Komboleka jwachiswamba juŵapitikwiche mtima soni juŵamkomele chiŵandika ni Yesu jwaliji Myuda. Ayuda ŵamlambilaga Mlungu jumpepe, nambo ŵandu ŵamitundu jine ŵalambilaga milungu jejinji. (Eks. 20:2, 3; 1 Akoli. 8:5, 6) Yikaŵe kuti jwachiswambaju jwaliji jwamitundu jine, nikuti chiwusyo chachili mu lilemba lya lisiku lyalelo chikaliji chakuti, “Ana mmweji ngamkogopa milungu?” Nambosonitu, paja Yesu nganatumidwa kwa ŵandu ŵamitundu jine, jwalakwe jwatumidwe kwa “ngondolo syesokonechele sya m’nyumba ja Yisalayeli.” (Mat. 15:24) Mlungu jwamanyisye Ayisalayeli kuti jwalakwejo chachajimusya ŵandu ŵaŵawile. Komboleka kuti jwachiswamba juŵapitikweche mtima jula jwamanyililaga yeleyi. Mwamti maloŵe gakwe gala gakusalosya kuti jwamanyililaga kuti Yehofa chachimjimusya Yesu kuti chalamulile mu Uchimwene wa Mlungu. Ngatukukayichila kuti jwachiswambaju jwakulupililaga kuti Mlungu chachimjimusya. Mpela Myuda, komboleka kuti jwachiswamba juŵapitikwiche mtima jula jwamanyililaga yakwamba Adamu soni Hawa. Myoyo, komboleka kuti jwachiswambaju jwakulupililaga kuti Paladaiso juŵagambaga Yesu pa Luka 23:43 uchiŵa mgunda wesalale mnope pachilambo chapasi pepa.—Gen. 2:15. w22.12 8-9 ¶2-3

Msimu wa Mlungu mpaka utukamuchisye kuti tukwanisye masengo getu gakulalichila. Ligongo chichi tukuŵecheta myoyo? Ligongo Satana akulimbana ni uweji ni chakulinga chakuti atulepelekasye masengo getu gakulalichila. (Chiw. 12:17) Ŵandu ŵajinji akusayiwona kuti Satana ali jwamachili mnope mwamti nganituŵa tulimbene najo. Nambo patukukamula masengo gakulalichila tukusaŵa kuti tukumgomeka jwalakwejo. (Chiw. 12:9-11) Ana tukusatenda yeleyi mwamtuli? Patukulalichila, tukusalosya kuti ngatukutenda woga ni yitendo ya Satana. Ndaŵi syosope patukulalichila, tukusaŵa kuti tukumgomeka Satana. Myoyo mpaka tujilekuti msimu weswela wa Mlungu ni wawukusatukamuchisya soni Yehofa ali ku mbali jetu. (Mat. 5:10-12; 1 Pet. 4:14) Msimu weswela mpaka utupe machili gatukusosechela kuti tumalane ni yakusawusya yatukusasimana nayo patukulalichila. (2 Akoli. 4:7-9) Sano, ana mpaka tutende wuli kuti msimu wa Mlungu upitilisyeje kutukamuchisya? Tukusosekwa kupopela ndaŵi syosope, soni kuŵa ŵakusimichisya kuti Yehofa chapikane mapopelo getu. w22.11 5 ¶10-11

Tukusalosyasoni kuti tukusitwanonyela abale ni alongo ŵetu mwakulingalinga kutama nawo mwamtendele. Mwamti tukusamsyasya Yehofa pangani jakwakululuchila ŵane. Naga Yehofa jwayikene pakukunda kuti Mwanache jwakwe awe ligongo lya yakulemwa yetu, ana m’weji mpaka tulepele kwakululuchila abale ni alongo ŵetu patuleŵele? Ngatukusosekwa kuŵa mpela kapolo jwakusakala juŵamkolasile Yesu muchiwanichisyo chakwe chine. Atamose kuti ambujegwe ŵamkululuchile ngongole jekulungwa mnope, kapoloju jwalepele kumkululuchila mjakwe kangongole kamwana kajwakwete. (Mat. 18:23-35) Naga atindene nganisyo ni Mklistu mjawo, ana nganaŵa atesile yakomboleka kuti aŵesoni pamtendele ni mjawojo mkanaŵe kutenda Chikumbuchilo? (Mat. 5:23, 24) Pakutenda yeleyi akusalosya kuti akusamnonyela mnope Yehofa ni Yesu. w23.01 29 ¶8-9