nawa onombongo, mbupondola ‘okutuyakulila.’ (Eclesiastes 7:12) Atee umwe Ombimbiliya ipandula ovanthu vokuna otyali, vakuatesako vakuavo netyi vena. Iya pamwe otyipuka tupondola okuavela mukuetu tumukuateseko, onombongo. — Provérbios 11:25.

Mahi Ombimbiliya tupu yapopia okuti tuna okulunguka tuahalinge ovanthu vokuhole unene onombongo. Yati: ‘Muahahumbei unene onombongo, mahi hambukilwei ovipuka muna-vio pehepano.’ (Ova Hebeleu 13:5) Onondaka ombo mbutulongesa okuti tuna okuhambukilwa ovipuka tuna-vyo, ngetyi okulia, nomuvalo, nondyuo, atuahakalela vala okututumba tukale ovahona. — 1 Timotiu 6:8.

Oityi Ombimbiliya yapopia tuna okulunguka?

Ovanthu velungavi kamavakapewa omwenyo wahapu. (Ova Efesu 5:5) Omokonda yatyi? Tyimwe, omokonda omunthu welungavi uhika umwe kokufenda otyipuka ahanda. (Ova Kolosu 3:5) Otyikwavo, omokonda upondola umwe okulinga otyipuka ei nawa okuti tyapenga, opo amone vala etyi ahanda. Vamwe vanganala vakuavo, vamwe vaenda vakuavo konyima, vamwe atee umwe vaipaa vakuavo. Otyo Ombimbiliya yatila “wokuhanda vala liwa ouhona kakaviuka.” — Provérbios 28:20.

Pamwe omunthu wokuhole unene onombongo, kalingi ovipuka ovio ovivi, mahi upondola okukala novitateka ovikwavo. Ombimbiliya yapopia umwe nawa okuti “vana vatokola okukala ovahona, vatokela mokuyondyua no meliva, no momahando omanyingi outyova, anyona.” — 1 Timotiu 6:9.

Oviwa patyi tumona tyina tulinga etyi Ombimbiliya ipopia tyayemba konombongo?

Ine katulingi ovipuka twii umwe okuti ovivi tumone vala onombongo, matyiti umwe onthwe matukala nawa, Siovaa nae mahambukwa, etukuatesako. Huku wapopila ovanthu velikuatehila vemuhambukiswe, wati: “Ame nalumwe mandyikuyeke iya nalumwe mandyikusi-po.” (Ova Hebeleu 13:5, 6) Nkhele wapopia vali okuti “omunthu ulinga oviwa makayambwa.” — Provérbios 28:20.

Ono tesitu mbo Mbimbiliya mbupopia onombongo

Eclesiastes 7:12: “Onombongo mbuyakulila.”

Onondaka ombo mbahanda okutiwi? Tyina tukwata nawa onombongo, no onthwe muene tutula omutima.

Luka 12:15: “Namphila omunthu omuhona, omuenyo wae kautundu movipuka ena.”

Onondaka ombo mbahanda okutiwi? Hanondunge-ko okusuka unene onombongo mokonda kamambuketuyovola.

1 Timotiu 6:10: “Mokonda, ohole nomalumono omwii wovipuka aviho ovivi iya mokonda yokukala nohole oyo, ovanyingi vayapuka mekolelo, avelietela omaluihamo omanyingi.”

Onondaka ombo mbahanda okutiwi? Okukala nonombongo hatyivi-ko. Mahi ovanthu vokuhole unene onombongo velietela vala. Vamwe omaumbo avo ahanyauka-po, ava ovakuavo vavela mokonda yokuliipaa nokuundapa.

Ova Hebeleu 13:5: ‘Muahahumbei unene onombongo, mahi hambukilwei ovipuka muna-vio pehepano.’

Onondaka ombo mbahanda okutiwi? Hahe okupandula umwe vala etyi tuna-tyo, okulia, nomuvalo, nondyuo, tyipona okuliipaa nokuovola omalumono.

Mateusi 19:24: “Tyapepuka vali ekamelu okukuata meyulu lionguya, tyipona omunthu omuhona okunyingila Mouhamba wa Huku.”

Onondaka ombo mbahanda okutiwi? Etyi Sesusi apopia onondaka ombo, tete ankho wapopila omukuendye umwe ankho una-tyo alinge omulongwa wae, ngwe ehetavela. Okusapo omalumono ae ankho tyemupona! Pahe Sesusi apopi onondaka ombo alongese okuti omunthu upaka omalumono komutwe, Huku emupake konyima, upondola okukapumbwa omwenyo wahapu.

a The verse has also been rendered: “The love of money is a root of all sorts of injurious things.”