Irarian̈a “Lalàn̈any Hatsarampan̈ahy” Mandrisiky Anao Han̈ano Raha

“TSARA fan̈ahy iro ranadahy ndreky rahavavy aby io, ke ten̈a nisy vokany taminaka fahitako zen̈y.” Zen̈y raha nambarany Lisa.a Karaha ty koa nambarany Anne: “Somilany zaho vo nahita fahamarin̈ana, tsy dia raha nampianariny Vavolombelon̈o Jehovah loatra ny raha nanaitry zaho, fa iro tsara fan̈ahy.” Ino vokatrany hatsarampan̈ahy zen̈y tamindro roe vavy io? Amy zioty, iro nanjary ravoravo mamaky Baiboly sady misaintsain̈y raha koran̈inizio.

Hahavita hankahery olo man̈odidin̈y atsika koa atsika izikoa tsara fan̈ahy. Akory han̈anaovantsika zen̈y? Handiniky fomba aroe atsika ato: Amy raha volan̈intsika ndreky amy raha ataontsika. Avio hidinihintsika, aminjovy aby atsika tokony ho tsara fan̈ahy.

Mikoran̈a momba vady tsara Ohabolana toko faha- 31. Ino raha mampiavaka vady tsara io? Hita amy ‘vavanany lalàn̈any hatsarampan̈ahy.’ (Ohab. 31:26) “Lalàn̈a” io nambelany hifehy raha volan̈iny ndreky fomba nivolan̈any izio. Tokony han̈araka “lalàn̈a” io koa lelahy manambady amanjanaka lera izy mivolan̈a. Ankamaraozany raimandreny iziô man̈eky fa siaka ndreky tihitihy ten̈a misy vokany ratsy amy tsaiky. Ke izikoa raimandreny masiaka na tsy mandiniky volan̈a aboaka, zanakandro tsy hitandren̈y raha volan̈indro. Fa izikoa ndraiky raimandreny tsara fan̈ahy, ho moramora amy zanakandro hitandren̈y ndreky han̈araka raha volan̈indro.

Ino basy raha han̈ampy anao ho tsara fan̈ahy lera mivolan̈a, na mananjanaka anao na tsy manan̈a? Karaha ty koran̈iny tapany voanalohany aminy Ohabolana 31:26: ‘Hita amy raha volan̈iny fa izy misy jery.’ Ino ma dikanizen̈y? Mila fidintsika tsarabe volan̈a aboakantsika ndreky fomba an̈aboahantsika izio. Ke alohany anao hivolan̈a, ty raha tsara iritriretinao: ‘Raha hivolan̈iko ty ma hampameloko olo, sa izity hampisy fihavanan̈a?’ (Ohab. 15:1) Misy jery atsika izikoa mieritreritry tsara alohany hivolan̈a.

Misy ohabolan̈a hafa koa mivolan̈a karaha ty: “Volan̈a tsy voadiniky, marary karaha tomboko sabatra in̈y.” (Ohab. 12:18) Ho moramora amintsika hipezipezy raha volan̈intsika, izikoa dinihintsika tsialohaloha ino mety ho vokatrany raha volan̈intsika ndreky fomba hivolan̈antsika izy. Izikoa atsika man̈araka “lalàn̈any hatsarampan̈ahy”, atsika hifehy ten̈a ke tsy hasiaka na han̈ano volan̈a mmparary fônolo. (Efes. 4:31, 32) Ary ndray atsika tihasiaka, hifen̈y fo atsika ho tsara fan̈ahy ndreky be fitiavan̈a. Modely tsara arehantsika i Jehovah. Tandraraiky, nisy raha nampavozo i Elia panomponany. Jehovah nan̈iraka anjelinany hankahery i Elia. Ke anjely io koa fa nivolan̈a taminy Elia, izy nivolan̈a “moramora” sady kalma tsara. (1 Mpanj. 19:12) Ndray izy man̈ano zen̈y, tsy amy raha volan̈intsika fo tokony hahitan̈a fa atsika tsara fan̈ahy, fa amy raha ataontsika koa. Akory han̈anaovan̈a zen̈y?

Mangala tahaka Jehovah atsika izikoa mifen̈y fo ho tsara fan̈ahy amy raha volan̈intsika ndreky amy raha ataontsika. (Efes. 4:32; 5:1, 2) Zen̈y raha nambarany Lisa, araiky navoakoran̈a taloha tarỳ in̈y. Ho izy: “Nisy fotoan̈a zahay tran̈o araiky tsy maintsy nifindra tampotampoko. Fa nisy olo fivadiany aroe zay tamy fiangonan̈anay nangala congé beky iro afaka man̈ampy zahay hamôn̈o entan̈anay. Kanefa zaho tamy zen̈y tsendriky honohono nianatra Baiboly!” Nandrisiky i Lisa ho lian̈a amy fahamarin̈ana hatsarampan̈ahy naboakandro zen̈y.

Anne, ranabavy nikoran̈intsika taloha tarỳ in̈y ten̈a nankasitraka Vavolombelon̈o Jehovah, fotony iro tsara fan̈ahy taminany. Karaha ty ho izy: “Ratsy fan̈ahy taminaka aby ankamarozanolo, ke nanjary sarotro taminaka natoky olo.” Karaha ty koa ho izy: “Ke zaho koa fa nitraotro tamy Vavolombelon̈o Jehovah, zaho tsy natoky iro koa. Ho zaho tamy jeriko tan̈y: ‘Tihisaoma jerinaka fo iro iziô io man̈ano sary tsara fan̈ahy io!’ Kanefa tsapako fa ten̈a tia zaho sady tsara fan̈ahy taminaka olo nampianatra zaho Baiboly, ke nanjary natokisako izy.” Ino vokany? Ho Anne: “Nanomboko tamy zen̈y, nalaiko onon̈o tsarabe raha nianarako tamy Baiboly tao.”

