Toʼoneʼ nojoch baʼal k-ilik le Bibliaoʼ tumen k-ojel u Tʼaan Dios. Le Bibliaoʼ jeʼel u yáantkoʼon k-utskíint le problemaʼoboʼ bey xan le baʼaloʼob maʼ maʼalobtak k-beetkoʼ. ¿K-kʼamik wa le tsolnuʼukoʼob ku tsʼáaikoʼ? Koʼox ilik baʼax úuch teʼ yáax siglo tiʼ Evodia yéetel Síntique, kaʼatúul kiikoʼob yéeyaʼanoʼob utiaʼal u binoʼob kaʼanoʼ. Le Bibliaoʼ ku yaʼalikeʼ baʼateltʼaanajoʼob chéen baʼaleʼ maʼatech u yaʼalik baʼax oʼolal. Le baʼax úuchaʼ maʼ xaaneʼ tu beetaj u káajal u jatskuba le sukuʼunoʼob teʼ múuchʼuliloʼ. Le Bibliaoʼ ku yaʼalikeʼ Pabloeʼ tu tsolnuʼuktaj le kaʼatúul kiikoʼobaʼ yéetel tu yaʼalajtiʼob ka u kaʼa bisubaʼob maʼalob. Letiʼobeʼ tu beetoʼob le baʼax aʼalaʼabtiʼob tumen Pablooʼ ka seguernaj u meyajtikoʼob Jéeoba yéetel kiʼimak óolal (Fili. 4:2, 3). Bejlaʼa xaneʼ teʼ múuchʼuliloʼ yaan kʼiineʼ jeʼel u yantaltoʼon wa baʼax kʼuuxilil yéetel wa máaxeʼ. Chéen baʼaleʼ wa k-chaʼik k-nuʼuktaʼal tumen le Bibliaoʼ, jeʼel k-utskíintik le problemaʼobaʼ wa jeʼel u beetik maʼ u yantaltoʼon mix junpʼéel kʼuuxilileʼ. Le ken k-beet xan baʼax ku yaʼalik le Bibliaoʼ k-eʼesik nojoch baʼal k-ilik le baʼax ku yaʼaliktoʼon Diosoʼ (Sal. 27:11). w16.11 3:1-3

Tuláakloʼon kʼaʼabéet u líiʼsaʼal k-óol. Le taatatsiloʼoboʼ jach kʼaʼabéet u líiʼsik u yóol u paalaloʼob desde tu chichniloʼob. Juntúul doctor ku kʼaabaʼtik Timothy Evanseʼ, ku yaʼalikeʼ «jeʼex u kʼaʼabéetil u jóoyabtaʼal junkúul chan paakʼaleʼ le mejen paalaloʼoboʼ [...] kʼaʼabéet xan u líiʼsaʼal u yóoloʼob». Tsʼoʼoleʼ tu yaʼalaj: «Le paalaloʼob ku líiʼsaʼal u yóoloʼoboʼ ku yuʼubikoʼob yaabiltaʼanoʼob yéetel ku chʼaʼabloʼob en cuentail». Chéen baʼaleʼ tumen kuxaʼanoʼon «tu tsʼook kʼiinoʼobeʼ» le máakoʼoboʼ chéen ku tuukuloʼob tu yoʼolaloʼob yéetel tsʼoʼok «u pʼáatal minaʼan u yaabilajoʼob» (2 Tim. 3:1-5). Satanaseʼ u yojleʼ wa ku beetik u lúubul k-óoleʼ yaan u xuʼulul k-tsʼáaik k-óol meyajt Jéeoba. Letiʼeʼ yaʼab baʼaloʼob tu beetaj tiʼ Job utiaʼal ka lúubuk u yóol, chéen baʼaleʼ maʼ jóokʼ jeʼex tu tukliloʼ tumen Jobeʼ chúukpaj u yóol tiʼ Jéeoba (Job 2:3; 22:3; 27:5). Toʼon xaneʼ jeʼel u páajtal k-eʼesik tiʼ Satanaseʼ kex jeʼel baʼalak ka u beeteʼ maʼ ken k-náachtal tiʼ Jéeoba. Wa mantatsʼ k-ilik k-líiʼsik u yóol le máaxoʼob yanoʼob ichil k-familia bey xan le sukuʼunoʼob teʼ múuchʼuliloʼ, yaan k-áantik u maasil utiaʼal u yantaltiʼob kiʼimak óolal yéetel utiaʼal maʼ u náachtaloʼob tiʼ Jéeoba. w16.11 1:4, 6

Óoliʼ tu añoil 1500, jujuntúul máakoʼob maʼ tu chʼaʼajoʼob saajkileʼ, tu traducirtoʼob le Biblia ichil le idiomaʼob suuk u tʼanik le máakoʼoboʼ. U nuuktakil le Iglesiaoʼ sajakchajoʼob tumen u yojloʼobeʼ le ken u xok le máakoʼob uts u puksiʼikʼaloʼob le Bibliaoʼ yaan u káajal u tuklikoʼob: «¿Baʼax tekstoil tiʼ le Biblia ku yaʼalik kʼaʼabéet u boʼotaʼal juntúul sacerdote utiaʼal u máansik u misail juntúul máax tsʼoʼok u kíimil? ¿Baʼax tekstoil tiʼ le Biblia ku yaʼalik unaj u yantal papaʼob yéetel cardenaloʼoboʼ?». U nuuktakil le Iglesiaoʼ ku tsʼíikiloʼob ken kʼáataʼaktiʼob wa tiaʼan teʼ Biblia le baʼax ku kaʼanskoʼoboʼ. Le oʼolaleʼ tuláakal le máaxoʼob maʼ seguernaj u kʼamkoʼob le baʼax ku kaʼanskoʼoboʼ, tu túuxtoʼob kíimsbil. Letiʼobeʼ u kʼáatoʼob kaʼach ka xuʼuluk u xoʼokol le Biblia tumen le máakoʼoboʼ beyoʼ mix máak kun kʼáatiktiʼob mix baʼal. Le baʼax u kʼáatoʼob kaʼachaʼ béeychaji tumen yaʼab máax xuʼul u xokik le Bibliaoʼ. Chéen baʼaleʼ u jaats máakoʼobeʼ maʼ sajakchajoʼobiʼ yéetel maʼ seguernaj u palitsiltaʼaloʼob tumen le Nojoch Babiloniaoʼ. Letiʼobeʼ tu kanoʼob u jaajil teʼ Bibliaoʼ yéetel taakchaj u maas kaanbaloʼob. w16.11 4:13