Kola Ŵandu Ŵakwagaŵila Magasini Kukusakamucisya Kutandisya Majiganyo ga Baibulo
1. Ligongo cici likuga lya Yehofa liŵele lili mkwalimbikasya ŵakulalicila kola ŵandu ŵakwagaŵila magasini?
1 Ŵandu ŵajinji ŵangasaka kulijiganya Baibulo, nambo akusanonyela kuŵalanga magasini getu. M’yoyo, likuga lya Yehofa liŵele mkwalimbikasya ŵakulalicila kola ŵandu ŵakwagaŵila magasini. Ŵandu pakuŵalanga magasini getu ndaŵi ni katema akusatanda kusacilila kupikana Maloŵe ga Mlungu. (1 Pet. 2:2) Mkupita kwa ndaŵi, akusaŵalanga ngani jine jampaka jatendekasye kunda lijiganyo lya Baibulo.
2. Ana mpaka tutende cici kuti lung’wanu lwa ŵandu ŵatukusagaŵila magasini lukamala?
2 Ajitilileje Mbeju sya Usyesyene: Mmalo mwakwamba kupeleka magasini ni kutyoka, atagulilaneje ni msyene nyumbajo, soni alinjeje kumtendekasya kulipikana kuti ali mjawo. Yeleyi yicakamucisya kumanyilila mwayiŵelele yindu pa umi wakwe, lung’wanu, soni cikulupi cakwe, yayicakamucisya kuŵecetana najo mwalunda. (Miy. 16:23) Akoseceleje pakwawula kwa mundujo. Naga kwakomboleka, agombelecesye songa jekulungwa, soni atagulile lilemba lyakamulana ni nganijo, ajitilile mbeju jilijose ja usyesyene jajili mumtima mwakwe. (1 Akoli. 3:6) Alembe lisiku lililyose lyajawile kwa mundujo, mabuku gampele, soni yatagulilene ni malemba gaŵakamulicisye masengo.
3. Ana tukusosekwa kuwujila kwa mundu jutwampele magasini pali papite ndaŵi jelewu catuli?
3 Ana Tuwujileje Pali Papite Ndaŵi Jelewu Catuli? Kwa ŵandu ŵakusiŵapa magasini akusosekwa kuwujilako kamo pa mwesi pakuja kwapa magasini gasambano. Nambope, mwakamulana ni mwayiŵelele yindu pa umi wawo, soni lung’wanu lwa mundujo, mpaka asagule yakuwujilako ndaŵi ni katema. Mwambone, pali papite cijuma cimo kapena yiŵili mpaka awujileko ni kumsalila kuti, “Mwakata ngusaka nalosye kanekakwe m’magasini ganapele gala.” Yeleyi yicimtendekasya mundujo kusacilila kuŵalanga nganijo. Naga jwaŵalasile kala, komboleka kum’wusya yaŵapikene m’magasinimo ni kutagulilana najo mwakata. Kapena naga mundujo akusanonyela kuŵalanga mabuku getu, komboleka kumpa kapepala, kabuku, kapena buku jatukugaŵila mwesi welewo.
4. Mpaka tutendeje wuli kuti tumanyilile naga ŵatukusapa magasini ali ŵakusacilila kulijiganya Baibulo?
4 Akajembeceyaga kuti msyene nyumba ŵaŵende kuti atande nawo lijiganyo lya Baibulo. Atande wawojo kumsalila ya lijiganyo. Atamose kuti munyuma jwakanaga kulijiganya Baibulo, ndaŵi ni katema mpaka amlosye ngani sya mu Nsanja ya Olonda mpela syakuti “Kuyankha Mafunso a M’Baibulo” ni kulola naga ali jwakusacilila kuŵecetana najo. Mwine mpaka atande najo kulijiganya mwakata. Nambo naga ngakombola kutandisya lijiganyo, mpaka agambe kwendelecela kumpa magasini kuti lung’wanu lwakwe lukamala.