Hitantsika baka amy tantarany Lisa ndreky Anne fa nanjary tihianatra ny marin̈y ampianariny Baiboly iro, izikoa fa nan̈aboahanolo an̈ivony fiangonan̈a fitiavan̈a ndreky hatsarampan̈ahy. Iro koa nanjary natoky Jehovah ndreky natoky piaramanompo.

Misy olo tsara fan̈ahy sady mazava trôko koa fa mivolan̈a, fotony efa zen̈y fomba nitarimian̈a iro. Mahalala fomba iro fotony efa zen̈y toetrindro na kolontsain̈indro, ary tsisy maharatsy zen̈y. Kanefa tsy ampy zen̈y izikoa atsika tihangala tahaka lay hatsarampan̈ahy baka amy Jehovah.​—Ampiràn̈a aminy Asan’ny Apostoly 28:2.

Hatsarampan̈ahy baka amy Zan̈ahary io an̈isany vokatrany fan̈ahy masin̈iny Zan̈ahary. (Gal. 5:22, 23) Tsy ho vitantsika hanan̈a toetry io izikoa tsy iô fan̈ampiany fan̈ahy masin̈y. Mangala tahaka Jehovah ndreky Jesosy atsika izikoa fa man̈ano zen̈y. Kristianin̈y atsika, ke zen̈y mahavy atsika mifen̈y baka ho tsara fan̈ahy aminolo. Miezaka atsika man̈ano zen̈y fotony atsika tia Jehovah Zan̈aharintsika ndreky tia olo. Tsy amboamboarin̈y hatsarampan̈ahy io amintsika fa ten̈a baka amy fô sady ankasitrahiny Jehovah, ke zen̈y mahavy izio misy vokany aminolo.

Moramora amintsika ho tsara fan̈ahy aminolo tsara fan̈ahy amintsika na olo haintsika. (2 Sam. 2:6) Man̈ano zen̈y atsika, lera atsika man̈ano mersy iro. (Kol. 3:15) Akory ndraiky izikoa olo io iritriretintsika fa tsy vain̈y han̈aboahan̈a hatsarampan̈ahy?

Diniha baka ty: Miavaka fomba an̈aboahany Jehovah hatsarampan̈ahinany, fotony an̈aboahany toetry io aby firaka aminolo tsy vain̈y han̈aboahan̈a izio. Misy raha matomboko ampianariny Baiboly momba izio. ‘Hatsarampan̈ahy miavaka’ fomba ivolan̈any Soratra Griky Kristianin̈y izio, avio matetiky izio mimpody amizio ao. Fa akory han̈aboahany Jehovah fa izy tsara fan̈ahy amintsika?

Miniminia baka! Rango nisianolombelon̈o firaka izioty, Jehovah tsy vôly man̈amia raha ilainolo antapitrisa tapitrisa, baka iro ho velon̈o fo. Hita baka amy zen̈y fa izy ten̈a tsara fan̈ahy. (Mat. 5:45) Ndray talohany atsika nahay Jehovah, izy efa tsara fan̈ahy tamintsika fo. (Efes. 2:4, 5, 8) Ohatra iziô, namezany atsika ny raha farany tsara nanan̈any, tsy azovy zen̈y fa Zanany lahy tokan̈a, han̈avotan̈a atsika. Nivolan̈a apostoly Paoly fa nan̈amia vidipan̈avotan̈a i Jehovah fotony ‘be ankitin̈y hatsarampan̈ahy miavaka aboakany’ amintsika. (Efes. 1:7) Tsy zen̈y fo. Ndray atsika panota ndreky man̈ano mampalahelo izy, Jehovah mbala vôn̈ono fo hitaridalan̈a atsika ndreky hampianatra atsika. Mety ampitovisin̈y aminy ‘erikeriky’ madiniky latsaka aminy ahitry in̈y toromariky amezany atsika ndreky volan̈anany. (Deot. 32:2) Tsy ho voavalintsika foeky raha jiaby nataony tamintsika han̈aboahan̈a hatsarampan̈ahy io. Ny marin̈y aminany, miankiny aminy hatsarampan̈ahiny Jehovah fiain̈anantsika aminy hoavy.​—Ampiràn̈a amy 1 Petera 1:13.

Hay be fa, Jehovah koa fa man̈aboaka hatsarampan̈ahy amintsika, atsika mahaitia izy fo sady tihangala tahaka toetrinany. Ke atsika tokony ho tsara fan̈ahy aminolo jiaby, fa tsy aminolo sasany fo. Tokony hifen̈y koa atsika hangala tahaka Jehovah ke han̈aboaka izio aminolo, isanandra. (1 Tes. 5:15) Izikoa atsika man̈aboaka hatsarampan̈ahy fo, atsika miran̈a môtro man̈afana aminy andra manintsy in̈y. Ke ho vitantsika hankahery lafamìntsika, piaramanompo amintsika, olo fiasan̈a araiky amintsika ndreky olo lekaoly araiky amintsika, avio jiranintsika.

Diniha azovy amy lafamìnao na piaramanompo aminao mety hahita hatsaran̈a izikoa anao tsara fan̈ahy amindro. Diniha koa tsao misy olo fiangonan̈a araiky aminao mila hampian̈a han̈adio na hikarakara tran̈onany, na hamafa lakoronany, na han̈ano bazarinany. Lera anao manompo, anao mety hahita olo sahiran̈a, ke tsao mba misy raha mety hataonao han̈ampian̈a izy.

Alô atsika hangala tahaka Jehovah, ke irarian̈a “lalàn̈any hatsarampan̈ahy” fo hibeko raha volan̈intsika ndreky raha ataontsika.