Yu Tink Gaad Mi Yooz Evolooshan fi Kriyayt di Difrent Kaina Animal ahn Plaant Dehn?

No. Di Baibl seh playn ahn schrayt dat Gaad mek hyoomanz an aal di difrent kaina animal ahn plaant.a (Genesis 1:12, 21, 25, 27; Revilayshan 4:11) Ih seh dat aala di difrent rays a peepl kohn fahn jos wan set a payrents, Adam ahn Eev. (Genesis 3:20; 4:1) Soh di Baibl noh di seh dat Gaad yooz evolooshan fi mek aal di difrent rays, an ih noh yooz it fi mek aal di difrent kaina animal ahn plaant needa. Eena eech groop a plaant, animal, er peepl, ih naamal fi si sertn wan luk difrent er bihayv difrent; evolooshan noh need fi egzis fi mek dat hapm.

• Yu tink Gaad mi yooz evolooshan?

• Yu tink evolooshan ahn di Baibl kuda eva gree?

• Yu tink di fak dat som plaant an animal weh ku adap fi servaiv eena wahn sertn plays meen seh dat evolooshan chroo?

Peepl weh bileev dat Gaad mi yooz evolooshan eena kriyayshan ga lata difrent aidyaa bowt how hihn mi du dat. Som peepl bileev dat Gaad mek tingz soh dat onli di schrang servaiv, an onli bikaaz dehn aybl fi adap.

Dehn mait aalso bileev dehnya teechinz:

• Aal laif kohn fahn jos wahn fyoo tingz weh Gaad kriyayt.

• Wan kaina animal er plaant ku chaynj intu wahn kompleetli difrent kaina animal er plaant bikaaz a evolooshan.

• Gaad onli staat tingz ahn den mek evolooshan du di res.

Dehnya bileef goh gens weh di Baibl buk a Genesis seh bowt kriyayshan. Bot wen Jeezas mi deh pahn ert, hihn mi menshan tingz fahn Genesis az paat a fi hihn teechinz. (Genesis 1:26, 27; 2:18-24; Machyu 19:4-6) Di Baibl tel wi dat bifoa Jeezas mi kohn dong pahn ert, hihn mi liv da hevn, ahn hihn mi werk lang wid Gaad fi mek evriting weh egzis. (Jan 1:3) Soh di aidyaa dat Gaad mi yooz evolooshan afta kriyayshan noh reeli gree wid dehnya Baibl pasij.

Di Baibl noh gi wi eni deetaylz bowt humoch di difrent kaina plaant an animal dehn ku adap ahn chaynj. Bot wi doo noa dat difrent kaina plaant an animal ku chaynj how dehn luk er bihayv bays pahn wehpaat dehn liv er hoo da dehn payrents (eena di kays a animal). Di Baibl noh seh notn gens dat, in fak, dat mek sens an ih gree wid weh di Baibl seh. Eevn doa som peepl si dat az wahn kaina evolooshan, no nyoo laif er groop a plaant er animal kom owta it. Dehn stil stay az paat a wahn sertn “kaina” plaant er animal.