Bo kambaka makani ma ku tulemvukila, Yave wumfionguninanga boti mutu besumuka wuntadila mambu kabe vanga ti madi mambi. Yesu wusudikisa mawu bo katuba mambu madi mu Luka 12:​47, 48. Boti mutu wunkana kuvanga diambu dimbi, kheti mu kuzaba ti diawu dilenda nhongisa Yave, nandi widi mu kuvola disumu dingolo. Mu kutadila mutu wu phila ayoyo, Yave ḿba kalenda baka makani boti wunkuiza nlemvukila voti ndamba. (Malaku 3:29; Yoa. 9:41) Vayi mu kutadila diambu adiodio, bukiedika ti tulenda tambula nlemvu wu Yave? Ngete! Vayi Yave wubue tadilanga mvandi diambu dinkaka, boti mutu besumuka, benhongina mu bukiedika masumu mandi. Mbi binsundula kunhongina masumu? Kunsundula “kubalula mayindu, mavanga ayi makani.” Mvandi kunsundula kuba mu kiunda kingolo mu kibila ki mambu mambi kabe vanga voti kuba mu kiunda kibila kasa vangila ko mambu mu phila yifuana. Mutu wunhonginanga masumu, wumbanga beni mu kiunda kubika ti mu masumu kabe vola, vayi kibila kabe vangila diambu dimbi voti kabe bela wulebakana mu kiphevi. w22.06 5-6 ¶15-17

Zimbeni zitu bantubanga luvunu matedi zikhomba bantuama ntuala mu kimvuka ki Yave. (Minku. 31:13) Ayi bawombo mu zikhomba zitu ba kuba tulanga mu buloko mu kuba vunina mambu makhambu fuana. Mawu mamonikina zikhomba zitu mu sekulu yitheti bo batula mvuala Polo mu buloko ayi bamvunina mambu. Zikhomba zinkaka babika kubue sadisa mvuala Polo bo bantula mu buloko ku Loma. (2 Timo. 1:​8, 15; 2:​8, 9) Yindula buidi mvuala Polo kabela. Nandi wukindama mu mambu mawombo maphasi ayi wutula luzingu luandi va kingela mu kibila kiawu. (Mava. 20:​18-21; 2 Koli. 1:8) Diawu, tulendi kuituka ko ti Satana nandi wunluta tsikikanga thalu kuidi zikhomba bantuama ntuala muingi kuba thota. Nandi widi mayindu ma kuba tula boma ayi kutulula lukuikumunu luawu. (1 Pete. 5:8) Tatamana kusadisa zikhomba ziaku ayi wuba monisa lukuikumunu.—2 Timo. 1:​16-18. w22.11 16-17 ¶8-11

Ditongueni dinhongina masumu mandi, ḿba wuba musi Yuda. Basi Yuda, baba buongiminanga Nzambi mueka to, vayi batu ba mimvila minkaka baba kikininanga ti vadi zinzambi ziwombo. (Esodu 20:​2, 3; 1 Koli. 8:​5, 6) Boti ditongueni adiodio diba musi mimvila minkaka, khanu nandi wunkamba: ‘Ngie wisi ko boma bu zinzambi?’ Mvandi Yesu wufidusu kuidi ‘mamemi mazimbala ma Isaeli’. (Matai 15:24) Nzambi wuzabikisa kuidi basi Isaeli ti kuala ba luvulubukusu ayi ditongueni dinhongina masumu, ḿba wuzaba mawu mu kibila ki mambu katuba ti, Yave wala vulubusa Yesu Klistu muingi kuyala mu Kintinu ki Nzambi. Ayi ḿba ditongueni beni wuba lufiatu ti Nzambi wala mvulubusa. Mu kuba musi Yuda, ḿba ditongueni wunhongina masumu, wuzaba matedi Adami, Eva ayi Paladizu Yave kakanikisa va ntoto. Diawu tulenda tubila ti ditongueni adiodio, wuba lufiatu mu Paladizu Yesu katubila ti yala ba lumbu lumboti beni va ntoto.—Ngene. 2:15. w22.12 8-9 ¶2-3