Reinomanta willajkuna tribunalesman chayanku

1, 2. 1) ¿Imatataj religionta kamachejkuna willayta sayachinankupaj ruwarqanku, apostolesrí imatataj ruwarqanku? 2) ¿Imaraykutaj apóstoles willallarqankupuni?

KAY 33 watapi Pentecostés pasayta, Jerusalén qotuchakoyqa niraj unaychu sayarichisqa kasharqa. Satanastaj niraj sinchʼi sayasqa kashajtin chinkachiyta munarqa. Chaypajqa religionta kamachejkunata tanqarqa niña willajta saqenankupaj. Jinapis apostolesqa mana manchachikuspa willallarqankupuni, “Señorpi creejkunamantaj astawan yapakusharqanku qharis, ajinallataj warmispis” (Hech. 4:18, 33; 5:14).

² Apostolespa enemigosninkoqa, mayta phiñakuspa carcelman wisqʼaykucherqanku. Chaywanpis Jehovaj ujnin angelnin, chay tutapacha cárcel punkuta kicharpayarqa, qʼayantintaj apostolesqa willashallarqankutaj. Soldadosrí watejmanta japʼispa autoridadesman aparqanku. Autoridadestaj apostolesta juchacharqanku kamachisqankuta pʼakishasqankumanta. Apostolesqa mana manchachikuspa nerqanku: “Diostapuni astawanqa kasunayku tiyan, runasta kasunaykumantaqa”, nispa. Autoridadesqa, mayta phiñakuspa apostolesta wañuchiyta munarqanku. Chay jinapi kashajtinku jatun juntamanta leymanta yachachej Gamaliel sutiyoj runa, autoridadesta nerqa allinta qhawarikunankuta, yuyaycharqataj: “Ama ni imanaspalla, kay runasta kacharipuychej”, nispa. Tʼukunapaj jina, autoridadesqa kasorqanku, apostolestataj kachariporqanku. ¿Imatá apóstoles ruwarqanku? Paykunaqa, mana manchachikuspa sumaj willaykunata “Cristo Jesusmanta yachachi[llarqankupuni]” (Hech. 5:17-21, 27-42; Pro. 21:1, 30).

3, 4. 1) ¿Imatá Satanás unaymantapacha Diospa llajtanpa contranpi ruwarqa? 2) ¿Imamantataj kay yachaqanapi chantá 14, 15 yachaqanaspi yachakusun?

³ Cristianosqa, 33 watapi ñaupaj kutirayku juchachasqa karqanku, chaytaj mana chay kutillachu karqa (Hech. 4:5-8; 16:20; 17:6, 7). Kunanpis, Satanasqa enemigosninchejta tanqallantaj willayninchejta sayachinanpaj. Chayrayku Diospa llajtantaqa, imamantapis juchachashallanku. Enemigosninchejqa yuyanku, chʼajwata rikhurichisqanchejta, gobiernospa contranta oqharikusqanchejta, muyuchispa vendejkuna kasqanchejta ima. Chaywanpis, qhasimanta juchachawasqanchejta rikuchinapaj, maychus tiemponpi tribunalesman quejakorqanchej. ¿Chayrí qhasipajchu karqa? Kay pasaj wataspi tribunalespi imastachus nikusqan, ¿yanapawanchejchu? Sumaj willaykunata sutʼinchakunanpaj, cheqa kasqanta rikuchikunanpajtaj imaynatachus yanapasqanmanta, wakinta qhawarina (Fili. 1:7).

⁴ Kay yachaqanapeqa ukhuncharisun, willayninchejta jarkʼajtinkupis imaynatachus atipasqanchejta. Kay 14, 15 yachaqanaspitaj ukhuncharisun, kay pachamanta tʼaqasqa kausakuyta munasqanchejrayku, Reinoj kamachisqanman jinataj puriyta munasqanchejrayku, tribunalesman chayasqanchejta.

 5. Kay 1930 watas tukukuynejta, ¿imaraykutaj Diospa Reinonmanta willajkunata wisqʼaykorqanku, imatataj ruwarqanku Diospa llajtanta ñaupajman apaj hermanos?

