Akamulicisyeje Masengo Magasini Gakala Mwalunda

Pakuŵa magasini gakala gangakamucisya jwalijose naga tugambile kugasunga kapena kugajasa, m’yoyo tukusosekwa kugagaŵila. Magasini jimo mpaka jimtendekasye mundu kola lung’wanu lwakusaka kulijiganya usyesyene, soni mpaka jimkamucisye kutanda kukolanga lina lya Yehofa. (Alo. 10:13, 14) Matala gakuyicisyaga gali gakutukamucisya kamulicisya masengo mwalunda magasini gakala.

• Pakulalicila m’mikuli jangalaliciligwa ndaŵi ni katema mpaka alece magasini jimo pamalo gambone pamlango panganasimana ŵandu.

• Pakulalicila m’malo gakusasimanikwa ŵandu ŵajinji mpela mmalo gakwembeceya ma basi kapena sitima, ŵawusye ŵandu ŵali pelepo naga mpaka asace cakuŵalanga, ŵalosye magasini gakala gakulekanganalekangana kuti asagule jakusaka.

• Pakwawula kumalo gakucapisya yakuwala, malo gakusunjila ŵakalambale, kucipatala kapena malo gane mpela gelega gagali mu mkuli wa mpingo wawo, alece magasini gakuŵalanjika pamalo gakulindilila. Nambo ndaŵi syosope yikusaŵa cenene kum’ŵenda kaje jwakulolela pamalopo naga apali. Naga pamalopo pana magasini gane, akalekapo gane.

• Pakukosecela maulendo gakuwilisya, aganicisye yakusanonyela mundu jwalijose jwacacingangane najo. Ana akwete liŵasa? Ana akusanonyela kwenda? Ana ali mnamalima? Awungunye m’magasini gakala naga mwana ngani jampaka ajinonyele, ni amlosye pacingangene najo.

• Naga asimene ni mundu jwalung’wanu juŵatindanaga najo, amlosye magasini gakala ganganampeje.