MBALI 7
YAWUSASILE UCIMWENE KUTI YICITENDEKWA Kupanganya Yindu Yosope Kuŵa Yasambano
AWANICISYE kuti akukaŵa apulo jwamjiwu m’citela. Pakaŵile akusangalala kaje ni liwungo lyakwe lyalikupikanika cenene kaneko akumŵika m’basikete mwagali maapulo gane. Aŵele mkukamula masengoga kwa maawala gejinji, nambope akulipikana kuti akwete macili soni ali ŵakoseka kupitilisya kukamula masengoga. Mama ŵawo ali pa citela cine ciŵandika ni wawojo. Nombe nawo akukamula masengoga mwakusangalala kwineku ali mkukunguluka ni acalongo acimjenu soni acimjawo ŵakwakamucisya masengoga. Mama ŵawoŵa akuwonekape cisikana mpela muŵawonecelaga yaka yipiteyo wawojo ali mwanace. Yili yakusawusya kukulupilila kuti ŵaweni mama ŵawoŵa ali mkukula m’cilambo cakalaci. Ŵawonaga paŵalagaga ni ulwele soni mpaka pandaŵi jaŵawaga. Mwamti wawojo ŵalisile paŵajawulaga kukwasika kapena kuti ku kwaŵika ku malembe mama ŵawoŵa. Nambo sambano akwawona ali ajimwice ku malembe yalumo ni ŵandu ŵajinji, akuwoneka cenene soni akwete cilu camacili.
Tukumanyilila kuti ndaŵiji cijiyice nditu. Tukumanyilila yeleyi, ligongo lyakuti yasasile Mlungu ndaŵi syosope yikusatendekwa. Mu mbali ajino, citukambilane kakwanilicikwe ka yindu yine yaŵasasile Mlungu yakwamba Ucimwene yaciyilongolele pamkaŵapa ku ngondo ja Alimagedo. Citukambilanesoni yindu yine yakusangalasya yayicitendekwa panyuma pa Alimagedo. Kusala yisyene, yiciŵa yakusangalasya kuwuwona Ucimwene wa Mlungu uli mkulamulila cilambo cosope capasi, soni uli mkupanganya yindu yosope kuŵa yasambano.