Mateyu

23 Kaneko Yesu ŵatandite kuŵecheta ni gulu ja ŵandu soni ŵakulijiganya ŵakwe kuti, 2 “Alembi ni Afalisi aliŵisile achimsyene pa udindo wa Mose. 3 Myoyo, yindu yosope yakumsalila, myitendeje, nambo mkatendaga yindu yakusatenda jemanjajo, pakuŵa ŵangatenda yakusaŵecheta. 4 Akusataŵa katundu jwawusito ni kumŵika pamakoyo ga ŵandu, nambo achimsyenewo ŵangasaka kumtuta atamose ni chala chawo. 5 Yindu yosope yakusatenda, akusayitenda ni chakulinga chakuti ŵandu ŵawoneje, pakuŵa akusakusya tumabokosi* twakola malemba twakusawala mpela chilisi nambosoni akusalewuya ulusi wa mumbesi mwa yakuwala yawo. 6 Jemanjaji akusanonyela kutama m’malo gakuchimbichikwa mnope pa chakulya cha ligulo, soni akusanonyela kutama m’mipando jakusogolo* m’masunagoge. 7 Akusanonyelasoni kuti ŵandu ŵapeje moni mwau­chimbichimbi m’misika soni kuti ŵakolanjeje kuti Labi.* 8 Nambo jemanja ŵandu akamkolangaga kuti Labi, ligongo Mwalimu jwenu ali jumo, soni wosopemwe mli ŵapaulongo. 9 ­Nambosoni ­mkasimumkolangaga jwalijose pachilambo chapasi kuti atati ŵenu, ligongo Mtati jwenu ali jumo, jwali kwinani. 10 Ŵandu akamkolangagasoni kuti achimlongola, ligongo Mlongola jwenu ali jumo, Klistu. 11 Nambo jwamkulungwa pasikati penu akusosekwa kuŵa jwakutumichila jwenu. 12 Jwalijose jwakulikwesya chachimtulusya, soni jwalijose jwakulinandiya chachimkwesya.

13 “Mkwete likungu* jemanja alembi ni Afalisi ŵachinyengo! Ligongo mkwawugalila ŵandu mlango wakwinjilila mu Uchimwene wakwinani. Jemanja mwachimsyene mkulepela kwinjila nambo mkwalepelekasyasoni ŵandu ŵakusaka kwinjila. 14 *——

15 “Mkwete likungu jemanja alembi ni Afalisi ŵachinyengo! Ligongo mkusajenda ulendo welewu panyasa ni pamkuli kuti mkamgalawusye mundu jumope jwa mtundu wine, nambo pagalaŵiche, mkusamtendekasya kuŵa jwakuŵajilwa kumponya ku Gehena* soni kuŵa jwakulemwa mnope kumpunda jemanja.

16 “Mkwete likungu jemanja achimlongola ŵangalola, ligongo mkusati, ‘Naga mundu akulumbila pakukolanga nyumba ja Mlungu, yalumbileyo yangali masengo, nambo naga akulumbila pakukolanga golide jwa m’nyumba ja Mlungu, akusosekwa kusunga malumbilo gakwe.’ 17 Jemanja ŵandu ŵakuloŵela soni ŵangalola! Ana chakusosekwa mnope ni chapi, golide kapena nyumba ja Mlungu jele jikusaswejesya golidejo? 18 Jemanja mkusaŵechetasoni kuti, ‘Naga mundu akulumbila pakukolanga malo gakupelechela mbopesi, yalumbileyo yangali masengo, nambo naga akulumbila pakukolanga mbopesi jajili pelepo, akusosekwa kusunga malumbilo gakwe.’ 19 Jemanja ŵandu ŵangalola! Ana chakusosekwa mnope ni chapi, mbopesi kapena malo gakupelechela mbopesi gele gakusaswejesyaga mbopesijo? 20 Myoyo, jwalijose jwakulumbila pakukolanga malo gakupelechela mbopesi, akulumbilila malogo ni yindu yosope yayili pelepo. 21 Soni jwalijose jwakulumbila pakukolanga nyumba ja Mlungu, akulumbilila nyumbajo ni Mlungu jwakusatama m’nyumbamo. 22 Nambosoni jwalijose jwakulumbila pakukolanga kwinani, akulumbilila mpando wa Mlungu ni msyene jwakusatama pelepo.

