Die Yen Ẹko Rọvwẹrote Iruo rẹ Iseri ri Jihova?

Ẹko Rọvwẹrote na ọyen ẹmẹko rẹ Inenikristi ri tedje re vwẹ odjekẹ kẹ Iseri ri Jihova vwẹ asan rẹ akpọ na hẹre te. Ayen ru ọnana vwẹ idjerhe ivẹ:

• Ayen yen vwẹrote ọrhuẹrẹphiyotọ rẹ uyono ri Baibol ra vwọphia womarẹ ẹbe, emẹvwa vẹ isikuru rẹ Iseri ri Jihova.​​—⁠Luk 12:⁠42.

• Ayen vwẹrote iruo rẹ akpọeje rẹ Iseri ri Jihova ruẹ womarẹ odjekẹ rẹ ayen vwọphia kpahen iruo rẹ aghwoghwo na vẹ obo ra cha ghwọrọ itetoro rẹ ukoko na wan.

Ẹko Rọvwẹrote na nene udje rẹ “iyinkọn vẹ ekpako” rehẹ Jerusalẹm phi phiyotọ vwẹ ẹgbukpe ujorin rẹsosuọ, ayen brorhiẹn re pha ghanghanre vwọ kẹ ukoko na eje. (Iruo rẹ Iyinkọn Na 15:⁠2) Kerẹ eshare nana re fuevun na, ọ dia Ẹko Rọvwẹrote na yen isun rẹ ukoko na-a. Ayen nene odjekẹ ri Baibol na, rẹ ayen vwo rhiabọreyọ Jesu ri Jihova vwo mu kerẹ Ọgbuyovwin rẹ ukoko na.​​—⁠1 Kọrẹnt 11:3; Ẹfesọs 5:​23.

Iniọvo rehẹ Ẹko Rọvwẹrote na yen Kenneth Cook, Jr., Samuel Herd, Geoffrey Jackson, Stephen Lett, Gerrit Lösch, Anthony Morris III, Mark Sanderson, vẹDavid Splane. Ayen ga vwẹ esiri ukoko rẹ avwanre rọhẹ Warwick, New York, U.S.A.

Ẹko Rọvwẹrote na vwẹ umẹ esan vwo mu re vwẹrote ẹbẹre sansan rẹ iruo rẹ avwanre na, ayen ọvuọvo hẹ evunrẹ umẹ nana.

• Umẹ rẹ Erevwẹrote: Ayen yen vwẹrote eta rẹ urhi, je vwẹ ukẹcha phia ọke oghwọrọ de te iniọvo avwanre oma, ọke re de muẹ kpahan ayen fikirẹ oborẹ ayen segbuyota, vẹ eta okpakpa efa ri djobọte iniọvo avwanre.

• Umẹ Rọvwẹrote Iniọvo re Ga Vwẹ Bẹtẹl: Ayen yen vwẹrote ọdavwẹ rẹ orua ri Bẹtẹl.

• Umẹ Rọvwẹrote Ẹbe-Ẹteyọn vẹ Ekuakua Ukoko Na: Ayen yen vwẹrote ẹteyọn rẹ ẹbe rẹ ukoko na vẹ emuo rayen vwo rhe iniọvo na, ayen je vwẹrote ebabọn rẹ Eguan Ruvie, asan re de ruiruo rẹ efanfan, kugbe uwevwin ri Bẹtẹl.

• Umẹ Rọvwẹrote Iruo rẹ Ẹga Na: Ayen yen vwẹrote ọrhuẹrẹphiyọ rẹ aghwoghwo rẹ “iyẹnrẹ esiri” rẹ Uvie na.​—Matiu 24:14.

• Umẹ Rọvwẹrote Eyono: Ayen yen muegbe rẹ ekuakua re che vwo yono iniọvo na vwẹ emẹvwa vẹ isikuru, ọtiọyen ji te uhworo vẹ ividio.

• Umẹ Rosiẹ: Ayen yen vwẹrote esio rẹ ẹbe ra tayanphia na, kugbe e rehẹ wẹbsaiti avwanre, ayen yen je vwẹrote iruo rẹ efanfan.

Vwọba ewian nana eje, Ẹko Rọvwẹrote na vwoma kudughwrẹn kudughwrẹn fikirẹ ọdavwẹ rẹ ukoko na. Vwẹ omẹvwa na, ayen fuẹrẹn oborẹ Baibol na tare, je vwẹ uphẹn kẹ ẹwẹn ọfuanfon rẹ Ọghẹnẹ nẹ o sun ayen vwo brorhiẹn ro me yovwin.​​—⁠Iruo rẹ Iyinkọn Na 15:⁠25.

Ayen Inenikristi ra vwẹroso. (1 Kọrẹnt 4:⁠2) Ayen reyọ ẹgba vẹ erianriẹn rayen vwọ vwẹ ukẹcha kẹ umẹ rẹ Ẹko Rọvwẹrote ọvuọvo re phi ayen phiyọ na, ayen je vwomaba umẹ na vwẹ omẹvwa ri kudughwrẹn kudughwrẹn rẹ ayen ruẹ. Dede nẹ ayen vwobọ vwẹ orhiẹnbro-o, jẹ ayen vwẹ evuẹ vẹ uchebro eghanghanre vwọphia, ayen mi ru nene orhien rẹ umẹ bruru. Ọkiọvo, Ẹko Rọvwẹrote ji jẹ ayen bru iniọvo avwanre ra, vwẹ asan sansan vwẹ akpọ na, yẹrẹ ra vwẹ ota phia vwẹ omẹvwa rẹ kukpe kukpe yẹrẹ vwẹ ọke re de che wontọ vwẹ Isikuru rẹ Gilead.