⁵ Kay 1930 watas tukukuynejta Estados Unidospi tukuy autoridades, Jehovaj testigosninta willanankupaj uj permisota orqhochiyta munarqanku. Hermanostaj mana orqhorqankuchu, imajtinchus uj permisoqa uj tiempollapaj. Chantapis sutʼita yacharqanku, Jesús cristianosman Diospa Reinonmanta willanankuta kamachisqantaqa, ni mayqen gobierno chinkachiyta atisqanta (Mar. 13:10). Chayrayku Diospa Reinonmanta willajkunata ashkhasta wisqʼaykorqanku. Chaynejta Diospa llajtanta ñaupajman apaj hermanosqa tribunalesman rerqanku. ¿Imapaj? Testigosta religionninkuman jina kausanankuta, gobiernos jarkʼasqankoqa mana leyesman jinachu kasqanta rikuchinankupaj. Kay 1938 watapitaj ni jaykʼaj jina, uj juicio ruwakorqa. ¿Imamantá?

6, 7. ¿Imataj uj familiawan karqa?

⁶ Kay 1938 watapi 26 abril killapi martes paqarinpi, uj familia pʼunchaynintinta willaj riporqanku New Haven llajtaman (Connecticut). Paykunaqa sutikorqanku Newton Cantwell, pichus 60 watayoj karqa, warmintaj Esther, wawasnintaj Henry, Russell, Jesse ima, tukuyninku precursores especiales karqanku. Paykunaqa mana chay pʼunchaypacha wasiman kutinankupaj jinachu llojserqanku. Imaraykuchus ashkha kutispiña wisqʼaykuchikusqanku, ujtawan wisqʼaykuchikunankutataj yuyarqanku. Jinapis Diospa Reinonmanta willaytaqa munallarqankupuni. New Haven llajtamanqa, iskay autospi rerqanku. Hermano Newtonqa ujnin autota aparqa, publicacionesniyojta, tocadiscosniyojta ima. Ujnin autotataj Henry aparqa, parlantesniyojta, pichus 22 watayoj karqa. Yuyasqankuman jinataj, niraj unayta willashajtinku policía rikhurimuspa sayacherqa.

⁷ Ñaupajtaqa Russellta wisqʼaykorqanku, pichus 18 watayoj karqa, chantá Newtonta, Esthertawan. Jesseqa pichus 16 watayoj karqa, tatasninta hermanonta ima policía apakapusqanta rikorqa. Henry waj lugarpi willashasqanrayku, Jesseqa sapallan qhepakorqa, jinapis tocadisconwan willallarqapuni. Iskay católico runasqa hermano Rutherfordpa “Enemigos” nisqa umallirichiyninta uyariyta munallarqanku, uyariytawantaj mayta phiñakuspa Jesseta maqayta munarqanku. Payqa mana phiñakuspalla chaymanta riporqa, ratonmantaj uj policía apakapullarqataj. Policiaqa hermana Estherpa contranpi ni ima juchata tarerqachu. Chaywanpis qosantawan, wawasnintawanqa juchayoj kasqankuta nerqa. Jinapis chay pʼunchaypacha pagaspa llojsiporqanku.

 8. ¿Imaraykutaj tribunal Jesseta juchacharqa?

⁸ Killasninmantaj 1938 watapi septiembre killapi, familia Cantwellqa, New Haven llajtapi kaj tribunalman rerqanku. Newtonta, Russellta, Jesseta imaqa mana permisollawan qolqeta mañasqankumanta juchacharqanku. Chantá Connecticut llajtapi Tribunal Supremo nisqaman quejakojtinkupis, Jessetaqa chʼajwata rikhurichisqanmanta juchacharqanku. Imaraykuchus chay iskay católico runas Tribunalpi nerqanku, uyarisqanku umallirichiy religionninkuta pisipaj qhawachisqan phiñakunapaj jina kasqanta. Diospa llajtanta ñaupajman apaj hermanostaj, Estados Unidospi Tribunal Supremo nisqaman rerqanku, mayqenchus aswan kuraj autoridad.

9, 10. 1) Estados Unidosmanta Tribunal Supremo, ¿imatá nerqa familia Cantwellta juzgakushajtin? 2) ¿Imaynatá chay yanapashallawanchejpuni?

