იესო სრულყოფილო მეჸუნდჷ მუმაშ მაგალითის დო ხალხის ოძირანდჷ, მუნერ მოჭყოლოფე მუმა ჸუნდჷ (იოან. 14:9). თიშ სიტყვეფშე დო საქმეეფშე ქიძირ, ნამდა იეჰოვას მანგარო უჸორს ადამიანეფ, მიშურს თინეფიშ მდგომარეობაშა დო ოკო, ქიმეხვარას თინეფს ცოდაშა გერჯგინას. იესო ცოდამ ადამიანეფს ოხვარუდ, დოთირუესკო მუნეფიშ ცხოვრება დო ქეკაჸუნესკო თის (ლუკ. 5:27, 28). იესოს ჯგირო უჩქუდ, მუ ელუდ წიმი. თიქ მუშ მიმაჸუნალეფს მუსხირენშა უწუ, კოჩიშ სქუას უღალატენა დო ძელს ქიმკაჭკადანანია (მათ. 17:22; 20:18, 19). იესოს არჩქილედ, ნამდა თიშ მსხვერპლ კაცობრიობას ცოდაშე დერსხენდ. თეშნერო შისრულებუდ წინასწარმეტყველებეფ დო თინა, მუდგას მანათალ იოანე იჩიებუდ. იესოქ ხალხის თინა ხოლო უწუ, ნამდა ღურაშ უკულ ირნერ კოჩის ქიმიჸუნანდ მუშა (იოან. 12:32). თინეფ, მით იესოშ რწმენას გეგმირჩქინანდეს დო თიშ მითითებეფს ქიმიაჸუნუდეს, მიღენდეს იეჰოვაშე მოწონას. თეშნერო, საბოლათ გეთავისფალებუდეს ცოდაშე (რომ. 6:14, 18, 22; იოან. 8:32). ათეშენ იესო მზათ რდჷ, წამებულო დოღურუკო ჩქინ ორსხებელო (იოან. 10:17, 18). w24.08 5 ¶11, 12

ქიგიშინით, მუ იგინით, მუჟამსით ჭეშმარიტება მირჩქილეთ. ქიგეგით, ნამდა თქვან ზეციერ მუმას უჸორთ დო მანგარო ოკო, თიშ მსახურეფიშ დიდ ოჯახის რდათჷ. გოპირუნა, ნამდა მოსპუნს ჭუას დო ტანჯებას დო გარზენა იმენდის, ნამდა ახალ ქვეყნიერებას კინ დოირთინუანა თქვან საჸოროფო ადამიანეფს, მით ღურელ გაფუნა (მარ. 10:29, 30; იოან. 5:28, 29; რომ. 8:38, 39; გიმოცხ. 21:3, 4). ბიბლიაშე თე დო შხვა ბრელ ჯგირ ამბეშ გაგებაქ გურ ხიოლით ეიფშეს დო თეშ ქიგეჸოროფეს ღორონთიშ სიტყვაშე ნაგურეფუქ, ნამდა შურ გოლუდეს, შხვეფს ხოლო ქეჩითკო თე ირფელ (ლუკ. 24:32; ქეშუდარით იერემიაშ 20:9). მუჟამსით ჭეშმარიტება მანგარო მეჸოროფებუნა, თინა გურშა ველმახვილენა დო ვეშემლებუნა, შხვეფს ვევეჩუათ (ლუკ. 6:45). ჩქი ხოლო იესოშ მოწაფეეფცალო ვორეთ, მიდგაქ თქუეს: „ვემმატებენა თიშ გურშენ ჩიება, მუთ ბძირით დო მიფრჩქილეთ“ (საქ. 4:20). თიცალო მიჸორა ჭეშმარიტება, ნამდა მოკონა, მუთ შილებენ უმოს ადამიანს ქუგვოგებაფუათ თინა. w24.05 15 ¶5; 16 ¶7

ჩქი მთელ მსოფლიოს ფქადაგენთ სახიოლო ამბეს, მუშენდა მიჸორა ზეციერ მუმა დო მოკონა, არძას გუვოჩინებაფუათ თინა. ნამთინეს უჭირს, ხიოლ ქოძირას თე საქმეს. მუ შილებე რდასჷ თეშ მიზეზ? ნამთინე ჩქინ და დო ჯიმა მანგარ მორდებუან რე დო ფიქრენს, ნამდა შხვეფშა ჯგირო ვეგნაჩინე ორაგადე. ნამთინეშო მანგარ ძნელ რე, უჩინებ კოჩის ჸუდეს ქადირთას დო მუდგარენშე ეჩუას. ნამთინე თის ნერვიანენს, მუშ მეულათ მიდგაინ ვა გაღიზიანას. ნამთინე ხოლო თეშ რე რდილ, ნამდა ირნერო ურიდანს დუდის შხვეფწკუმა უთანხმოებეფს, ათეშენ უჭირს მსახურება, მუშენდა ოშქურ, მიდგაინქ ბიბლიურ საკითხეფშე ნირზ ვა დუჭყას. თე ძვირფას და დო ჯიმალეფს უჭირა უჩინებუეფწკუმა სახიოლო ამბეშენ ჩიება. თქვა ხოლო ხომ ვა გინაფლენთ მინშა თაშ დუდის დო ხომ ვაიჭირა ხიოლით ქადაგება? თაშ ქორენ-და, გურქ ვა გოიტირხან! ჯგირ მაქადაგებელ ვა რეთინ ქოფიქრენთ-და, თენა ნიშნენს, ნამდა თანდაბალ რეთჷ დო ვა გოკონა, ყურადღებაშ ცენტრის რდათჷ. თინა ხოლო ვა რე გლახა, ნამდა შხვეფწკუმა ნირზ ვა გოკონა. ვართ თინა რე გასაკვირ, ვა გოკოდან, მიდგაინ გაღიზიანათ, მუშენდა თქვან მიზან თენა ვარინ, თინეფშა ჯგირ ამბეშ მეღალა რე. რჯერდან, იეჰოვას ჯგირო არჩქილე, მუს გინაფლენთ დო მთელ გურით ოკო, ქიმგეხვარან (ეს. 41:13). w24.04 14 ¶1, 2