LIJIGANYO 14

Kugombelecesya Songa Syekulungwa

Ahebeli 8:1

YACITULIJIGANYE: Ŵakamucisye ŵakupikanila ŵawo kuti ajikuyeje cenene ngani jawo, soni alosyeje kamulana kwa songa jekulungwa jilijose ni ciwundo ca ngani jawojo nambosoni cakulinga cakwe.

MWAMPAKA ATENDELE:

Amanyilileje cakulinga ca ngani jawo. Naga nganijo cakulinga cakwe cili gamba kwamanyisya, kwatendekasya lung’wanu kapena kwalimbikasya ŵakupikanila, akusosekwa kuŵeceta mwakamulana ni yeleyo. Kalondesye kawo ka songa syekulungwakulungwa kalosyeje kuti kakukamulana ni cakulinga ca nganijo.

Aliwusyeje kuti: ‘Ana ŵakupikanila ŵangu mpaka akole yiwusyo yamtuli panganiji? Nambi ali apatile kwanga kwa yiwusyoyo, ana mpaka awusyesoni yiwusyo yapi?’ Akusosekwa kusanja cenene songa kuti ŵakupikanila ŵakuyeje, kwapikanicisya soni kwiticisya yakuŵecetayo.
Agombelecesyeje ciwundo cekulungwa ca ngani jawo. Pakuŵeceta ngani jawo pakusaka kugombelecesya ciwundo cekulungwa, ndaŵi ni katema awilisyeje maloŵe gagakukamulana ni ciwundoco.
Songa syawo siŵeje syakupikanika soni syangasawusya. Asaguleje songa syekulungwape syasikukamulana ni mtwe wa nganijo soni syampaka ajiganye cenene mwakamulana ni ndaŵi. Akatupiya songa syekulungwakulungwa, aŵeceteje songa jilijose mwakupikanika cenene. Akusosekwa kwimicila kaje panandi soni kwalongolela cenene ŵakupikanila ŵawo pakwawula pa songa jine.

Mpaka akolanje songa syekulungwa m’maloŵe gandanda kapena kumbesi kwa ngani jawo pakusaka kwakamucisya ŵakupikanila kujikuya nganijo soni kusikumbucila songasyo.