⁹ Kay 1940 watapitaj 29 marzo killamantapacha Tribunal Supremo nisqapi kamachej Charles Evans Hughes, pusaj juezkunapiwan uyarerqanku, hermano Hayden Covington sutʼinchasqanta. Payqa, Jehovaj testigosninpa abogadon karqa.a Connecticut llajtamanta fiscal, Jehovaj testigosnin chʼajwasta rikhurichejkuna kasqankuta rikuchiyta munashajtin, ujnin juez taporqa: “Cristo Jesuspa willasqanpis nillataj allinpaj qhawasqachu karqa, ¿icharí?”, nispa. Fiscaltaj nerqa: “Arí, chantapis yuyarikusqayman jinaqa, Bibliapi nillantaj Jesús willasqanrayku imapichus tukusqanta”, nispa. ¡Chay nisqanqa cheqapuni karqa! Chay fiscalqa, mana reparakuspalla Jehovaj testigosnin, Jesús jina kasqankuta nerqa, juchachajkunataj Jesusta qhatiykachajkuna jina. Kay 1940 watapi 20 mayo killapi, chay Tribunalpi, Jehovaj testigosnin mana juchayojchu kasqankuta nikorqa.

¹⁰ Tribunalpi nikusqanqa yanaparqa, ley nisqanman jina, runas ima religionniyojpis kayta atinankupaj. Jinamanta ni mayqen autoridad jarkʼayta aterqañachu. Chantapis Tribunalpeqa nikorqa, Jessej ruwasqanqa mana “chʼajwata rikhurichinanpaj jinachu” kasqanta. Chaytaj rikucherqa, Jehovaj testigosnin mana chʼajwata rikhurichejkunachu kasqankuta. Chay juiciopi atipakusqanqa Diospa kamachisninpaj, ¡may sumaj karqa! ¿Yanapashallawanchejpunichu? Uj abogado, pichus Jehovaj testigon, jinata nerqa: “Religionninchejman jina kausayta atisqanchejrayku, maypichus tiyakunchej chaypi tukuy runasman sumaj willaykunata willayta atinchej, qhasimanta juchachanawanchejta mana manchachikuspa”.

11. ¿Imatataj Canadá suyumanta hermanosninchej ruwarqanku, imaraykutaj?

¹¹ Kay 1940 watas chaynejpi Jehovaj testigosninta Canadá suyupi sinchʼita qhatiykachakorqa. Chayrayku, hermanosqa 1946 watapi 16 pʼunchaykunata uj tratadota jaywarqanku, chay suyupi religionta pisipaj qhawasqankuta tukuy runas yachanankupaj. Chay tratadoqa sutikorqa El odio ardiente de Quebec a Dios y Cristo y la libertad es la vergüenza de todo Canadá, tawa paginasniyojtaj karqa. Chaypeqa parlasharqa, Quebec provinciamanta Jehovaj testigosninta, llulla religionta kamachejkuna, policías, sajra runas ima ñakʼarichisqankumanta. Tratadopi kayta nerqa: “Jehovaj testigosnintaqa wisqʼakushallanpuni, chaytaj mana leyman jinachu. Gran Montreal japʼiypeqa Jehovaj testigosninpa contranpi 800 quejas jinaraj tiyan”, nispa.

12. 1) ¿Imatataj ruwarqanku chay tratadota jaywakushasqanman churanakojkuna? 2) ¿Imamantataj hermanosta juchacharqanku? (Sutʼinchaynintawan qhawariy.)

¹² Maurice Duplessis, pichus Quebec provinciamanta kuraj kaj ministro karqa, católico cardenal Villeneuve nisqawan ujchaykukuspa, chay tratadota orqhosqankumanta Jehovaj testigosninpaj maytapuni phiñarikorqa. Chayrayku contrankupi 800 quejasmanta 1.600 quejasman yapakorqa. Uj precursora nin: “Policiaqa ashkha kutista wisqʼaykuwarqayku, mashkhachus kasqanta niña yuyakunichu”, nispa. Hermanosta chay tratadota jaywashajta taripaspaqa, churanakuyman tanqaj papelta jaywashasqankuta nispa juchachaj kanku.b

13. ¿Pikunataj gobiernoj contranpi oqharikuymanta ñaupaj kutirayku juzgachikoj hermanos karqanku, imatataj tribunalpi nikorqa?

