ჩქი ირნერო ვოცადუთ, ჯგირ უკეთათ დო პატიცემათ მივექცუათ იეჰოვაშ მეგობრეფს (რომ. 12:10). თეშ კეთებაშ ართ-ართ საშვალება ფსალმუნიშ 15:4-ის რე ინოჭარილ, სოვრეშეთ ბგებულენთ, ნამდა იეჰოვაშ კარავიშ სტუმარ „ვეგნურთანს დოდვალირ სიტყვას, დეზარალასინ ხოლო“. მუჟამსით მიდგაინს სიტყვას ვარზენთ დო უკულ ვა ვასრულენთ, თეთ გურს ალვოჭუანთ თე ადამიანს (მათ. 5:37). მაგალთო, იეჰოვა მუშ მსახურეფშე ითხინს, შეასრულან ქორწინებაშ დროს დოდვალირ აღთქმა. ღორონთის თიშ ძირაფა ხოლო უხარენს გურს, ნამდა მშობლეფ სქუალეფშა მეჩამილ სიტყვას ირო ასრულენა. ათეშენ, ღორონთიშ დო ადამიანეფიშ ჸოროფაშ გურშენ ირნერო ოკო ვეცადათ, ნამდა სიტყვას ქუდობდვანთინ, აუცილებერო შევასრულათ. ხოლო ართ საშვალება, მუდგათ იეჰოვაშ მოშიშეფს პატის ფცენთჷ, სტუმარიშ ჸოროფაშ დო გურხვეობაშ გიმორჩქინა რე (რომ. 12:13). მუჟამსით და დო ჯიმალეფს თავისფალ დროს ხოლო უთმენთ, ქოთ თინეფწკუმა დო ქოთ იეჰოვაწკუმა მეგობრობას ვამანგარენთ. თეწკუმა ართო, სტუმარიშ ჸოროფაშ გიმორჩქინათ იეჰოვაშ მაგალითის მეპჸუნთ. w24.06 12 ¶15, 16

იეჰოვა ჭეშმარიტებას ხვალე თინეფს უცხადენს, მით თანდაბალეფ რენა (მათ. 11:25). თანდაბალეფ ვა ვორდითკონ, ვემიბღენდით შხვეფშე მოხვარას, ნამდა ჭეშმარიტება ქუდმოგურუესკო (საქ. 8:30, 31). მარა თის ოკო ვეცადათ, ანწ ვეგნიფრთათ ამაყეფო, მუშენდა, თექ ქუმოხვად-და, ჩქინ პირად შეხედულებეფს ბიბლიურ პრინციპეფს დო იეჰოვაშ ორგანიზაციაშე მეღებულ ხელმძღვანელობას გაუმანგენთ დო იფიფქრენთ, ნამდა ჩქინ აზრეფ ხოლო ვა რე ნაკლებ ჭკვერულ. თანდაბლობა ვა ვოდინუათინ, ირიათო ოკო ფშუდან, ნამდა იეჰოვაშ კარს ჩქი მუთუნ ვა ვორეთ (ფსალმ. 8:3, 4). თეწკუმა ართო, იეჰოვას ოკო ქოფთხუათ მოხვარა, ნამდა უმოს თანდაბლობა მიღუდან დო მზათ ქუვორდათ გურაფაშო. თინა ქიმმეხვარებუნა, მუშ ძვირფას აზრეფ, ნამდგას ბიბლიაშ დო მუშ ორგანიზაციაშ საშვალებათ გინოფჩანა, ჩქინ აზრეფშე უმოს მაღალას ქიგვორინუათ. ბიბლიაშ კითხირიშ დროს განსაკუთრებულ ყურადღება ქიმიაქცით თი ადგილეფს, სოვრეშეთ იძირე, მუჭო უჸორს იეჰოვას თანდაბლობა დო მუჭო ჯოგჷ სიამაყე, ამპარტავნობა დო დუდძირგალობა. თანდაბლობაშე განსაკუთრებულო თიმწკუმა ოკო იმუფშუათ, მუჟამსით თიცალ დანიშნულებას ბღებულენთ, ნამუთ მუდგარენ ძალაუფლებას მარზენა ვარდა შხვეფიშ თოლს უმოსო მიკმორჩქინანა. w24.07 10 ¶8, 9

1919 წანაშე მოჸუნაფილ იესო ცხებულეფიშ ჭიჭე ჯგუფიშ ხეთ ხემძღვანელენს ქადაგებაშ საქმეს დო მუშ მიმაჸუნალეფს სულიერ საზრდოს ვარკენს (ლუკ. 12:42). იეჰოვა ხვამას ვარკენს თე ჯიმალეფიშ ხანდას (ეს. 65:13, 14). ჩქინ ორგანიზაცია თეშმაჯგირას გენწყილ ვა რდასინ, ვეშმალებედეს იესოშ დავალებურ საქმეშ კეთება (მათ. 28:19, 20). ართ წუთის წერმიდგინით, ნამდა ოქადაგებელ ტერიტორიეფ უბანეფო ვა რდასჷ გორთილ დო არძა სო ოკონ თექ ქადაგენდას. თაშ ქორდასინ, მინ დიხას ოშშა იჸიდ ნაქადაგებ დო მინ დიხას – შურო ვარ. დეფიქრით შხვა მიზეზეფშე ხოლო, მუშენ რე ჯგირ, ნამდა ჩქინ ორგანიზაცია თეშნერო რე გენწყილ. იესო, მუჭოთ პირველ საუკუნეს, თეშ ამდღა ხოლო ხემძღვანელენს ღორონთიშ ხალხის, ნამდა ირფელ ორგანიზებულო ხვადუდას. w24.04 8, 9 ¶2–4