Akagamba Kutama Ngaŵeceta
1. Ana patuli mu undumetume ni ŵane mpaka tusyasye catuli cisyasyo ca ndumetume Paulo?
1 Ndumetume Paulo piŵaŵaga ni ŵakulupilila acimjakwe ŵajiwonaga kuŵa ndaŵi jambone jakuti ‘alimbisyane.’ (Alo. 1:12) Pali mu undumetume ni jwakulalicila mjawo, ana akusajiwona kuŵa ndaŵi jambone jakumlimbikasya, soni kumkamucisya? M’malo mwagamba kutama ngaŵeceta cilicose, wuli ngamsalila yayakamucisye wawojo kuti aŵe jwakulalicila jwakamula mtima?
2. Ana mpaka tutende cici pakwakamucisya ŵatujesile nawo mu undumetume kuŵa ŵakulimba mtima, soni ligongo cici yili yakusosekwa?
2 Ŵakamucisye Kuŵa Ŵakulimba Mtima: Ŵakulalicila ŵane akusakola woga, yeleyi yikusawonecela pangope syawo, soni pakaŵecete kawo. Mpaka twakamucisye kuŵa ŵakulimba mtima pakwayamicila yisyesyene. Ana mpaka twakamucisyesoni catuli kuti aŵe ŵakulimba mtima? Jwakulolela mkuli jwine ŵatite, akusamsalila jwali najo mu undumetume ya woga wakusakola, soni mwakusapelecela lipopelo kuti amasye woga. Mbale jwine ŵasasile yayamkamucisye kuti aŵe jwakulimba mtima, jwatite: “Yikusatanda ni kumwemwetela. Kuti yeleyi yikombolece ndaŵi sine ngusasosekwa kupopela kuti angamucisye.” Ana pana cicakamucisye wawojo kuŵa ŵakulimba mtima mu undumetume? Ŵasalile ajawo ŵakwenda nawo mu undumetume wa mumgunda.
3. Ana mpaka tumsalile yatuli jwatuli najo mu undumetume pakumkamucisya kuti aŵe jwakwiganya cenene?
3 Asalilaneje Matala Gakulalicilila: Ana apatile maloŵe gangasawusya gakutandila kuŵecetana, ciwusyo, kapena cakutendekwa ca kumaloko, cakamucisya kuti alalicileje mwakamula mtima? Ana pana yindu yine yakusaŵeceta yayakamucisye pakamulicisya masengo litala lyakusatusalila? Ŵasalile ajawo mu undumetume. (Miy. 27:17) Pakwawula ku ulendo wakuwilisya, mpaka amsalile mjawo yakosecele, soni yacakatende pakuyikwanilisya. Palimasile lijiganyo lya Baibulo, mpaka amsalile mjawojo ligongo lyakwe ŵasagwile songa, lilemba, kapena litala lyakajiganye kane kakwe pakwanilisya yakusosekwa ya jwakulijiganyajo.
4. Ligongo cici tukusosekwa kola lungw’anu lwakwakamucisya ŵakulalicila acimjetu?
4 Ŵakulalicila ŵa yaka 100 yandanda, nganagamba kola lugw’anu lwakwakamucisya ŵangakulupililape. Nambo ŵayiwonaga kuŵa yakusosekwasoni kulimbisyanaga jwine ni mjakwe. (Mase. 11:23; 15:32) Ndumetume Paulo ŵamjiganyisye Timoteyo kaneko ŵamlimbikasisye kuti ŵasalile ŵane yalijiganyisyeyo. (2 Tim. 2:2) Naga tukwatendela yambone ŵakulupilila acimjetu patuli mu undumetume, ngatukusagamba konjecesya kusangalala kwawo, kapena kwakamucisya kulalicila mwakamula mtima nambo tukusasangalasya Atati ŵetu ŵakwinani.—Ahe. 13:15, 16.