¹³ Kay 1947 watapi, gobiernoj contranpi oqharikuymanta ñaupaj kutirayku juzgachikoj hermanosqa, Aimé Boucher, iskay warmi wawasnin ima karqanku. Ujnin sutikorqa Gisèle 18 watayoj, ujnintaj Lucille 11 watayoj. Paykunaqa El odio ardiente nisqa tratadota wasinku qayllapi runasman jaywasharqanku. Chaywanpis mana chʼajwata rikhurichinankupaj jinachu karqanku. Hermano Aiméqa mana jatunchakoj runachu karqa, campopitaj llankʼakoj, Quebec llajta japʼiypi. Wakin kutilla llajtaman carretanpi rej. Paykunaqa chay tratadopi nishasqanmanta, wakin imasta muchorqanku. Juezqa, hermanosta chejnikusqanrayku mana juchayojchu kasqanku sutʼi kajtinpis, fiscalpa nisqanta valecherqa. Chay fiscalqa nerqa, chay tratado chejninakuyman tanqasqanta, familia Bouchertaj juchachasqa kananta. Juezqa, kaytapis nishanman jina karqa: cheqa kajta neyqa jucha kasqanta. Hermano Aimé, wawan Gisèle imaqa, churanakuyman tanqaj papelta jaywashasqankumanta juchachasqa karqanku. Lucille imillitantapis iskay pʼunchayta wisqʼaykorqanku. Paykunaqa, Canadá suyupi Tribunal Supremo nisqaman quejakoj rerqanku, mayqenchus aswan kuraj autoridad karqa, chaypitaj uyarisqa karqanku.

14. ¿Imatataj Quebec provinciamanta hermanos ruwarqanku qhatiykachasqas kashaspa?

¹⁴ Quebec provinciapi hermanosqa sinchʼi qhatiykachasqas, maqasqastaj kaspapis, mana manchachikuspa Diospa Reinonmanta willallarqankupuni. Chaytaj mana qhasichu karqa. Chay tratadota 1946 watamantapacha tawa watasta runasman jaywasqankupi, Quebec provinciapi Testigosqa kinsa pachajmanta waranqaman yapakorqanku.c

15, 16. 1) Canadá suyumanta Tribunal Supremo nisqapi, ¿imatataj nikorqa familia Boucher juzgasqa kashajtin? 2) ¿Imaynatataj chaypi atipakusqan hermanosta yanaparqa chay suyupi, waj suyuspipis?

¹⁵ Kay 1950 watapi junio killapi, Canadá suyupi Tribunal Supremo nisqapi jisqʼon jueces, hermano Aimeta juzgarqanku. Sojta killanmantaj, 1950 watapi 18 diciembre killapi hermano Aimé mana juchayojchu kasqanta nikorqa. Hermano Glen How, pichus Jehovaj testigosninpa abogadon karqa, Tribunalpi imaraykuchus chayta nikusqanta sutʼincharqa. Tribunalpeqa Jehovaj testigosnin mana gobiernoj contranpi jatuchaj chʼajwasta rikhurichejkunachu kasqankuta sutʼita repararqanku. El odio ardiente nisqa tratadotaj “mana chay imasmantachu parlasharqa, chayrayku chaypi nisqanqa mana juchachu karqa”. Hermano Glen nillarqataj: “Chay tribunalpi atipanaykupaj Jehová yanapawasqaykuta sutʼita rikorqani”, nispa.d

¹⁶ Tribunal Supremo nisqapi nikusqanwanqa, Diospa Reinon atiparqa. Imaraykuchus Quebec provinciapi Testigospa contranpi 122 quejasqa qhasillaña karqa. Chantapis Canadá suyupi, Commonwealth nisqamanta suyuspi ima tiyakojkunaqa, gobiernoj ruwasqanmanta imaschus mana allin kasqanta rejsichiyta atinkuman karqa. Chantá Iglesiapis, Quebec provinciamanta gobiernopis, Jehovaj testigosninpa ruwayninkuman niña churanakuyta aterqankuchu.e

17. ¿Imaynatataj wakin gobiernos willayninchejta jarkʼayta munanku?

