Kumnonyela Yehofa kukusatutendekasya kuti tulichimbichisyeje lina lyakwe. Mwamti tukusajigala nawo mbali pakulichimbichisya linali, mwakwasalila ŵandu kuti yindu yaŵasasile Satana yakwamba Yehofa yili yaunami. (Gen. 3:​1-5; Yob. 2:4; Yoh. 8:44) Patuli mu utumiki tukusasachilila kulichenjela lina lya Yehofa mwakwasalila ŵandu yindu yisyesyene yakwamba jwalakwe. Tukusasakasoni kuti jwalijose amanyilile kuti ndamo jekulungwa jakwete Yehofa jili chinonyelo soni kuti ali jwakulamulila jwachilungamo. Nambosoni tukusasaka kwamanyisya ŵane kuti pachangakaŵapa Uchimwene wakwe uchimasya yakusawusya yosope soni kuti ŵandu chachitamaga mwakusangalala soni mwamtendele. (Sal. 37:​10, 11, 29; 1 Yoh. 4:8) Patukwasalila ŵandu ya ndamo syambone syakwete Yehofasi tukusaŵa tuli mkulichimbichisya lina lyakwe. Tukusaŵagasoni ŵakusangalala ligongo lyakutenda yindu yatukusasosekwa kutenda mpela ŵakutumichila ŵakwe. w24.05 18 ¶12

Abale mpaka alosye kuti ‘akusiŵapochela chenene achalendo’ pakulingalinga kwatendela yambone ŵandu ŵane kupwatikapo ŵandu ŵanganaŵa achimjawo ŵa pamtima. (1 Pet. 4:9) Buku jine jakulondesya Baibulo jasasile kuti, mundu jwakwapochela chenene achalendo “akusiŵalosya chinonyelo atamose ŵandu ŵele ngakwamanyilila soni akusasangalala kwaŵilanjila jemanjajo ku nyumba jakwe.” Aliwusye kuti, ‘Ana ngwete mbili jamti uli pangani jakwapochela chenene achalendo?’ (Aheb. 13:​2, 16) Mundu jwakwapochela chenene ŵane akusatenda yampaka akombole pakwakamuchisya achalendo kupwatikapo ŵandu ŵakulaga, nambosoni abale ŵakusalipeleka mnope pa utumiki wawo mpela ŵakulolela madela, kapena abale ŵayiche kukuŵecheta ngani pampingo.—Gen. 18:​2-8; Mis. 3:27; Mase. 16:15; Alo. 12:13. w24.11 21 ¶6

Mungani ja achiŵali, Yesu jwasasile ya achiŵali 10 ŵaŵapite kukumchingamila mlombela. (Mat. 25:​1-4) Achiŵali wosopeŵa ŵapite kukumchingamila mlombela ku pwando. Mwamti Yesu jwalondesisye kuti achiŵali msano ŵaliji “ŵakalamuka” nambo msano ŵanewo ŵaliji “ŵakuloŵela.” Achiŵali ŵakalamukaŵa ŵakosechele chenene kumjembecheya mlombela mpaka ali akopochele atamose ali ayiche chilo. Myoyo, jemanjaji ŵajigele nyali sya mawuta kuti syakamuchisye chilo. Jemanjaji ŵajigelesoni mawuta ga pambali ni chakulinga chakuti nyali syawo sikasima naga mlombelajo achelewe. Mwamti yaŵatesileyi yakamuchisye kuti nyali syawo sikasima. (Mat 25:​6-10) Mlombelajo pajwakopochele, achiŵali ŵakalamukawo ŵajinjile najo yimpepe m’nyumba jakutendela pwando. Mwakulandana ni yeleyi, Aklistu ŵasagulwe ŵachachilosya kuti ali mesope soni ali ŵakulupichika mpaka ndaŵi jachachiyika Klistu chachawelusya kuti ali ŵakuŵajilwa kuŵa yimpepe ni mlombela, jwali Yesu mu Uchimwene wakwe, kwinani.—Chiw. 7:​1-3. w24.09 21 ¶6