Er Nan Mbashiada mba Yehova Ve Eren Iniongo i Umbur Iyange i Mar Ga?

Mbashiada mba Yehova mba eren iniongo i umbur iyange i mar ga sha ci u se na jighjigh ser uiniongo mbara nahan doo Aôndo ishima ga. Er Bibilo i vende kwagh u umbur iyange i mar jighilii ga nahan kpa, i wase se u henen sha akaa agen sha kwagh u uiniongo mban kua gbenda u Aôndo a nengen ve la. Nenge akaa ne anyiin kua akaawan a Bibilo aa zough sha mi la.

1. Ka ior civir Aôndo ga yange ve hii kwagh u umbur iyange i mar la ye. Dikishenali i kômpeni u Funk & Wagnalls u gber, i yer ér Standard Dictionary of Folklore, Mythology, and Legend yô kaa ér yange ior hii uiniongo mban sha ci u ve na jighjigh ér ka a kuman sha iyange i i mar or la yô, “ujijingi mbabov ve due sha u va tan num sha a nan shi i lu u akaabo agen kpaa a fatyô u eren nan,” sha nahan yô, “azende a or shon ka a va lu vea nan, shi vea sônon ér ikyôr i doo nan yô, kwagh la a kura or shon.” Takeda u The Lore of Birthdays la di kaa ér ngise la, yange i gba u a nger akaa aa ze hemen sha iyange i mar u or la “hange hange sha ci u kwagh la a wase ior u fan akaa aa va er nan ken hemen yô.” Ka kwagh u mba “kenger asan kpehen ishor” ve ôr je la. Shi takeda ne kaa ér: “Ior na jighjigh ér ukyendor mba ka i tsar sha iyange i umbur mar u or la, ka i lu sha ci u doon nan ikyôr.”

   Nahan kpa Bibilo venda ahir a eren man ishor i kpehen man akombo a civir kua “ambaakaa ne.” (Duteronomi 18:14; Mbagalatia 5:19-21) Jighilii je yô, ityôkyaa môm i i ne ve Aôndo yange tim gar u Babilon yô, lu sha ci u ior mba ken gar la lu mba kenger asan kpehen ishor, man ieren ne kpa ka ahir a eren. (Yesaia 47:11-15) Mbashiada mba Yehova tume ityough keren ér saa vea fa mhii u hanma kwagh u ior ve eren ga; nahan kpa, Bibilo ka ia ôr kwagh sha ma ieren wang yô, se mba vende kwagh u Bibilo i ôr la ga.

2. Mbakristu mba tsuaa mbara yange ve ember iyange i mar ga. Takeda u The World Book Encyclopedia la kaa ér, “Mbakristu mba tsuaa mbara nenge mar ember ér ka kwagh u mbafanaôndoga.” Bibilo tese ér mbaapostoli kua ior mbagen mba Yesu tese ve la yange ve ver ikyav i i gbe u Mbakristu cii vea dondo yô.—2 Mbatesalonika 3:6.

3. Iyange i i gbe u Mbakristu vea umbur kpa ka iyange i mar ga, ka iyange i kuugh—ka ku u Yesu. (Luka 22:17-20) Kwagh ne a de kpiligh we iyol ga, sha ci u Bibilo kaa ér “iyange i kuugh hemba doon a iyange i maren or la.” (Orpasenkwagh 7:1) Shighe u Yesu lu shin tar ve kuma u una kpe la, Yesu lu a iti i dedoo sha ishigh ki Aôndo, sha nahan yô, iyange i ku na la hemba ngin a inja a iyange i mar na.—Mbaheberu 1:4.

4. Bibilo ter or u civir Aôndo môm u yange nan ember iyange i mar u nan ga. Bibilo hungur a hungur u teren or u civir Aôndo u yange nan ember iyange i mar u nan ga; kpa i ter kwagh u ior mbagen uhar mba yange ve ember iyange i mar ve yô, man lu mbacivir Aôndo ga. Shi u nenge yô, uiniongo mba yange ve er u umbur mar ve la kpa, i ôr kwagh ve ka sha gbenda u doon ga.—Genese 40:20-22; Marku 6:21-29.

Mbashiada mba Yehova mba ve mar mbayev yô, mba eren a mbayev vev dedoo er mbamaren mbagen kpa ve eren nahan, shi mba veren a ver shighe u tesen mbayev vev dooshima ga. Mba ne ve uiyua shi mba eren ve uiniongo hanma shighe cii. Ka ve nôngo u dondon ikyav i dedoo i Aôndo, u a ne mbayev nav akaa a dedoo hanma shighe la. (Mateu 7:11) Nahan mbayev mba mbamaren vev ve lu Mbashiada mba Yehova la, mba nengen ér kwagh ngu karen ve ga. Nenge ase akaa a mbayev mban mbagen ve ôr yô:

• “Er ior ve nan mo uiyua sha iyange i mar yam ga nahan kpa, mbamaren av ka ve nam iyua sha ashighe agen. Hemba doon mo nahan sha ci u ka ve va nam iyua la abur abur, nahan i saan mo iyol.”—Mkaanem ma Gregory, ngu anyom 11.

• “U hen wer miniti pue kua kyeeke man icam tseegh maa hingir iniongo jee? Wea soo yô, va hen ya wam, va nenge kwagh u a lu iniongo jim jim la!”—Mkaanem ma Eric, ngu anyom 6.