¹⁷ Jehovaj kamachisnenqa ñaupa tiempomanta cristianos jinallataj mana “Diospa Palabranta qʼewirispa” vendejkunachu kanchej (2 Corintios 2:17 leey). Jinapis wakin gobiernosqa, willasqanchejmanta impuestota paganapaj leyesta orqhochispa jarkʼayta munawanchej. Iskay demandasmanta parlarina. Chaykunapeqa, Jehovaj testigosnin muyuchispa vendejkunachus chayri Diospa Reinonmanta willajkunachus kasqanchejta sutʼinchakorqa.

18, 19. ¿Imatataj Dinamarca suyumanta autoridades willayninchejta jarkʼanankupaj ruwarqanku?

¹⁸ Dinamarca. Uj ley nerqa, publicacionesta mana permisoyojta muyuchispa vendey ni imarayku atikusqanta. Chay leytataj 1932 watapi 1 octubre killamantapacha juntʼachikorqa. Hermanosninchejtaj mana uj permisota orqhorqankuchu. Qʼayantenqa Roskilde llajtitapi phishqa hermanos willasharqanku. Chay llajtitaqa Copenhague llajtaj japʼiyninpi kasharqa 30 kilometrosninpi jina. Chʼisiyaytataj August Lehmann mana karqachu. Paytaqa mana permisollawan vendesqanmanta juchachaspa wisqʼaykusqanku.

¹⁹ Kay 1932 watapi 19 diciembre killapi, hermano August Lehmannqa uj tribunalpi juzgasqa karqa. Chay hermanoqa sutʼincharqa, Bibliamanta orqhosqa publicacionesta runasman jaywasqanta, nitaj vendesqantachu. Tribunalpeqa payta creerqanku, nerqankutaj: “Payqa [...] kausananpaj llankʼayta atin, nitaj qolqeta japʼerqachu, nitaj chaytachu munarqa; astawanpis ruwasqanwanqa kapusqanta ima chinkacherqa”, nispa. Tribunalqa Jehovaj testigosninta atipacherqa, nikorqataj hermano Lehmannpa ruwasqanqa mana “vendey jinachu” kasqanta. Jinapis Diospa llajtanman churanakojkunaqa, suyuntinpi willayta sayachiytapuni munarqanku (Sal. 94:20). Chayrayku fiscalqa, chay suyupi Tribunal Supremo nisqakama chayarqa. ¿Imatá hermanos ruwarqanku?

20. ¿Imatataj Dinamarca suyumanta Tribunal Supremo nisqapi nikorqa, imatataj hermanosninchej ruwarqanku?

²⁰ Tribunal Supremo nisqapi juzgakushasqan semanapi, Dinamarca suyumanta tukuy hermanos astawan willasharqanku. Kay 1933 watapi 3 octubre martes pʼunchaypi Tribunal Supremo nisqapeqa, chay ñaupaj tribunalpi jinallataj nikorqa: hermano August Lehmann leyesman jinalla ruwasqanta. Chayrayku hermanosqa willayta atillarqankupuni. Jehovaman agradecekunankupajtaj astawan willarqanku. Chay kutimantapacha Dinamarca suyupi hermanospa willayninkumanqa niña gobierno churanakorqachu.

21, 22. Estados Unidospi Tribunal Supremo nisqapi, ¿imatataj nikorqa hermano Murdock juzgasqa kashajtin?

²¹ Estados Unidos. Kay 1940 watapi 25 febrero domingo pʼunchaypi, Robert Murdock pichus precursor karqa, qanchis hermanospiwan Jeannette llajtitapi willashaspa wisqʼaykuchikorqanku. Chay llajtitaqa Pittsburgh qayllapi kasharqa, Pensilvania llajta japʼiypi. Paykunataqa, publicacionesta jaywanankupaj mana uj permisota orqhosqankumanta juchacharqanku. Estados Unidospi Tribunal Supremo nisqaman chayarqanku, chaypitaj uyarisqa karqanku.

