Maʼ chéen unaj u yaʼalaʼal tiʼ le paalaloʼob baʼax maʼalob yéetel baʼax maʼ maʼalobiʼ. Maʼalob xan ka kʼáataʼaktiʼob: «¿Baʼaxten bey jatsʼutstak jujunpʼéel tiʼ le baʼaxoʼob ku yaʼalik le Biblia maʼ u beetaʼaloʼ? ¿Baʼax áantkech a creert utiaʼal a wutsil le baʼax ku yaʼalik le Bibliaoʼ?» (Isa. 48:17, 18). Ken u yaʼal juntúul paal taak u yokjaʼeʼ, kʼaʼabéet u yáantaʼal tumen u taataʼob utiaʼal ka tuukulnak tiʼ baʼaxoʼob táakaʼaniʼ. ¿Bix u yilik le okjaʼoʼ? ¿Baʼax utsil jeʼel u taasiktiʼeʼ? ¿Baʼax talamil jeʼel u yantaltiʼeʼ? ¿Baʼaxten maas yaʼab le utsiloʼob ku taaskoʼ? (Mar. 10:29, 30). Táanil tiʼ u yokjaʼeʼ le paaloʼ unaj u naʼatik tuláakal leloʼ. Wa ku yáantaʼal tumen u taataʼob tuukul tiʼ le baʼaloʼobaʼ, maas jeʼel u creertik mantatsʼ ku taasik utsil u beetik le baʼax ku yaʼalik le Bibliaoʼ. w17.12 t.j. 21 § 14, 15

Yaʼab sukuʼunoʼobeʼ nojoch kʼojaʼanil ku muʼyajtikoʼob. Yanoʼobeʼ kex tsʼoʼok u yantal u jaʼabiloʼobeʼ táan u kanáantkoʼob u láakʼtsiloʼob tsʼoʼok u chʼíijloʼob. Yaan xaneʼ táan u yilik u tsʼáaik tiʼ u familia le baʼax maas kʼaʼabéettiʼoʼ. K-ojel xaneʼ yaan tiʼ letiʼobeʼ maʼ chéen junpʼéel talamil yaantiʼobiʼ, baʼaxeʼ junpuul u aktáantkoʼob jejeláas baʼaloʼob. Jéeobaeʼ u yojel u kʼaabaʼ cada junpʼéel estrella. ¿Baʼax k-kanik tiʼ leloʼ? K-kanikeʼ wa Dios ku chʼaʼik en cuenta le baʼaxoʼob maʼ kuxaʼanoʼoboʼ, maas ku chʼaʼikoʼon en cuenta tumen táan k-meyajtik yéetel yaabilaj (Sal. 19:1, 3, 14). Jéeobaeʼ jach u kʼaj óolech tubeel. Jesuseʼ tu yaʼalaj: «U tsoʼotsel a pooleʼexeʼ láaj xokaʼan» (Mat. 10:30). Juntúul tiʼ le máaxoʼob tsʼíibt le salmoʼoboʼ tu yaʼalaj xan: «Le Yuumtsiloʼ ku kanáantik le máaxoʼob uts u kuxtaloʼoboʼ» (Sal. 37:18). Letiʼeʼ u yojel baʼaxoʼob ka muʼyajtik, le oʼolal jeʼel u tsʼáaiktech u muukʼil utiaʼal a aktáantkoʼobeʼ. w18.01 t.j. 7 § 1; t.j. 8 § 4

Apóstol Pedroeʼ tu kaʼa kuxkíintaj juntúul kiik ku kʼaabaʼtik Dorcas wa Tabita. Yoʼolal le nojoch milagroaʼ «yaʼab máakoʼob tu beetubaʼob u disipuloʼob Yuumtsil». Le disipuloʼobaʼ jeʼel u páajtal u yaʼalikoʼobeʼ Jesús yéetel Jéeobaeʼ yaan páajtalil tiʼob utiaʼal u kaʼa kuxkíintikoʼob le kimenoʼoboʼ (Bax. 9:36-42). Koʼoneʼex ilik bix kaʼa kuxkíintaʼabik juntúul kimen. Juntéenjeakeʼ apóstol Pabloeʼ táan kaʼach u kaʼansaj chúumuk áakʼab tu yóoxpʼéel pisoil junpʼéel naj yaan tu kaajil Troas, bejlaʼeʼ tu xaman-chikʼin Turquía yaan le kaajoʼ. Juntúul táankelem xiʼipal ku kʼaabaʼtik Euticoeʼ kulukbal tu ventanail le naj u yuʼub baʼax ku kaʼansaʼaloʼ, baʼaleʼ weeneʼ ka lúubi. Le máax yáax kʼuch tu yiknaloʼ, maʼ xaaneʼ Lucas, tumen letiʼeʼ doctor. Lucaseʼ tu yaʼaleʼ le xiʼipaloʼ maʼ chéen desmayarnajaʼaniʼ, baʼaxeʼ kimen. Ka éem Pabloeʼ tu méekʼaj Eutico, ka tu yaʼalaj tiʼ le máaxoʼob yanoʼoboʼ kuxaʼan. ¡Bukaʼaj wal úuchik u jaʼakʼal u yóol le máaxoʼob iloʼ! Maʼ xaaneʼ jach kiʼimakchaj u yóoloʼob, tumen tu táanoʼob kaʼa kuxkíintaʼab le xiʼipaloʼ (Bax. 20:7-12). w17.12 t.j. 5 § 10, 11