Jehová Diospa testigonkuna, ¿t’aqanachinkuchu familiakunata icha jujllachankuchu?

Diospa munayninpin familiakunaqa kashan (Génesis 2:21-24; Efesios 3:14, 15). Chaymi noqaykuqa tukuy atisqaykuta kallpachakuyku familiapi sumaqta kausanaykupaq, wasimasiykuq familianpas sumaqta kausananpaqwan. Chaymantapas Bibliapin allin consejokuna kashan familiapi sumaqta kausanapaq, chay consejokunaq yanapayninwanmi lliupi askha familiakuna sumaqta kausashanku.

Bibliapiqa imaymana consejokunan kan familiakunapaq, chaymi noqaykuqa tukuy atisqaykuta kallpachakuyku chay consejokunaman jina imatapas ruwanaykupaq (Proverbios 31:10-31; Efesios 5:22–6:4; 1 Timoteo 5:8). Chaymantapas wakin familiakunapiqa manan llapankuchu kaq creenciayoq kanku, paykunatapas Bibliapi consejokunaqa yanapanmi (1 Pedro 3:1, 2). Chaypaq kunan yachasun Testigokunaq familian ima ninkuchus chayta.

• Brasilmanta Clauir sutiyoq wiraqochan nin: “Noqaykuqa soqta wataña casarasqa kasharayku chaypas discutispallan kausaq kayku, manan allintachu apanakuq kayku. Esposay Testigo kapuqtinmi ichaqa sumaq sonqoman pacienciakuqman tukupuran. Manachus cambianman karan chayqa manapaschá kuskañachu kashaykuman karan”, nispa.

• Zambia nacionmanta Agness sutiyoq señoran nillantaq: “Qosay Testigokunawan Bibliata estudiashaqtinqa manan munaqchu kani, ‘familiaytachá t’aqanachinqa’ nispan nisharani. T’aqawanankumantaqa sumaqta kausanaykupaqmi yanapawaranku”, nispa.

Noqaykuqa wasimasiykutapas yanapaykun. Bibliawanmi yachachiyku imaynatas familiankupi sumaqta kausankuman chayta, chaypaqmi rimapayayku:

• Imaynata allin parejata ajllakunamanta

• Ñaupaq wata casado kausayta imayna apanamanta

• Suegrokunawan imaynata sumaqta kausanamanta

• Imaynata allin yuyaywan qolqeta usanamanta

• Imaynata mana discutispalla kausanamanta

• Disculpanakuyta yachanamanta

• Imaynata wawakunata allinta uywanamanta ima

Mayninpiqa kanmi. Wakin casado warmi-qharikunapiqa jujnillankun Testigo kanku, paykunatan “Sofres” nisqa empresa estudiota o encuestata ruwasqa, chaypi yachakusqanman jinaqa 20 casadokunamantas juj imaymana problemakunayoq kasqaku, chaysi pasasqa jujninku Testigo kapusqanrayku. Chay informen lloqsimuran 1998 watapi.

Jesusqa willaranñan pipas qatikuqninman tukupuqtinqa familianpi problemakuna kananta (Mateo 10:32-36). Ñaupa tiempo kausaymanta estudiaq Will Durant runaq nisqanman jinaqa, Roma llaqta munayniyoq kasqan tiempopiqa cristianokunas “juchayoq kaqku familiapi t’aqanakuy kananpaq”.a Kunan tiempopas noqaykutan wakinqa tumpawanku familiapi problemakuna kasqanmanta. Ichaqa, ¿Jehová Diospa testigonkunapunichu juchayoq kayku chaykuna kananpaq?

Jehová Diospa testigonkunatan juiciaranku familiata t’aqanachiqmanta tumpaspa, chay juicion chayaran “Tribunal Europeo de Derechos Humanos” nisqaman, chay tribunalmi nin: “Manan Testigokunachu juchayoqqa kanku aswanpas familiankunan juchayoq kanku. Paykunan imaymana problemakunata ruwanku; manan respetankuchu familiankuq ima religionmanta kananpaqpas libre kasqankuta”, nispa. Chay Tribunalmi nillantaq: “Wakin familiapiqa manan kaq religionllamantachu kanku, paykunaqa chhayna problemakunapin tarikunku, Testigokunapas chhaynapin tarikullankutaq”, nispa.b Chaykunaña pasan chaypas noqaykuqa kallpachakuykun Bibliapi consejokunata kasukunaykupaq, jujnin consejon nin: “Ama pimanpas mana allinmantaqa mana allinllawantaq kutichiychischu. [...] Tukuy atisqaykichista ruwaychis lliu runawan sumaqta kausanaykichispaq”, nispa (Romanos 12:17, 18).

Casarakuymanta rimaspan Biblia nin: “Señorpi iñiqllawanmi kanan”, nispa (1 Corintios 7:39). Chaymi noqaykuqa iñiqmasillaykuwan casarakuyku. Chaymantapas chayqa allinmi, ¿imaraykun chayta niyku? Familiamanta rimaq revistapin nin: “Casarasqakunaqa kaq religionllamanta kaqkunan aswan kusisqa kausanku”, nispa.c

Chaywanpas manan noqaykuqa pitapas kallpachaykuchu qosanmanta o esposanmanta t’aqakunanpaqqa. Bibliapipunin nin: “Mayqen wayqepas mana iñiq esposayoq kanman, esposantaqchus paywan tiyashallayta munanman chayqa, ama saqechunchu. Jinallataq, mayqen panapas mana iñiq qosayoq kanman, qosantaqchus paywan tiyashallayta munanman chayqa, ama qosanta saqechunchu”, nispa (1 Corintios 7:12, 13). Chay kamachikuytan noqaykuqa kasukuyku.