²² Tribunal Supremo nisqaqa, 1943 watapi 3 mayo killapi Jehovaj testigosninman kutikorqa. Chay Tribunalpeqa mana uj permisota orqhonapunichu kasqanta nikorqa. Imajtinchus chay permisoqa paganapaj karqa “chaytaj mana Constitución Federal nisqaman jinachu karqa”. Chantapis Tribunal Supremo nisqaqa, chay llajtapi uj leyta orqhokusqanta chinkacherqa. Imaraykuchus chay leyqa “radionejta, telenejta, waj imasnejta ima, sutʼinchayta religionniyoj kaytapis mana atikusqanta nisharqa”. Tribunalpi casi tukuynin juecespa nisqankuta willashaspa, juez William Orville Douglas Jehovaj testigosninpa ruwayninkumanta nerqa: “Ruwayninkoqa, mana willayllachu, nitaj Bibliamanta publicacionesta runasman saqeyllachu. Manaqa iskaynintapuni ruwanku [...] Chay ruwasqankutaqa, imaynatachus iglesiaspi tantakuyta, chaypi parlakusqantapis jatunpaj qhawakun, [...] ajinallatataj qhawakunan tiyan”, nispa.

23. ¿Imaraykutaj 1943 watapi tribunalespi atipasqanchej noqanchejpaj sumajpuni karqa?

²³ Tribunal Supremo nisqapi atipasqanchejqa, Diospa llajtanpaj sumajpuni karqa. Chaypeqa sutʼita rikuchikorqa willaj cristianos kasqanchejta, nitaj vendejkunachu. Chay pʼunchaypi 1943 watapi Jehovaj testigosnenqa, Tribunal Supremo nisqapi 13 demandasmanta 12 demandaspi atiparqanku, hermano Murdock demandantapis. Chay atipasqanchejqa, kay tiempopi watejmanta demandaspi atipanapaj yanapawanchej. Imajtinchus enemigosninchejqa, tukuynejpi, wasimanta wasitaj Diospa Reinonmanta willasqanchejman churanakullankutaj.

24. ¿Imatataj ruwanchej uj gobierno willayninchejta jarkʼajtin?

²⁴ Jehovaj kamachisnenqa, Reinonmanta willajta gobiernos saqewasqanchejmanta, mayta agradecekunchej. Willajta jarkʼawajtinchejtaj atisqanchejman jina, waj jinasmanta willanchej. Apóstoles jinataj ninchej, “Diostapuni astawanqa kasunayku tiyan, runasta kasunaykumantaqa” (Hech. 5:29; Mat. 28:19, 20). Chantapis ruwayninchejta jarkʼawajtinchejqa autoridadesman rinchej. Kunanqa iskaymanta parlarina.

25, 26. ¿Imaraykutaj Nicaragua suyupi Corte Suprema de Justicia nisqaman chayakorqa, imataj chayrayku karqa?

²⁵ Nicaragua. Kay 1952 watapi 19 noviembre killapi, hermano Donovan Munsterman, Managua llajtapi Departamento de Inmigración nisqaman rerqa. Payqa sucursalpi kamachej, misionerotaj karqa. Paytaqa, capitán Arnoldo García nisqajpaman rinanta kamacherqanku, pichus chay oficinamanta cargoyoj karqa. Arnoldoqa, hermanoman nerqa, Jehovaj testigosnin Nicaragua suyupi “yachakusqankumanta manaña willayta, nitaj religionninkumanta yachachiytapis atisqankuta”. ¿Imaraykú? Chay capitán nisqanman jinaqa, Jehovaj testigosnin willanankupaj ministro de Gobierno y Religiones nisqamanta mana permisoyojchu karqanku. Chantapis comunista partidomanta kasqankuta nikorqa. ¿Pitaj ajinata tumpasharqa? Católico religionta kamachejkuna.

