Hanga Wimbulule Yesu, Pwako . . .

Amu apwile mutu mungunu, Yesu kakapalikile mu kapinda mweswe atu akupalika. Nihindu, kasolwele keke kuli atu. Kalihanyine hanga aakwase ni kwalingila yuma yize akunyonga ngwe yili yikalu. Kwamba umwenemwene, keke yamukwashile hanga alihane kukwasa atu. Tala yilweza yikwo ha Tupitulu 32, 37, 57, 99.

Atu eswe, akweze ni makulwana, kapwile ni kuhanjika ni Yesu mumu iye te keshi kulisolola ngwe mutu yoze uli ni yuma yinji yakulinga hanji kali mulemu chinji. Atu kapwile ni kulivwa kanawa ni Yesu mumu iye te kakusolola ngwo kakulihulumba hali ayo. Tala chize iye alingile ha Tupitulu 25, 27, 95.

Yesu kapwile ni kulemba chinji ni mbunge yenyi yeswe chipwe muze apwile ukawenyi hanji ni tumbaji twenyi. Iye kapwile ni kulemba mashimbu eswe hi wika ko ha mashimbu akulia. Iye kapwile ni kulemba kuli Tato hanga amusakwilile, kumuwayila ni kumwita usongwelo shimbu kanda achikwata chimwe chiyulo chilemu. Tala yilweza ha Tupitulu 24, 34, 91, 122, 123.

Ha mashimbu amwe, chipwe ngwe te kanafupu kuhwima, Yesu kapwile ni kusa upale wa akwo kulutwe kuhiana wa iye mwene. Kakapwile ni nyonga ngwo “mutangu yami.” Ha chikuma chino Yesu katuhichikile chilweza chipema chize mutuhasa kwimbulula. Hengwola chikuma chino ha Tupitulu 19, 41, 52.

Yesu kakalongesele wika ngwo twatamba kukonekena akwetu. Alioze, Iye kasolwele ngwo kali mukwa-kukonekena ha chize apwile ni kutwama ni tumbaji twenyi ni atu akwo nawa. Pukuna ha yilweza yize yili ha Tupitulu 26, 40, 64, 85, 131.

Umwe uprofeto unambe ngwo A-Yunda te malituna kutayiza Mesaya nawa akwa-kole jenyi te mamushiha. Chino te muchitwala Yesu kulitwamina kulingila atu yuma yinji. Alioze, ni mbunge yenyi yeswe iye yalihana chinji hanga akwase uwayilo wamwenemwene. Chilweza cha Yesu chakupwa mukwa-kulihana, chakukwasa Akwa-Kristu musono waze akupalika mu yuma ya katonde ni yihungumiona. Tala Tupitulu 16, 72, 103.

Yesu kahianyine atu eswe mu yuma yinji ngwe mu yinyingi ni mana. Ha kupwa mungunu iye kapwile ni mana, mujimba ni utotombo upema chinji kuhiana atu eswe. Chipwe chocho, kapwile ni kulikehesa ha kulingila akwo ni mbunge yeswe. Tala Tupitulu 10, 62, 66, 94, 116.

Muze tumbaji twenyi te akuhengesa ha kumwimbulula hanji ha kukaula shimbi jenyi, Yesu kapwile kusolola uhomboloji. Iye kapwile ni kwalongesa yuma yize te anafupiwa hanga akundame kuli Yehova. Nyonga ha chize Yesu asolwele uhomboloji ha Tupitulu 74, 98, 118, 135.