Batu bawombo badi Baklistu bantubanga ti, muingi kuvuka vantombulu to “kukikinina mu [Yesu]” ayi kuntadila ti widi mvukisi. (Yoa. 6:​29, Tsekudulu yi King James) Vayi bawombo mu nkangu wu batu ku Ngalili baba kiminu mu Yesu, babika kubue kunlandakana. Kibila mbi? Nduka nkangu woso wu batu Yesu kadikila, baba kunlandakananga mu mayangi mu kibila ki bidia. Bawu baba tomba to Yesu kaba belusa, kaba dikila ayi kukuwa mambu baba tomba. Vayi Yesu wusudikisa ti nandi kasa kuizila ko va ntoto muingi kuvanga mambu bawu baba tomba. Nandi wuyizila muingi kuba longa mambu bafueti vanga muingi baba minlandikini miandi mikiedika. Vayi vaba tombulu bawu kuvitika thuadusulu yi Yesu, yi ‘kukuenda kuidi nandi’ voti yi kunkuwa ayi kuntumukina.—Yoa. 5:40. w24.12 12 ¶12-13

Mbi bilenda sadisa nnuni kununga mavanga mambi? Mu kulandakana kifuani ki Yesu. Phila kakiebila buboti bapostolo bandi, kidi kifuani banuni bafueti landakana mu phila bafueti kiebila bakazi bawu. Ndoko tumona buidi Yesu kavangila mawu.Yesu wukieba buboti bapostolo bandi. Nandi kasa sadila ko lulendu luandi muingi kuba vanga kuyindula ti basi ko luvalu voti kummona boma. Vayi mu kukikulula, nandi wuba sadila. (Yoa. 13:​12-17) Nandi wukamba minlonguki miandi: “Longukanu kuidi minu, kibila yidi mutu wu buphombo ayi wukikululanga mu ntima woso, ayi benu munkuiza baka khindusulu.” (Mat. 11:​28-30) Yesu widi mutu wulembama. Mutu wulembama, kasi ko wulebakana. Vayi nandi widi mangolo kibila zebi kukiyala. Bo ba kunsoka nandi wumbanga wuvumbama ayi wunnunganga kuyala mabanza mandi. w25.01 10 ¶10-11

Bo tukue fikamanga kutsuka nza ayiyi tulenda ba lufiatu ti mambu ma kukhambu ku zimbongo mankuiza buelama. Mambu ma pulitika, mimvita, bivuka voti bimbefu, ayi kubotula batu mu bisalu malenda nata batu kukuazuka beni voti kuzimbisa biuma badi. Mbi bilenda tusadisa kubaka makani mammonisa ti tumfiatilanga mu Yave? Diambu ditheti tufueti vanga didi, kuzabikisa Yave mambu ma tukuazula. Ndinda kakuvana nduenga yintombulu muingi wubaka makani mamboti, ayi wuba wuvumbama muingi wubika kuazukila ngolo mu mambu wumviokila. (Luk. 12:​29-31.) Ndinda lusalusu muingi ka kusadisa wuyangalala mu biuma widi. (1 Ti. 6:​7, 8) Fiongunina buidi bu kunungina mambu ma kukhambu ku zimbongo. Bawombo babaka ndandu mu malongi madi mu jw.org mantubila mambu amomo. w25.03 28-29 ¶10-11