²⁶ Hermano Donovanqa, Ministerio de Gobierno y Religiones nisqaman rerqa, Anastasio Somoza García presidentejman ima, qhasillataj karqa. Chayrayku hermanosqa, Tantakuna Wasita wisqʼapuspa juchʼuy qotitusllapi tantakorqanku, niña callespi willarqankuchu, jinapis waj jinasmanta willallarqankupuni. Chantapis paykunaqa, Nicaragua suyumanta Corte Suprema de Justicia nisqaman chayarqanku willajta saqenankuta mañakuspa. Periodicospitaj Testigosta qhatiykachakusqanmanta, imatachus paykuna mañakusqankumantawan ashkhata willakorqa. Corte Suprema nisqataj uyarinanta nerqa. Kay 1953 watapi 19 junio killapi Corte Suprema nisqaqa, Testigos mana juchayojchu kasqankuta nerqa. Chantapis Corte Suprema nisqapeqa Jehovaj testigosninta jarkʼakusqan mana leyman jinachu kasqanta nikorqa. Leyman jinaqa, runas parlanankupaj derechoyoj karqanku, concienciankuman jina ajllayta aterqanku, imapichus creesqankumantapis parlayta aterqanku. Chantapis Corte Suprema nisqaqa kamacherqa, Nicaragua gobiernowan, Testigoswan allinyakunankuta.

27. ¿Imaraykutaj Nicaragua suyupi tiyakojkuna tʼukorqanku Corte Suprema nisqa Testigosman kutikusqanmanta? ¿Imaynatataj chaypi nikusqanta hermanosninchej qhawarqanku?

²⁷ Chay suyupi tiyakojkunaqa, Corte Suprema nisqa Jehovaj testigosninman kutikusqanmanta tʼukorqanku. Chay kutikamaqa, religionta kamachej may atiyniyoj karqa, chayrayku Corte Suprema nisqaqa mana churanakuyta munajchu. Gobiernopi llankʼajkunapis, may atiyniyoj karqanku, chayrayku Corte Suprema nisqaqa wakin kutilla nisqankuman churanakoj. Hermanosqa sutʼita rikorqanku, Reyninkoj yanapaynillanwan, mana saqespa willasqankuraykutaj atipasqankuta (Hech. 1:8).

28, 29. Kay 1985 wata chaynejta, ¿imataj Zaire suyupi karqa?

²⁸ Zaire. Kay 1985 wata chaynejta Zaire suyupi 35.000 Testigos karqa (kunanqa República Democrática del Congo). Reinoj llankʼaynin ñauparishasqanrayku, sucursalqa waj edificiota ruwachisharqa. Kay 1985 watapi diciembre killapi ashkha suyuspaj jatun tantakuy ruwakorqa, Kinsasa llajtaj pelota canchanpi. Chaymanqa, 32.000 runas tukuy suyusmanta rerqanku. Jinallapi Jehovaj kamachisnenqa, waj imaspi rikukorqanku. ¿Imataj karqa?

²⁹ Chay kutipi, Quebec provinciamanta (Canadá) Marcel Filteau sutiyoj misionero, Zaire suyupi sirvisharqa. Payqa Duplessis nisqa kamachishajtin qhatiykachasqa kasqa. Imachus Zaire suyupi kasqanmanta Marcel nin: “Kay 1986 watapi 12 marzo killapi willayta ñaupajman apaj hermanosman uj carta chayamorqa, maypichus nisharqa Zaire suyupi Jehovaj testigosnenqa mana leyman jinachu kashasqankuta”, nispa. Chaytataj firmaykusqa chay suyumanta presidente Mobutu Sese Seko.

30. Comité de Sucursal nisqamanta kajkuna, ¿imatataj ruwananku karqa?

³⁰ Qʼayantintaj radiopi jinata willakorqa: “Niña jaykʼajpis [Zaire suyupi] Jehovaj testigosninmanta uyarisunchu”, nispa. Hermanostataj qhatiykachakorqapacha. Tantakuna Wasista thuñirarqanku, hermanostataj suwarqanku, wisqʼaykorqanku, maqarqanku ima. Testigo wawitastapis wisqʼaykullarqankutaj. Kay 1988 watapi 12 octubre killapi gobiernoqa, Diospa llajtanpa imasninta dueñochakorqa, uj qotu soldadostaj sucursalman juntʼaykorqa. Willayta ñaupajman apaj hermanosqa presidente Mobutuman quejakorqanku, qhasillataj karqa. Chayrayku Comité de Sucursal nisqamanta kajkunaqa, imatachus ruwanankuta yachananku karqa: Tribunal Supremo nisqaman demandakuytachus chayri suyarikuytachus. Hermano Timothy Holmes uj misionero, pichus chay tiempopi Sucursalpi umachaj kasharqa, yuyarikuspa nin: “Jehovamanta yachayta, yuyayta ima mañakorqayku”, nispa. Sucursalpi kamachej hermanosqa, Diosmanta mañakuspa allinta tʼukuriytawan demandakunankupaj mana tiemporajchu kasqanta repararqanku. Astawanpis hermanosta yanapanankupaj, waj jinasmanta willanankupaj ima kallpachakorqanku.