23 “Mkwete likungu jemanja alembi ni Afalisi ŵachinyengo! Ligongo mkusapeleka chalikumi* cha tumbeju twa minti soni dilili* ni mkuya, nambo ngamkusayikosya yindu yakusosekwa mnope ya mu Chilamusi mpela, chilungamo, chanasa, soni kulupichika. Yisyene yindu yeleyo yili yakusosekwa kupeleka, nambo yikamtendekasyaga kulepela kutenda yindu yakusosekwa mnope. 24 Jemanja achimlongola ŵangalola, mkusatyosya membe mu yakumwa yenu nambo mkusamila yimpepe ni ngamila!

25 “Mkwete likungu jemanja alembi ni Afalisi ŵachinyengo! Ligongo mkusalimbana ni kuchapa kusa kwa chikapu ni mbale, nambo mkati mwakwe muli mugumbele yakusumula soni ungalilekasya. 26 Jemanja Afalisi ŵangalola, mchape kaje mkati mwa chikapu ni mbale, kuti kusa kwakwe kuŵesoni kweswela.

27 “Mkwete likungu jemanja alembi ni Afalisi ŵachinyengo! Ligongo mli mpela malembe gepache layimu, gele kusa kwakwe kuli kwesalale nambo mkati mwakwe muli mugumbele mawupa ga ŵandu ŵawe soni yakunyalaya ya mtundu uliwose. 28 Mwakulandana ni yeleyi, jemanjasoni mkusawoneka mpela ŵakulungama pameso pa ŵandu, nambo mkati mwenu muli mugumbele yachinyengo soni ungapikanila malamusi.

29 “Mkwete likungu jemanja alembi ni Afalisi ŵachinyengo! Ligongo mkusataŵa malembe ga ŵakulochesya soni kusalalisya malembe ga ŵandu ŵakulungama, 30 ni mkusati, ‘Yikaŵe kuti twatemi mundaŵi ja achinangolo ŵetu ŵakala, ngamkanitukola nawo magambo gakuwulaga ŵakulochesya.’ 31 Myoyo, jemanja mkulitendela umboni mwachimsyene kuti mli ŵanache ŵa ŵandu ŵaŵawuleje ŵakulochesya. 32 Sambano mmalisyetu masengo ga achinangolo ŵenugo.

33 “Jemanja ŵanache ŵa majoka, ana chimchikombola wuli kutila chilango* cha ku Gehena?* 34 Paligongo lyeleli, ngumtumichisya ŵakulochesya, ŵandu ŵalunda, nambosoni ŵakusajiganya ŵandu pagulu. Ŵane mwa jemanjaji chimchawulaga soni kwakomela pachitela, soni ŵane mwa jemanjaji chimchakwapula m’masunagoge genu soni kwalagasya m’misinda josope. 35 Chimchitenda yeleyi ni chakulinga chakuti magambo ga myasi ja ŵandu wosope ŵakulungama gaŵe pa jemanja, kutandila ni myasi ja mundu jwakulungama Abele mpaka myasi ja Sekaliya mwanache jwa Balakiya, jwele jemanja mwamwulajile pasikati pa nyumba ja Mlungu ni malo gakupelechela mbopesi. 36 Nditu ngumsalichisya kuti, ligongo lya yindu yeleyi chilango chichigwila m’bado* welewu.

37 “Yelusalemu, Yelusalemu, jwakuwulaga ŵakulochesya soni kwaponya maganga ŵandu ŵaŵatumile kwa mmwejo. Ndaŵi ni katema mbele ndili mkusachilila kuti songanganye pampepe ŵanache ŵenu, mpela mwajikusatendela nguku pakusonganganya ŵanache ŵakwe m’mapapiko gakwe! Nambo mmwejo nganimsaka yeleyi. 38 Sambano mpikane! Mlungu ajilesile nyumba jenuji.* 39 Pakuŵa ngumsalichisya jemanja kuti, ngasimumbonasoni une ata panandi mpaka pachimchiŵecheta kuti, ‘Jwana upile mundu jwakwika m’lina lya Yehofa.’”