Ana ŵa Mboni sya Yehofa Akusamasya Malombela Kapena Akusagalimbisyaga?

M’weji ŵa Mboni sya Yehofa tukusatenda yakuti maŵasa getu kapena ga achimjetu gaŵe gakulimba. Tukusamchimbichisya Mlungu juŵatandisye ulombela. (Genesesi 2:​21-​24; Aefeso 3:​14, 15) Kupitila mu maloŵe gakwe Baibulo, Mlungu ŵakamuchisye ŵandu ŵajinji kola maŵasa gakulimba soni gakusangalala.

Tukusalingalinga kupikanila yajikusasala Baibulo. Tukusatenda yeleyi ligongo yikusakamuchisya kuti mundu jwalijose mwiŵasa, chinga jwamlume, jwamkongwe kapena nangolo aŵe jwambone. (Misyungu 31:10-​31; Aefeso 5:⁠22–​6:4; 1 Timoteo 5:8) Lunda lwa m’Baibulo lukusakamuchisya atamose liŵasa lya ŵandu ŵakulekangana dini kuti atameje mwakamulana. (1 Petulo 3:​1, 2) Aganichisye maloŵe gakuyichisyaga gaŵechete ŵandu ŵane ŵele achimjawo ŵa mu ulombela ŵaŵele ŵa Mboni sya Yehofa.

• Jwamlume jwine jwaŵechete kuti, “Pa yaka 6 yandanda mu ulombela wetu, twatamilaga kangana. Nambo ŵamkwangu paŵagambile kuŵa ŵa Mboni sya Yehofa, ŵatendaga yindu mwachinonyelo soni mwakuwusimana mtima. Yeleyi yakamuchisye kuti tukole liŵasa lyambone.”​—Clauir, jwa ku Brazil.

• Jwamkongwe jwine jwatite, “Ŵamkwangu paŵatandite kulijiganya Baibulo ni ŵa Mboni sya Yehofa nganingamulana nayo, naganisyaga kuti jemanjaji akusamasya maŵasa. Nambo paŵatandite kulijiganya Baibulo, natandite kuyiwona kuti Baibulo jikamuchisya mnope liŵasa lyetu.”​—Agness jwa ku Zambia.

Patukulalichila tukusitwalosyaga achimjetu kuti kukamulichisya masengo yajikusasala Baibulo mpaka kwakamuchisye kutenda yindu yakuyichisyayi

• Kusagula mwalunda mundu jwakulombana najo

• Kusangalala m’chaka chandanda cha mu ulombela

• Yampaka atende kuti akamulaneje ni akwegwe ŵawo

• Kamulichisya masengo mbiya mwalunda

• Mwampaka aŵambalile kangana

• Yampaka atende kuti ŵakululuchileje ŵamkwawo

• Kwajiganya ŵanache

Kusala yisyene ndaŵi sine yeleyi mpaka yitendekasye kuti ŵandu akakamulanaga mwiŵasa. Mwachisyasyo, lipoti line lyalyakopweche mu 1998, ŵakuwunguya ŵane, (Sofres) ŵapatile kuti pa malombela 20 galigose, ulombela umo, ukusakola yakusawusya yejinji kutandila pele jumojo achenjile dini. Yeleyi yikusatendekwa naga jumojo ali jwa Mboni sya Yehofa.

Yesu jwasasile chile kuti ŵandu ŵachachikuyaga yijiganyo yakwe, chachisimanaga ni yakusawusya m’maŵasa gawo. (Mateyu 10:32-​36) Jwakulemba mbili jwine (Will Durant) jwasasile kuti mundaŵi ja Ulamusi wa Loma, “Aklistu ŵajimbaga magambo gakumasya malombela.”a Nombe ŵa Mboni sya Yehofa ŵane masiku agano akusajimbidwaga magambo gakulandanago. Ana yeleyi yikugopolela kuti ŵa Mboniŵa akusatendekasya kuti malombela gasokonecheleje?

Pakulamula magambo gane gakwamba kuti ŵa Mboni sya Yehofa akusasokonasya maŵasa ga ŵandu, Koti ja ku Europe, jakulola ya Ufulu wa ŵandu, jasasile kuti maŵasa gele jwine ali jwa Mboni, jwanganaŵa jwambonijo, akusatandisya kangana ligongo akusakana “kwitichisya soni kuchimbichisya yikulupi ya mjakwejo.” Kotiji jasasilesoni kuti, “Yeleyi yili yakuwanda m’maŵasa gejinji gele ŵandu ŵakwe ali ŵakulekangana dini. Yeleyi yikupwatikapo liŵasa lyelye jumo ali jwa Mboni sya Yehofa.”b Atamose kuti ŵa Mboni akusasimana ni yakusawusya yine yayikusayika ligongo lyakulekangana dini, jemanjaji akusapikanila yajikusasala Baibulo kuti “Mundu naga akumtendela yakusakala, mkasimumwuchisya chakusakalacho. . . . Naga kuli kwakomboleka, mtameje mwa mtendele ni ŵandu wosope mpela mutimpakombolele.”​—Aloma 12:17, 18.

Ŵa Mboni sya Yehofa akusapikanila lilamusi lyakuti naga akusaka kulombela mpaka alombane ni “mklistu” mjawo, kugopolela kuti ŵakulombanawo akusosekwa kuŵa ŵakuti akusakulupilila yakulandana. (1 Akolinto 7:​39) Lilamusili, lili lya m’Baibulo soni lyakamuchisya. Mwachisyasyo, ngani jine jajakopweche mu 2010 jakusala ya maŵasa ni ulombela (Journal of Marriage and Family) jatite “ŵalombane ŵakusakulupilila yakulandana soni ŵali mu dini jimpepe akusakamulana mnope.c

Nambope, ŵa Mboni ŵangalimbikasyaga ŵakutumichila achimjawo kuti amasye ulombela wawo ni mjawo jwa mu ulombela jwanganaŵa jwamboni. Baibulo jikusasala kuti, “Naga jwamlume jwa chiklistu akwete jwamkongwe jwangakulupilila, ni jwamkongwejo akusaka kutama najo peŵasa, jwamlumejo akamleka jwamkongwejo. Naga jwamkongwe jwa chiklistu alombedwe ni jwamlume jwangakulupilila, ni jwamlumejo akusaka kutama najo peŵasa, jwamkongwejo akamleka jwamlumejo.” (1 Akolinto 7:​12, 13) Ŵa Mboni sya Yehofa akusapikanila maloŵe gelega.