31, 32. Zaire suyumanta Tribunal Supremo nisqa, ¿imatataj nerqa, imaynataj hermanos kasharqanku?

³¹ Watas pasasqanman jina, niña Testigoswan anchata japʼinakorqankuchu, runaj derechosnintapis aswan jatunpaj chay suyupi qhawakorqa. Sucursalpi kamachej hermanosqa, Zaire suyupi Tribunal Supremo de Justicia nisqaman rinapaj tiempoña kasqanta repararqanku. Tribunaltaj uyarerqa. Kay 1993 watapi 8 enero killapi, Jehovaj testigosninta mana leyman jinachu kasqankuta gobierno nisqanmanta qanchis watasninman jina, Tribunalqa nerqa, gobiernoj ruwasqan leypa contranpi kasqanta. Presidentej nisqantataj niña valecherqachu. Chayqa tʼukunapaj jina karqa. Imaraykuchus juecesqa, kausayninkuta wañuy pataman churaspa presidentej nisqanta niña valecherqankuchu. Hermano Holmes nin: “Demandapi kashajtiyku Jehová atiyninwan waj jinaman tukuchisqanta rikorqayku”, nispa (Dan. 2:21). Chaypi atipasqankoqa, hermanosta kallpacharqa. Imaraykuchus paykunapajqa, Rey Jesuspis Diospa llajtanta maykʼajchus, imatachus ruwanankutataj ninman jina karqa.

³² Chay tukukusqantawan sucursalqa, misionerosta wajyayta aterqa, waj edificiosta ruwayta aterqa, publicacionestapis apachimuyta.f Jallpʼantinmanta Diospa kamachisnenqa mayta kusikunku, Jehová payta yupaychanallankupajpuni yanapasqanta rikuspa (Isa. 52:10).

33. ¿Imatataj rikunchej wakin demandaspi atipasqanchejta yachaspa?

³³ Demandaspi atipasqanchejta yachaspa, Jesuspa nisqan juntʼakusqanta rikunchej. Pay nerqa: “Noqamin yuyaychasqaykichej imatachus parlanaykichejta, chay parlasqaykichejtataj enemigosniykichejqa mana atipayta, nitaj kutichikuytapis atenqankuchu”, nispa (Lucas 21:12-15 leey). Jehovaqa, kay tiempopipis Gamaliel jina runasnejta llajtanta jarkʼan chayri mana manchachikoj juecesta, abogadosta ima cheqan kajta sayachinankupaj tanqan. Jehovaqa enemigosninchejta chʼinyachin (Isaías 54:17 leey). Arí, Diospa llankʼayninman churanakusqankoqa qhasilla.

34. ¿Imaraykutaj tribunalespi atipasqanchej tʼukunapaj jina, imatataj chay rikuchin? (“Tribunales supremos Diospa Reinonmanta willakunanpaj yanapanku” nisqa recuadrotawan qhawariy.)

³⁴ ¿Imaraykutaj tribunalespi atipasqanchej tʼukunapaj jina? Jehovaj testigosnenqa mana may atiyniyojchu kanchej. Mana votanchejchu, mana politicamanpis satʼikunchejchu, nitaj politicospa yanapanta mañakunchejchu. Astawanpis tribunalesman apachikoj hermanostaqa “mana yachakuyniyoj” runasta jina qhawakun (Hech. 4:13). Enemigosninchej llulla religionmanta kajkuna chayri políticos kasqankurayku, runapajqa, tribunales mana yanapanawanchejpaj jinachu kanku. Chaywanpis ashkha kutispi demandaspi atipanapaj yanapawanchej. Chayrayku tribunalespi atipasqanchejqa, “Cristopi [...] Diospa ñawpaqempi” ima purisqanchejta rikuchin (2 Cor. 2:17). Apóstol Pablo jinataj ninchej: “[Jehová] yanapawajniy, manataj manchachikusajchu”, nispa (Heb. 13:6).