Ligongo Chichi ŵa Mboni sya Yehofa Ŵangatenda Nawo Yisangalalo ya Masiku Gakupagwa?

Ŵa Mboni sya Yehofa ŵangatendaga nawo yisangalalo ya masiku gakupagwa ligongo lyakuti yisangalalo yeleyi yangamsangalasyaga Mlungu. Atamose kuti Baibulo jangasala yejinji yanganiji, nambope kuganichisya yindu yayikusatendekwa payisangalaloyi mpaka kutukamuchisye kupikanichisya nganisyo sya Mlungu panganiji.Kwende tulole yindu mcheche soni tulole mwayikuti kamulana ni mfundo sine sya m’Baibulo.

1. Yisangalalo ya masiku gakupagwa yatyochele kwa ŵandu ŵaŵalambilaga milungu jaunami. Buku jine jasasile kuti yisangalaloyi yatandite ligongo lyakulupilila kuti palisiku lyakumbuchila kupagwa kwa mundu, “misimu jakusakala mpaka jiwulasye ŵandu ŵakusangalalawo.” Myoyo “naga palisikuli payiche achimjakwe ŵa mundu jwakusangalalila lisiku lyakupagwalyo, soni naga achimjakwewo akutenda yindu yakulosya kuti akumsosela mjawojo yambone nikuti misimu jila jawulasyaga ŵandu.” (Funk & Wagnalls Standard Dictionary of Folklore, Mythology, and Legend,) Nombe najo buku jine (The Lore of Birthdays) jikusasala kuti kalakala, yakutendekwa pakumbuchila masiku gakupagwa “yakamuchisyaga kumanyilila upile wakwete mundujo kusogolo pakamulichisya masengo ndondwa soni yindu yine yakwinani.” Bukuji jikusasalasoni kuti “mwakamulana ni yikulupi ya achinangolo ŵakala, makandulo (yakumulichila) gakusagapamba pa lisiku lyakumbuchila kupagwa, gana machili gamasenga gakumpa mundu yakusaka yakwe.”

   Nambope Baibulo, jikusalekasya kutenda yamasenga, kulondola yisango, yamisimu, soni “ni yine yati mpela yeleyi.” (Detulonomo 18:14; Agalatiya 5:​19-​21 Malangano Gasambano 1992 edition) Sonitu chindu chine chachamtendekasisye Mlungu kuwujonanga msinda wa Babiloni, chaliji chakuti ŵandu ŵakwe ŵakulupililaga ndondwa lyalili litala line lya yisango. (Yesaya 47:11-​15) Nambo pelepa ngayikugopolela kuti ŵa Mboni sya Yehofa akusatamila kuwungunya mujatandile misyungu ja ŵandu. Nambo ngani jili jakuti naga yajikusala Baibulo yikamulana ni nganijo, ŵa Mboni akusakuya yajikusasalaga Baibulo.

2. Aklistu ŵandanda nganasangalalilaga masiku gakupagwa. Buku jine jakuwungunyila ngani (The World Book Encyclopedia) jikusati, jemanjaji ŵayiwonaga kuti kusangalalila lisiku lyakupagwa kwaliji kwakamulana ni miyambo ja ŵandu ŵaŵalambilaga milungu jaunami.” Baibulo jikusasalaga kuti ŵandumetume soni ŵandu ŵane ŵaŵajiganyidwe ni Yesu, ŵapeleche chisyasyo chele Aklistu wosope akusosekwa kukuya.​—2 Atesalonika 3:6.

3. Mwambope wakusosekwa kuwukumbuchila Aklistu uli kukumbuchila chiwa cha Yesu ngaŵaga kukumbuchila lisiku lyakupagwa. (Luka 22:17-​20) Yeleyi yikatusimonjesya, ligongo Baibulo jikusati, “Lyuŵa (lisiku) lyakuwa likusapunda lisiku lyakupagwa.” (Jwakulalichila 7:1) Yesu paŵawaga, ŵaliji ali apanganyisye mbili jambone kwa Mlungu. Yeleyi ni yayikutendekasya kuti lisiku lya chiwa chakwe liŵe lyakusosekwa mnope kupunda lisiku lyakupagwa kwakwe.​—Ahebeli 1:4.

4. Baibulo jangasalaga ya jwakutumichila jwa Mlungu jwalijose juŵasangalalile lisiku lyakupagwa. Pelepa ngaŵa kuti m’Baibulo ŵaliŵalile kulembamo ya masiku gakupagwa. Baibulo jikusasala ya yisangalalo yiŵilipe yele yiŵatesile ŵandu ŵangamtumichila Mlungu. Nambo Baibulo jikusasala yindu yayatendekwe pa yisangalaloyi.​—Genesesi 40:20-​22; Maliko 6:21-​29.

Mwakulandana ni achinangolo wosope, ndaŵi syosope nombe nawo achinangolo ŵa Mboni sya Yehofa akusapata matala gakwalosya chinonyelo ŵanache ŵawo. Yeleyi yikupwatikapo kwapa mituka soni kwawula kwine kukunguluka nawo. Achinangoloŵa akusakuyaga chisyasyo cha Mlungu jwele akusiŵapaga ŵanache ŵakwe yindu yambone. (Mateyu 7:​11) Ŵanache ŵa Mboni sya Yehofa ŵangalipikana kuti pana yakwajima naga ngakutenda nawo yisangalalo ya masiku gakupagwa. Apikane yaŵechete ŵanache ŵane:

• “Yikusaŵaga yakusangalasya mnope naga mpochele mtuka wakuti nganiwujembecheyaga.”​—Tammy, jwayaka 12.

• “Atamose ngangusapochela mituka palisiku lyakupagwa kwangu, nambope achinangolo ŵangu akusambaga mituka ndaŵi jine jilijose. Yeleyi yikusasangalasya ligongo mkusapochelaga mitukajo pandaŵi jangamkwembecheya.”​—Gregory, jwayaka 11.

• “Ana akuganisya kuti mundu mpaka asangalale ali agambile kulya tumakeke soni kwa maminisi 10 kwineku ni kwamba kupikanila kanyimbo basi? Chayiche kumangwetu kuti chalole mwatukusati kusangalala”​—Eric, jwayaka 6.