Kapanganye Kakusangalasya ka Tumapepala Twasambano!

1. Ana cici cakukamulicisya masengo mu undumetume cacipanganye mwakusangalasya, soni mwasambano?

¹ Pamsongano waupande wa 2013 wakuti “Maloŵe ga Mlungu Gali Usyesyene!” pakopwece tumapepala msano twasambano. Konjecesya pelepa, pakopwecesoni kapepala kasambano ka Ngani ja Ucimwene Na. 38 ka mtwe wakuti “Ana Ŵawe Komboleka Kwimukasoni?” Tumapepala tosope twakwana 6 atupangenye mwakusangalasya, soni mwasambano. Ana ligongo cici atupangenye cati m’yiyi? Patukukamulicisya masengo tumapepalatu mu undumetume wa nyumba ni nyumba, ana mpata tukamulicisye masengo catuli yindu yasambano yaŵisilepo?

2. Ana lisosa lya kalinganye kasambano ka tumapepala kali cici?

² Ligongo Cici Atulinganyisye Mwasambano?: Pa yisyasyo ya mwampaka tutendele patukulalicila ku nyumba ni nyumba akusasala mbali mcece asi: (1) Kuti atande kutagulilana akusosekwa kum’wusya ciwusyo kuti asale nganisyo syakwe. (2) Kuŵalanga nawo lilemba. (3) Kumpa buku msyene nyumbajo kuti aŵalanjeje. (4) Kumlecela ciwusyo cakuti cajanje ulendo wakuyicisya ni kulinganya yakuti cawujileko. Kapanganye ka tumapepala kasambanoka cikatukamucisye kuti tutendeje mbali mcecesi mwangasawusya.

3. Ana mpaka tugaŵile catuli kapepala kasambano mu undumetume?

³ Mwampaka Tutukamulicisye Masengo: (1) Panyuma pakumkomasya, amlosye msyene nyumbajo ciwusyo cacili pa peji jandanda ja kapepolako, ni kum’wusya kuti asale nganisyo syakwe. (2) Akawugule kapepalako mkati ni kutagulilana “Yajikusasala Baibulo.” Aŵalanje lilemba kutyocela m’Baibulo jawo naga yili yakomboleka. Naga msyene nyumbajo akwete ndaŵi, komboleka kutagulilana kamtwe kakuti “Ana yeleyi Yikutukwaya Catuli?” (3) Ampe kapepalako, soni amlimbikasye kuti aŵalanje kapepala kosopeko pacakole lipesa lyambone. (4) Mkananyakuce, amlosye ciwusyo cacili pasi pa kamtwe kakuti “Yakusosekwa Kuyiganicisya” kunyuma kwa kapepalako ni kulinganya yakuti catagulilane kwanga kwa m’Baibulo ulendo wakuyicisya.

4. Ana mpaka tukamulicisye catuli tumapepala twasambano pa ulendo wakuwilisya?

⁴ Kutenda ulendo wakuyicisya kuli kwangasawusyasoni. Agambe kukamulicisya masengo lilemba lyalili kunyuma kwa kapepalako kuti ajanje ciwusyo ciŵalesile ulendo wandanda. Mkananyakuce, amlosye msyene nyumbajo ciwulili ca kabuku ka Ngani Syambone, kaneko amlosye kabukuko, soni mtwe waukutagulila yejinji ya ngani jatagulilenejo ni kumpa kabukuko. Naga jwalakwe apocele, alinganye yakuti cayice ulendo wine kukutagulilana kabukuko. Pelepo nikuti atandisye lijiganyo lya Baibulo! Kapena mmalo mwakupeleka kabukuko, kombolekasoni kumpa kapepala kane ni kulinganya yakuti catagulilane ulendo wakuyicisya.

5. Ana tumapepala tuŵele twakamucisya catuli mu undumetume?

⁵ Kwa yaka yakupunda 130, tuŵele tuli mkukamulicisya masengo tumapepala pakulacila. Atamose kuti aŵele mkutucenga kapanganye kakwe, tumapepalatu tuŵele twakamucisya mnope mu undumetume. Kwende tukamulicisyeje masengo tumapepala twasambanotu kuti tujendelecele kuwandisya utenga wa m’Baibulo pacilambo cosope.​—Miy. 15:7a.